ოზურგეთის დემოკრატიული ჩართულობის ცენტრში „პარვუს ჯგუფი“, რომელიც ოზურგეთში ჰესებს აშენებს, ადგილობრივი მედიის წარმომადგენლებს და არასამთავრობო ორგანიზაცია „ეკოს“ ხელმძღვანელს ირმა გორდელაძეს შეხვდა.
როგორც ჩვენი მკითხველისთვის ცნობილია, სკოპინგის ანგარიშის წარდგენის შემდეგ ირმა გორდელაძემ გარემოს ეროვნული სააგენტოს შენიშვნები და რეკომენდაციებით მიმართა.
როგორც დღევანდელ შეხვედრაზე ექსპერტმა, ლევან ოზბეთელაშვილმა გვითხრა, „ეკოს“ და გარემოს ეროვნული სააგენტოს მიერ მიღებული შენიშვნები და რეკომენდაციების ერთი ნაწილი უკვე შესრულებული აქვს კომპანიას, ახლაც მიმდინარეობს მუშაობა ხარვეზების გამოსწორებაზე და დასკვნა შემდეგ კვირაში ონლაინ იქნებ ხელმისაწვდომი დაინტერესებული პირებისთვის.
ირმა გორდელაძის თქმით, ის, რაც ითქვა დღევანდელ შეხვედრაზე, არ პასუხობს იმ კითხვებს და რეკომენდაციებს, რაც მან გააგზავნა გარემოს ეროვნულ სააგენტოში:
„ხალხო, გააკეთეთ ხარისხიანი კვლევა, დატოვეთ მდინარეში წყალი, რაც აუცილებელი და მნიშვნელოვანია. ხომ ვერ შევაგნებინე ეს ამ ხალხს. ვერ დაეტიეთ იქ, სადაც იყავით? რა გინდათ გურიაში?! სულ ჩხუბი მიწევს, მერე მე მეძახიან გიჟს და გადარეულს. ამ საქმეს მივყვები ბოლომდე და როცა დავრწმუნდები, რომ ყველაფერი სუფთა გაქვთ, ვიტყვი. დამარწმუნეთ, რომ ეს კვლევები ნამდვილია და ხარისხიანი. ბოლოსდაბოლოს, წამიყვანეთ და მანახეთ, რა ხდება მშენებლობის ადგილზე. როგორც წესია, ისე მოამზადეთ აუცილებელი და საჭირო კვლევები და ერთი წლის შემდეგ დავილაპარაკოთ“, _ თქვა ირმა გორდელაძემ.
ლევან ოზბეთელაშვილმა აღნიშნა, რომ პროექტი შემდეგ ეტაპზე არის გადასული, რაზეც ირმა გორდელაძემ უპასუხა, რომ ის ამას გაასაჩივრებს და შეხვედრა დატოვა.
შეხვედრაზე ამ ეტაპზე არ იმყოფებოდნენ სოფელ შემოქმედში კვირა დღეს გამართული აქციის მონაწილეები.
“გაუქმდეს, ძალადაკარგულად ან ბათილად გამოცხადდეს ყველა დონის სამართლებრივი აქტი, ნებართვა, შეთანხმება, ხელშეკრულება, ლიცენზია და ა. შ., რომელიც დაკავშირებულია ზემოთ ხსენებულ მშენებლობასთან;
დაუყოვნებლივ შეჩერდეს ბჟუჟის ხეობაში დაწყებული ჰიდროელექტრო სადგურების მშენებლობა; ხეობიდან გაყვანილი იქნეს სამშენებლო ტექნიკა;
ადგილობრივი მოსახლეობის წარმომადგენლებს მიეცეთ ხეობაში არსებული მდგომარეობის მონიტორინგის შესაძლებლობა;
დაუყოვნებლივ დაიწყოს გარემოსთან მიყენებეული ზიანის აღრიცხვა შეფასება და ზიანის აღმოფხვრის მიზნით სამუშაოები”, _ ეს ხუთი მთავარი მოთხოვნა, რომლის შესრულებასაც აქციის მონაწილეები ითხოვენ.
ჩართულობის ცენტრში გამართულ შეხვედრაზე „გურია ნიუსის“ მიერ დასმულ კითხვაზე შეხვდებიან თუ არა აქციის მონაწილეებს, „პარვუს ჯგუფის“ პროექტების დირექტორმა, ზურაბ ბესელიამ გვიპასუხა:
„აუცილებლად შევხვდებით მათ. ჩვენ მზად ვართ, დაინტერესებულ პირებს ავუხსნათ ჩვენი პროექტის დეტალები“ , _ გვითხრა ზაზა ბესელიამ.
როგორც ცნობილია, ერთი წლის წინ „პარვუს ჯგუფი“ ბჟუჟას ხეობაში სამი მცირე ჰესის მშენებლობას აპირებდა. 2024 წლის ივნისში გახდა ცნობილი, რომ სამი ნაცვლად კომპანია ოთხი ჰესის მშენებლობას გეგმავს, თანაც ჰესების სიმძლავრე 6 მეგევატიდან 30 მეგავატამდე გაზარდა. სწორედ ამ ცვლილებას მოყვა სოფელში დიდი უკმაყოფილება და გასულ კვირაში ადგილობრივების აქცია.
აქციის მონაწილეების ერთმა ნაწილმა თავისი სათქმელი პირდაპირ გაახმოვანა გურიის გუბერნატორთან და ოზურგეთის მუნიციპალიტეტის მერთან, ახლა კი ითხოვენ, შეხვდნენ „პარვუს ჯგუფის“ წარმომადგენლებს.
ავტორი
