ვიქტორ წილოსანი – თბილისის ტრანსპორტისა და ურბანული განვითარების სამსახურის უფროსი
ირაკლი თავართქილაძე – ქონების მართვის სააგენტოს უფროსი
თეიმურაზ ბოლოთაშვილი – თბილისის არქიტექტურის სამსახურის ხელმძღვანელი
ირაკლი ხმალაძე – ვიცე მერი
დავით ფაჩულია – თბილსერვის ჯგუფის ხელმძღვანელი.
ეს თბილისის მერიის ის მაღალჩინოსნები არიან, რომელთა გათავისუფლების პროცესიც მიმდინარეობს. მთავარი არხის წყაროს ინფორმაციით, კალაძემ საკადრო წმენდა მას შემდეგ დაიწყო, რაც ტოტალური გაყალბების მიუხედავად ქართული ოცნება დედაქალაქში დამარცხდა.
არაერთი წყარო, მათ შორის საჯაროც, ადასტურებს, რომ თანამდებობა უკვე დაატოვებინეს ვიქტორ წილოსანს, ჩინოვნიკს რომელიც კახა კალაძის ახლო გარემოცვის წევრია და მერიაში ტრანსპორტისა და ურბანული განვითარების სამსახურის უფროსის პოსტს 4 წელი იკავებდა.
წილოსანმა დედაქალაქის მოქალაქეებს თავი სატრანსპორტო რეფორმებით დაამახსოვრა. საცობებისგან გადატვირთული ქუჩების განმუხტვა სწორედ მას ებარა.
მერიის ინიციატივებიდან ერთ-ერთი პირველი, რაც ყველას ახსენდება, მეტროში შექმნილი კოლაფსის განსამუხტად დაყენებული რიგის მომწესრიგებლებია. ვიქტორ წილოსანი ორი წლის წინ განმარტავდა, რომ ზოგიერთ მეტროსადგურში საცობს მგზავრები ქმნიან, რადგან ზოლში არ მოძრაობენ და რიგის დაცვის პრობლემაა.
მერიაში არსებულ კორუფციაზე ოპოზიცია და ექსპერტები წლებია საუბრობენ და კონკრეტულ მაგალითებსაც უთითებენ, თუმცა ამ მიზეზით სამსახურიდან არავინ გაუშვიათ. კითხვებს აჩენს, ვინ და რატომ დაიწყო იმ პირების საკადრო წმენდა, რომლებიც დედაქალაქის მერის ახლო გარემოცვას წარმოადგენენ.
როგორც ირკვევა, შიდა არეულობა მერიაში 26 ოქტომბრის შემდეგ დაიწყო. ერთმანეთისგან დამოუკიდებელი რამდენიმე წყარო გვიყვება, რომ მერიის თანამშრომლების დიდმა ნაწილმა არჩევნებზე მხარი ოპოზიციას დაუჭირა, პრობლემა იყო ისიც , რომ ამ სტრუქტურიდან ბევრი გაზაფხულზე მიმდინარე აქციებშიც აქტიურად მონაწილეობდა.
წყარო მერიიდან გვიყვება იმასაც, რომ მარცხის შემდეგ კახა კალაძემ დეპარტამენტის ხელმძღვანელები დაიბარა და უსაყვედურა. წყაროს ინფორმაციითვე, განსაკუთრებული პრეტენზია მერს თბილისის არქიტექტურის სამსახურთან ჰქონდა, რადგან ამ დეპარტამენტის თანამშრომელთა დიდმა ნაწილმა ხმა ოპოზიციას მისცა. ამავე წყაროს ინფორმაციით, კალაძეს სპეციალური სია ქონდა სადაც იმ “ურჩი თანამშრომლების” გვარები ეწერა ვინც 26 ოქტომბერს ქართული ოცნება არ გააფერადა. ინფორმირებული პირი მერიიდან გვიმტკიცებს რომ არქიტექტურის სამსახურის უფროსი – თეიმურაზ ბოლოთაშვილი სწორედ ამას შეეწირა.
მერიის შიგნით და უკვე საჯაროდაც აქტიურად საუბრობენ, რომ თანამდებობას, სავარაუდოდ, დეკემბერში დატოვებს ვიცე- მერი ირაკლი ხმალაძეც. სხვადასხვა წყარო გვიმტკიცებს რომ ის ვალდებული იქნება განცხადება თავად დაწეროს. ირაკლი ხმალაძის მიმართ შეკითხვები აქამდეც არაერთხელ დასმულა. ხელისუფლების ოპონენტები სულ ამტკიცებენ რომ კალაძის მარჯვენა ხელი ყველა იმ საქმის ფიგურანტია რომლის არაოფიციალური გამოძიებაც სუსში მიმდინარეობს.
თბილისის მერიაში საკადრო ცვლილებები განხორციელდება. კახა კალაძის განცხადებით, ტრანსპორტისა და ურბანული განვითარების სააგენტოს ხელმძღვანელის პოსტზე ვიქტორ წილოსანს ნინო ბაგაშვილი შეცვლის, ხოლო მერიის ქონების მართვის სააგენტოს უფროსის თანამდებობაზე ირაკლი თავართქილაძეს მარიამ კვერნაძე ჩაანაცვლებს.
კალაძემ მედიაში გავრცელებულ ინფორმაციებს ტრადიციულად “სიცრუის პროპაგანდა” უწოდა და აღნიშნა, რომ ვიქტორ წილოსანი კერძო სექტორში აპირებს გადასვლას.
ბევრი არასწორი ინფორმაცია და ტყუილით გაჯერებული განცხადება მოვისმინეთ იმ ტელევიზიებიდან, რომლებიც დაკავებულები არიან სიცრუის პროპაგანდით. რაც შეეხება რეალობას, ტრანსპორტისა და ურბანული განვითარების სააგენტოს ბოლო წლებში ხელმძღვანელობდა ვიქტორ წილოსანი, რომელმაც ორივე მიმართულებით, მნიშვნელოვანი წვლილი შეიტანა ქალაქისთვის სასიკეთო გადაწყვეტილებების მიღებაში. მისი მართვის პერიოდში მოხერხდა ტრანსპორტისა და ურბანული პოლიტიკის მიმართულებით ბევრი სიახლის დანერგვა. ჩვენ ერთად დავიწყეთ იმ რეფორმების განხორციელება, რომელიც ერთობ მნიშვნელოვანია ჩვენი ქალაქისთვის, ერთად მოგვიწია საკმაოდ მძიმე გადაწყვეტილებების მიღება, თუმცა კარგად გვესმოდა და გვესმის, რამდენად მნიშვნელოვანია ამ პროექტების განხორციელება იმისთვის, რომ ჩვენი ქალაქი იყოს ევროპული, მოწესრიგებული და გამართული. ვიქტორ წილოსანის როლი ამ ყველაფრისთვის მნიშვნელოვანი იყო. მისი საქმიანობა ნაყოფიერი და სასარგებლო იყო თბილისისთვის. ის კერძო სექტორში აპირებს გადასვლას. მინდა, მადლობა გადავუხადო და წარმატებები ვუსურვო მას“, – განაცხადა კახა კალაძემ მერიის მთავრობის სხდომაზე.
რაც შეეხება ირაკლი თავართქილაძეს. კალაძის თქმით, ის საქმიანობას მუნიციპალურ სერვისებში გააგრძელებს.
„მისი მართვის პირობებში სააგენტომ წარმატებით იმუშავა წლობით გადაუჭრელი პრობლემების მოგვარებაზე. მათ შორისაა საცხოვრებლების დაკანონების პროექტი, ასევე კოოპერატიული ბინათმშენებლობებით დაზარალებულთა დაკმაყოფილების საკითხი. პრაქტიკულად, ბოლოშია გასული ორივე პროექტი. ასევე ირაკლის დამსახურებაა, რომ ათეულობით წლობით დაგროვილი პრობლემების გადაჭრა დავიწყეთ, უამრავი ოჯახი დავაკმაყოფილეთ. ირაკლი თავართქილაძე მუნიციპალურ სერვისებში გააგრძელებს საქმიანობას და მინდა, წარმატებები ვუსურვო მას“, – განაცხადა კახა კალაძემ.
