გასული კვირის ბოლოს “ლელოს” გენერალურმა მდივანმა ირაკლი კუპრაძემ განაცხადა, რომ დანაშაულია, ამ არჩევნების ადგილობრივ არჩევნებად იდენტიფიცირება. მისი თქმით, “4 ოქტომბერი არის დე ფაქტო ხელისუფლების წინააღმდეგ დე ფაქტო არჩევნებში ბრძოლა” და რომ “კოალიცია “ძლიერი საქართველო” ოფიციალურად და დეკლარირებულად იწყებს ბრძოლას საქართველოს თითოეული მოქალაქისთვის, თითოეული ადამიანის უფლებისთვის, თითოეული ახალგაზრდის მომავლისთვის და თითეული ხანდაზმულის კეთილდღეობისთვის _ ჩვენ შევდივართ ბრძოლაში. ჩვენ შევდივართ დიქტატურის და რუსული რეჟიმის წინააღმდეგ კიდევ ერთ წინააღმდეგობაში!”
“ლელო – ძლიერი საქართველოს” ამ გადაწყვეტილებას აკრიტიკებენ ის პარტიები, რომლებმაც თვითმმართველობის არჩევნებში მონაწილეობაზე უარი დაადასტურეს. “საერთო ბრძოლის ღალატი” _ ასე აფასებენ “ნაციონალურ მოძრაობაში” კოალიციის მიერ გაცხადებულ გეგმას. “დროას” ლიდერმა ელენე ხოშტარიამ კი დაწერა, რომ “4%-იანი “ლელო” რას იზამს, ნამდვილად არ განსაზღვრავს საქართველოს ბედს”.
“ლელოს” მისამართით კრიტიკულები არიან გურული ნაციონალებიც.
“მიიღებ ე.წ. არჩევნებში მონაწილეობას? მაინც მაშველი რგოლი გამოდიხარ ლეგიტიმაციის კუთხით“, _ დაწერა “ერთიანი ნაციონალური მოძრაობის” ლანჩხუთელმა ლიდერმა კახა ასკურავამ.
ლანჩხუთის საკრებულოს წევრი “ნაციონალური მოძრაობიდან”, გივი ცინცაძე ირონიულად ეხმაურება “ლელო საქართველოსთვის” გადაწყვეტილებას ადგილობრივი თვითმმართველობის არჩევნებში მონაწილეობის თაობაზე:
“გადავწყვიტე, ვირჩევ “ლელოს” თბილისის გამოსაგლეჯად“, _ წერს ლანჩხუთელი “ნაციონალების” ერთ-ერთი ლიდერი და ამით ის დასცინის იმ განცხადებას, რომლის მიხედვითაც “გაერთიანებულ ოპოზიციას შეუძლია “ოცნებას” თბილისი გამოგლიჯოს”.
“სამარცხვინოები და ოლიგარქის “გამპრავებლები“. თქვენ რომ ბიძინას რამეს გამოგლეჯთ, ის თქვენთვის დაიტოვეთ, დაგჭირდებათ 5 ოქტომბრის შემდეგ“, _ ასე გამოეხმაურა “ლელოს” განცხადებას ენმ-ის ოზურგეთის ორგანიზაციის ხელმძღვანელი დავით მჟავანაძე.
“ლელოს” ზემოთ ნახსენებ გადაწყვეტილებას კრიტიკა მოჰყვა რიგი პოლიტიკურად აქტიური მოქალაქეების მხრიდან.
ემიგრაციაში მყოფი ლანჩხუთელი ჟურნალისტი ლალი იმედაიშვილი სოციალურ ქსელში ეხმაურება “ლელო საქართველოსთვის” გადაწყვეტილებას ადგილობრივ თვითმმართველობის არჩევნებში მონაწილეობის შესახებ:
“ქოცებო, რა მაინტერესებს, თუ იცით? მამუკა ხაზარაძე ისევლე მევახშეა თუ გადაგველმოქმედდა?”
ირონიულია ლანჩხუთელი ახალგაზრდა აქტივისტის, ჟურნალისტ გიორგი მორჩილაძის გამოხმაურება: “მივიღე გადაწყვეტილება მონაწილეობა მივიღო თვითმმართველობის არჩევნებში და ბიძინას გამოვგლიჯო სოფელი ინტაბუეთი.
ინტაბუეთი და თბილისი უკვე ჩვენია, დანარჩენი სხვებმა გამოგლიჯეთ“, _ დაწერა მორჩილაძემ სოციალურ ქსელში.
გურული სამოქალაქო აქტივისტი და ანტისამთავრობო აქციების მონაწილე, მასწავლებელი ირმა გორდელაძეც ეხმაურება “ლელო – ძლიერი საქართველოს” გადაწყვეტილებას ადგილობრივ თვითმმართველობის არჩევნებში მონაწილეობასთან დაკავშირებით.
“აწი გინდ შეით და გინდ გამოით. “ლელო” ბურთს რომ დეიჭერთ, ხელი მაგრად მუუჭირეთ“, _ დაწერა გორდელაძემ სოციალურ ქსელში.
მოკლედ, ოპოზიციურად განწყობილი საზოგადოების ერთი ნაწილიც მიიჩნევს, რომ არჩევნების მონაწილეობით “ლელო” ლეგიტიმაციას აძლევს ამ ხელისუფლებას. მეორე ნაწილი კი მიიჩნევს, რომ ბრძოლის ერთ-ერთი ველი თვითმმართველობის არჩევნებია _ “ქუჩაში სიარულმა მოიტანა რამე? იქნებ დავფიქრდეთ”.
“თავის დროზე სააკაშვილის მიერ, თბილისში ადგილობრივი არჩევნების მოგებით დაიწყო შევარდნაძის რეჟიმის დემონტაჟი, რომელიც საბოლოოდ ვარდების რევოლუციით დასრულდა“, _ ასე გამოეხმაურა “ლელოს” მისამართით გაჟღერებულ კრიტიკას მოქალაქე, რომელიც სოციალურ ქსელში სიმონა დოლიძის სახელით ფიქსირდება.
საზოგადოების ძირითადი ნაწილის დაკვეთა კი კვლავაც ერთიანობაა, იქნება ბოიკოტი თუ არჩევნებში მონაწილეობა. მათი თქმით, ოპოზიციას ერთიანი სამოქმედო გეგმა და პოზიცია უნდა გააჩნდეს ბოიკოტზე ან თვითმმართველობის არჩევნებზე მონაწილეობისთვის.
უნდა ითქვას, რომ ერთიანობის მნიშვნელობაზე აქცენტს “ლელოც” აკეთებს.
“ვინაიდან მეორე მხარეს მყოფი პოლიტიკური პარტიები ბოიკოტის მომხრენი არიან, ვამბობდით, რომ 64 მუნიციპალიტეტიდან 63-ში გავსულიყავით ბოიკოტში და ერთი, რომელიც არის თბილისი, ყველაზე დიდი და ყველაზე მნიშვნელოვანი ამ თვალსაზრისით, აქ გვებრძოლა, სადაც 26 ოქტომბრის არჩევნების ოფიციალური შედეგებითაც კი მოიგო ოთხმა კოალიციამ. ჩვენთვის იმდენად მნიშვნელოვანი იყო შემდგარიყო ერთობა, რომ მზად ვიყავით დაგვეთმო ჩვენი პარტიული იდენტობაც კი“, _ ამბობს “ლელოს” ერთ-ერთი ლიდერი გურიიდან გიორგი სიორიძე.
ავტორი
