სამოქალაქო საზოგადოების ორგანიზაციებმა ევროსაბჭოს მინისტრთა კომიტეტს ცინცაბაძის ჯგუფის საქმეებზე აღსრულების პროგრესზე კრიტიკული ანგარიში წარუდგინეს.
“ცინცაბაძის ჯგუფის საქმეები აერთიანებს ადამიანის უფლებათა ევროპული სასამართლოს (ECtHR) მიერ საქართველოს წინააღმდეგ მიღებულ 22 გადაწყვეტილებას, რომლებშიც სასამართლომ დადგინა სამართალდამცავი ორგანოების მიერ წამების აკრძალვის და სიცოცხლის უფლების დარღვევა, აგრეთვე, ამავე საქმეების არაეფექტიანი გამოძიება. აღსანიშნავია, რომ საქმეთა ეს ჯგუფი კომიტეტის გაძლიერებულ ზედამხედველობას ექვემდებარება, რაც გულისხმობს კომიტეტის მიერ ყოველწლიურად წამების პრევენციის მიმართულებით არსებული მდგომარეობის გაუმჯობესების მიზნით სახელმწიფოს მიერ განხორციელებული ღონისძიებების შეფასებას ადამიანის უფლებათა სხდომებზე.
კომიტეტისთვის წარდგენილ დოკუმენტში მწვავედ არის გაკრიტიკებული საქართველოში 2025 წლის განმავლობაში არასათანადო მოპყრობის პრევენციის და გამოძიების მიმართულებით არსებული მდგომარეობა და ხელისუფლების მიერ მინისტრთა კომიტეტის მიერ აქამდე გაცემული რეკომენდაციების განგრძობითი უგულებელყოფა. კერძოდ, ანგარიშში ყურადღებას ვამახვილებთ შემდეგ საკითხებზე:
ანგარიშის ბოლოს, საქართველოში არსებული უმწვავესი ადამიანის უფლებათა კრიზისის გათვალისწინებით, მინისტრთა კომიტეტს მივმართავთ, თავის შეფასებაში განსაზღვროს რიგი საკანონმდებლო და პრაქტიკული ღონისძიებები, რათა საქართველოში წამების და არასათანადო მოპყრობის სხვა ფორმების პრევენციის მიმართულებით არსებული მდგომარობა გაუმჯობესდეს.
ევროსაბჭოს მინისტრთა კომიტეტი ცინცაბაძის ჯგუფის საქმეებზე არსებულ მდგომარეობას მიმდინარე წლის 9-11 მარტს დაგეგმილი ადამიანის უფლებათა სხდომის ფარგლებში შეაფასებს და ვიმედოვნებთ, რომ კომიტეტი ჩვენს მოთხოვნებს გაიზიარებს.
სამოქალაქო საზოგადოების ორგანიზაციები გავაგრძელებთ საქართველოში წამების და არასათანადო მოპყრობის პრევენციის მიმართულებით აქტიურ მუშაობას და ევროპის საბჭოს მინისტრთა კომიტეტისთვის განახლებული ინფორმაციის წარდგენას.
2026 წლის 23 იანვარს, სოციალური სამართლიანობის ცენტრმა, საქართველოს ახალგაზრდა იურისტთა ასოციაციამ (საია) და ადამიანის უფლებების ადვოკატირების ევროპულმა ცენტრმა (EHRAC) ევროსაბჭოს მინისტრთა კომიტეტს ცინცაბაძის ჯგუფის საქმეების აღსრულების პროგრესის თაობაზე წერილობითი მოსაზრებები წარუდგინეს.
– საქართველოში სამართალდამცავი ორგანოების მიერ ძალადობის და არასათანადო მოპყრობის პრაქტიკის და ხელისუფლების უმაღლესი პირების მიერ ამგვარი ქმედებების წახალისების სისტემური პრობლემები;
– საქართველოს კანონმდებლობაში არსებულ სისტემურ ხარვეზებზე, რომლებიც ხელს უწყობს არასათანადო მოპყრობის პრაქტიკების განგრძობად არსებობა;
– სპეციალური საგამოძიებო სამსახურის გაუქმება და ბოლო წლებში მშვიდობიანი დემონსტრანტების მიმართ საპოლიციო ძალადობის, წამების და არასათანადო მოპყრობის სხვა ფორმების ფუნდამენტურად ხარვეზიანი გამოძიების პროცესი;
– 2024 წლის საპროტესტო აქციების დაშლისას, დემონსტრანტების წინააღმდეგ სპეციალური საშუალებების გამოყენების წესების დარღვევა და მომწამვლელი ქიმიური ნივთიერებების სავარაუდო გამოყენება, ისევე როგორც ამ საკითხის ირგვლივ ეფექტიანი გამოძიების ჩატარების ნაცვლად, ხელისუფლების მიერ BBC-ის საგამოძიებო ფილმთან დაკავშირებული გამოძიების დაწყება;
ხელისუფლების მიერ იმ სამოქალაქო ორგანიზაციების დევნა, რეპრესირება და მადისკრედიტებელი დეზინფორმაციული კამპანიები, რომლებიც წამების პრევენციის მიმართულებით მსხვერპლებს უფასო იურიდიულ და სხვა სახის მხარდაჭერას უწევენ”,_ აცხადებენ სამოქალაქო ორგანიზაციები.
