უკრაინაში, 2 ივნისს რუსეთის მასშტაბური თავდასხმის შედეგად ათი ადამიანი დაიღუპა და დაახლოებით 100 დაშავდა.
Ukrinform-ის ცნობით, ამის შესახებ უკრაინის რესტავრაციის საკითხებში ვიცე-პრემიერმა და თემებისა და ტერიტორიების განვითარების მინისტრმა ალექსეი კულებამ Telegram-ზე გამოქვეყნებულ პოსტში განაცხადა.
„ღამის განმავლობაში რუსეთმა უკრაინაზე მასშტაბური დარტყმა განახორციელა, რომლისთვისაც დიდი ხნის განმავლობაში ემზადებოდა. მტერმა დაახლოებით 80 სხვადასხვა ტიპის რაკეტა და 600-ზე მეტი დრონი ისროლა. ათი ადამიანი დაიღუპა“, – თქვა კულებამ.
მისი თქმით, მთავარი სამიზნე უკრაინის დედაქალაქი იყო, დარტყმები კიევის თითქმის ყველა რაიონში დაფიქსირდა.
კიევში ოთხი ადამიანი დაიღუპა. 50-ზე მეტი ადამიანი დაშავდა, მათ შორის ბავშვები. დაზიანდა საცხოვრებელი შენობები, კლინიკა და სამოქალაქო ინფრასტრუქტურის ობიექტები.
ასევე თავდასხმის ქვეშ მოექცნენ ხარკოვის, დნეპროპეტროვსკის, ოდესის ოლქები და სხვა რეგიონები.
დნეპროპეტროვსკის რეგიონში ექვსი ადამიანი დაიღუპა და 36 დაშავდა, მათ შორის ბავშვები. საცხოვრებელი შენობები, საწარმოები და საზოგადოებრივი ობიექტები განადგურდა ან დაზიანდა.
ოდესის რეგიონში რუსეთის ძალებმა საავადმყოფო და სამშობიარო განყოფილება დაბომბეს. თავდასხმის დროს შიგნით ახალშობილებთან ერთად დედები იმყოფებოდნენ, თუმცა დაშავებულების შესახებ ინფორმაცია არ ვრცელდება.
„რუსეთი კიდევ ერთხელ განზრახ ესხმის თავს სამოქალაქო ინფრასტრუქტურას, საცხოვრებელ უბნებს, საავადმყოფოებს და სამხედრო მნიშვნელობის არმქონე ობიექტებს“, – განაცხადა კულებამ.
ადგილზე მუშაობს ყველა საგანგებო სამსახური, ადგილობრივი ხელისუფლება და მუნიციპალური სამსახური, რომლებიც დახმარებას უწევენ დაზარალებულებს და აფიქსირებენ ზარალს.
უკრაინის საჰაერო თავდაცვის ძალებმა 1 ივნისის საღამოდან რუსეთის ძალების მიერ გაშვებული 40 რაკეტა და 602 დრონი გაანეიტრალეს.
