არჩილ თალაკვაძემ აშშ-ის სახელმწიფო დეპარტამენტის განცხადება შეაფასა. მისი თქმით, ნებისმიერი პოლიტიკური განცხადება, რომელიც კეთდება კონგრესმენებისა თუ ევროპარლამენტარების მხრიდან კეთდება, მიღებულია როგორც მეგობრების პოზიცია. პარლამენტის თავმჯდომარემ აღნიშნა ისიც, რომ ამ შემთხვევაში, უკვე არსებობს დამატებითი კომუნიკაცია დასავლელ პარტნიორებთან.
„თუ უნდა გავაკეთო შეფასება ჩვენი სტრატეგიული პარტნიორის დამოკიდებულებასა და მის ხედვაზე საქართველოში დღეს არსებულ სიტუაციასთან დაკავშირებით, ვიხელმძღვანელებდი, პირველ რიგში, ოფიციალური ვაშინგტონის განცხადებით, რომელიც გუშინ გამოქვეყნდა და სადაც ვხედავთ მხარდაჭერას საქართველოს სახელმწიფოს მიმართ. თუ ვართ ის პოლიტიკოსები, ვისაც გვაინტერესებს საქართველო და ჩვენი ქვეყნის ინტერესები, მაშინ, ამ გადმოსახედიდან უნდა ვიმსჯელოთ და გულწრფელად გითხრათ, რომ ჩემთვის, პირველ რიგში, მნიშვნელოვანი არის, რომ ამერიკა მხარს უჭერს საქართველოს. ამ განცხადებაში არის საქართველოს მიმართ მხარდაჭერა, აქ არის ასევე, ძალიან კონკრეტული წინადადებები, სადაც ნათქვამია, რომ ამერიკის შეერთებული შტატები გააგრძელებს საქართველოსთან მუშაობას კანონის უზენაესობის და ანგარიშვალდებული ინსტიტუტების ხელშესაწყობად. ეს არის სწორედ ის, რაც მომავალში გვაქვს ჩვენ გასაკეთებელი”,_ განაცხადა თალაკვაძემ.
მისივე თქმით, საზოგადოებას ახსოვს ბევრად მკაცრი კრიტიკა საქართველოს მიმართ წინა ადმინისტრაციის პირობებში. აშშ-ის სახელმწიფო დეპარტამენტის განცხადებაზე საუბრისას, პარლამენტის თავმჯდომარემ ასევე განაცხადა, რომ ეს ნიშნავს იმას, რომ სამუშაო არ არის დასრულებული.
„ეს სამუშაო გრძელდება. მსოფლიოში არსად არ არსებობს სრულყოფილი პროკურატურა, სასამართლო სისტემა, სრულყოფილი ინსტიტუტები. ყველგან არის გაუმჯობესების რესურსი და ეს რესურსი არის საქართველოშიც”,_ განაცხადა თალაკვაძემ.
