“საქართველოში თავისუფალი, სამართლიანი და დემოკრატიული არჩევნები ჩატარდა. შეჯიბრი რეალურ პროგრამებს, ძლიერ კანდიდატებს და პარტიებს შორის ადგილობრივი თვითმმართველობის არჩევნებშიც გამოჩნდა” _ აღნიშნულია განცხადებაში, რომელსაც საპარლამენტო უმრავლესობის ლიდერი, ოზურგეტის მაჟორიტარი დეპუტატი არჩილ თალაკვაძე ავრცელებს.
თალაკვაძე მხარდამჭერებს მადლობას უხდის და აღნიშნავს, რომ როგორც არჩეული დეპუტატი მუშაობას გააგრძელებს ახლად არჩეულ მერთან:
“მადლობას ვუხდი პირველ რიგში ჩვენს მხარდამჭერებს, რადგან ქვეყნის მასშტაბით “ქართულმა ოცნებამ” მაღალი ნდობა მიიღო საზოგადოებისგან. მადლობას ვუხდი საარჩევნო ადმინისტრაციას, საერთაშორისო და ადგილობრივი სადამკვირვებლო მისიების წარმომადგენლებს, არასამთავრობო სექტორს და მედიას, კარგი გაშუქებისთვის.
მუნიციპალიტეტის მერის თანამდებობის დასაკავებლად, არჩევნების მეორე ტური ჩატარდა ოზურგეთშიც. ხალხმა საკუთარი არჩევანი გამოხატა. მიუხედავად იმისა, რომ საოლქო კომისია ერთ უბანთან დაკავშირებულ დავას განიხილავს, ჩემთვის საზოგადოების არჩევანი ნათელია და პატივს ვცემ ოზურგეთელების გადაწყვეტილებას. მე მზად ვარ გამარჯვებულს მივულოცო.
როგორც თქვენს მიერ არჩეული მაჟორიტარი დეპუტატი პარლამენტში, გავაგრძელებ მუშაობას ახლად არჩეულ მერთან, საკრებულოსთან, გუბერნატორთან, არასამთავრობო და კერძო სექტორთან, ასევე, მედიასთან ოზურგეთის მუნიციპალიტეტის მომავალი წარმატებისთვის!” _ აცხადებს თალაკვაძე.
