ბავშვთა ქორწინება ის საკითხია, რომელიც მსოფლიოს წინაშე კვლავ გამოწვევად რჩება.
როგორც გაეროში ამბობენ, ბავშვთა ქორწინება არის ეკონომიკური და სოციალური ძალების ურთიერთქმედების შედეგი და 18-წლამდე 650 მილიონი გოგონა ქორწინდება.
ადრეულ ასაკში დაქორწინება კი ბავშვობის შეწყვეტას და არაერთი სხვა პრობლემის წინაშე დადგომას ნიშნავს.
საქართველოს სახალხო დამცველის მონაცემებით, 2018 წელს მშობლად დარეგისტრირდა 715 არასრულწლოვანი დედა და 23 არასრულწლოვანი მამა.
2018 წელს, არასრულწლოვანთა ნაადრევ ქორწინებებთან დაკავშირებულ 180-მდე ფაქტზე დაიწყო გამოძიება.
შინაგან საქმეთა სამინისტროს მონაცემებით, საქართველოში რეგიონების მიხედვით დანაშაულის ჩადენის ადგილის მაჩვენებელი ასე გამოიყურება: ქვემო ქართლი _ 34%, აჭარა _ 18%, კახეთი _ 10%, სამეგრელო-ზემო სვანეთი _ 9%, იმერეთი _ 9%, თბილისი _ 7%, სამცხე-ჯავახეთი _ 5%, შიდა ქართლი _ 4%, გურია _ 3%, სხვა ტერიტორია _ 1%.
სამინისტროს ინფორმაციითვე, 12-14 წლის გოგონებში ნაადრევი ქორწინების სავარაუდო მსხვერპლია 16%, ხოლო 15-16 წლის გოგონებში _ 82%, 16 წელს ზემოთ კი ნაადრევი ქორწინების სავარაუდო მსხვერპლი 2 %-ია.
რაც შეეხება სავარაუდო დამნაშავეებს, რომლებიც არასრულწლოვნებთან ქორწინებასა და სქესობრივ კონტაქტში იმყოფებიან, ბრალდებულების უმეტესობა 18-დან 25 წლამდე ასაკის კაცების 63%-ია, 18 წლამდე ასაკის ბიჭების 11%, ასევე 25-26 წლის კაცების 26%.
საქართველოს სამოქალაქო კოდექსის თანახმად, საქორწინო ასაკად დაწესებულია 18 წელი, 18 წელს მიუღწეველი პირის დაქორწინებას კი კანონი კრძალავს და სისხლის სამართლის დანაშაულად მიიჩნევა.
შინაგან საქმეთა სამინისტრო ბავშვთა ნაადრევი ქორწინების ხელშემწყობი დანაშაულების აღმოფხვრისა და ამ საკითხზე საზოგადოების ცნობიერების ამაღლების, ასევე, აღნიშნული დანაშაულის შესახებ პოლიციისათვის დროული შეტყობინების მიზნით დაიწყო საინფორმაციო კამპანია, სახელწოდებით _ „ნუ წაართმევ ბავშვობას“.
გარდა იმისა, რომ ბავშვების დაქორწინება დანაშაულია, ბავშვთა უფლებების რა დარღვევასთან გვაქვს საქმე? _ ამ კითხვით „გურია ნიუსი“ „პარტნიორობა ადამიანის უფლებებისთვის“ ხელმძღვანელს, ანა არგანაშვილს დაუკავშირდა.
უფლებადამცველის თქმით, ბავშვთა ქორწინება საზოგადოებისთვის საფრთხეს წარმოადგენს და ბავშვების ყველა უფლება ირღვევა.
„ბავშვი და ქორწინება არის ერთმანეთთან შეუთავსებელი მცნებები და არა მხოლოდ ირღვევა უფლებები, არამედ სისხლის სამართლის დანაშაულია, შესაბამისად, არის საზოგადოებისთვის საფრთხის შემცველი. ბავშვთა უფლებების კონვენცია გვეუბნება, რომ, ფაქტობრივად, ეს მოვლენა, ანუ ბავშვთა ქორწინება შეუთავსებელია ბავშვის ისეთ ფუნდამენტურ უფლებებთან, როგორიც არის ბავშვის განვითარება, განათლების უფლება, ჯანმრთელობის დაცვის უფლება, დისკრიმინაციისგან დაცვის უფლება და თუნდაც, ბავშვისთვის თამაშის უფლება. შესაბამისად, არ რჩება უფლება, რომელიც არ ირღვევა. ამის საპირწონედ, მე ვერ გავიხსენებ ვერცერთ სიკეთეს, რომელიც შეიძლება ან ბავშვმა ან საზოგადოებამ მიიღოს ბავშვის ქორწინებისგან“, _ ამბობს არგანაშვილი.
თუმცა, ადრეულ ასაკში ქორწინება მხოლოდ შესაძლებლობების შეზღუდვა და უფლებადარღვევები როდია. ის ადრეულ ასაკში ორსულობასა და მშობიარობას ნიშნავს.
რა საფრთხის წინაშე დგება გოგონა, რომელიც ჯერ კიდევ თვითონაა ბავშვი და ბავშვის გაჩენას აპირებს, რა საფრთხე შეიძლება შეუქმნას ნაადრევმა ორსულობამ გოგონას _ამ საკითხებზე სასაუბროდ „გურია ნიუსი“ ორსულობისა და ჰემოსტაზის პათოლოგიის ცენტრის ხელმძღვანელს, მეან-გინეკოლოგს, დაკა კაპანაძეს დაუკავშირდა.
კაპანაძის თქმით, 18-წლამდე ასაკში დაორსულება საფრთხეს უქმნის, როგორც დედას, ასევე, ბავშვს და ზრდის სიკვდილიანობის რისკს.
„ქორწინება ადრეულ ასაკში ზრდის, როგორც დედათა, ასევე, ბავშვთა სიკვდილიანობის რისკს. 14-15-16 წლის გოგოს, რომელსაც მენსტრუალური ციკლი აქვს რეგულარული, ფიზიოლოგიურად შეუძლია ბავშვის გაჩენა, მაგრამ რა შედეგს მივიღებთ ასაკის მატებასთან ერთად ასეთი ადრეული მშობიარობის შედეგად ეს უკვე სხვა საკითხია. 18 წლამდე მიუღწეველი გოგონას ორსულობა აუარესებს პენიტოლოგიურ და სამეანო შედეგს. შესაძლებელია, სხვადასხვა სამეანო გართულებები, პრე-ეკლამფსია, ნაადრევი მშობიარობა და ასე შემდეგ“, _ ამბობს კაპანაძე.
კაპანაძის თქმით, გარდა ამისა, მცირეწლოვანი გოგონები ნაკლებად ფლობენ ინფორმაციას ორსულობის გართულების ნიშნების შესახებ, არ თვლიან აუცილებლად ექიმთან ვიზიტებს ორსულობის პერიოდში, რაც კიდევ უფრო მეტი რისკის ქვეშ აყენებს დედისა და ნაყოფის ჯანმრთელობას.
