ოზურგეთის მუნიციპალიტეტის საკრებულოს წევრი, “ნაციონალური მოძრაობიდან” ბესო ქათამაძე, რომელიც გუშინ, “ქართული ოცნების” წევრებმა საკრებულოს შენობაში სცემეს, სამართალდამცველებმა დღეს დაკითხეს.
ქათამაძე ამბობს, რომ “ოცნების” დეპუტატებს მათი დანაშაულის სხვისთვის გადაბრალება სურთ:
“ქართული ოცნების” დეპუტატებმა ჩვენება მისცეს, რომ იმ ოთახში, სადაც ლანჩრულად, უკნიდან მოპარვით თავში დამარტყეს და მცემეს, მათთან ერთად ლიხაურის მაჟორიტარი დეპუტატი, გიორგი თოიძეც იმყოფებოდა.
ვერ გეტყვით, რატომ დაადეს ხელი თანაგუნდელს, თუმცა დაზუსტებით შემიძლიათ გითხრათ, რომ ის, იმ ოთახში არ ყოფილა.
მიუხედავად იმისა, რომ თოიძე ჩემი ოპონენტია და “ქართულ ოცნებას” წარმოადგენს, მე ხელს ვერ დავადებ უდანაშაულო ადამიანს.
ის არ იყო ოთახში და არც ჩემს ცემაში მოუღია მონაწილეობა“, _ გვითხრა ქათამაძემ.
მისივე თქმით, მის ცემაში მონაწილეობა ქართული ოცნების წევრებმა: გელა ჩავლეშვილი, გელა აროშიძემ, გოჩა კილაძემ, გია ჩაგანავამ და დავით ჭაკნელიძემ მიიღეს.
_ ოთახში ასევე იმყოფებოდა გურიის გუბერნიის თანამშრომელი ნესტრორ რამიშვილი, _ გვითხრა ქათამაძემ, რომელიც ყველა იმ ადამიანის დასჯას ითხოვს, რომლებმაც დანაშაული ჩაიდინეს.
_ ჩემთვის მთავარია სიმართლე დადგინდეს და დამნაშავეებმა პასუხი აგონ, _ აღნიშნა ქათამაძემ.
ჩვენ შევეცადეთ დეტალები გიორგი თოიძესთან გაგვერკვია და მისგან გაგვეგო იმყოფებოდა თუ არა დაკითხვაზე, თუმცა, მან ჩვენ სატელეფონო ზარებს არ უპასუხა.
ზარებს ასევე არ პასუხობენ ქათამაძის მიერ დასახელებული ინციდენტში მონაწილე პირები.
შეგახსენებთ, რომ ბესო ქათამაძის ცემის ფაქტზე სისხლის სამართლის საქმე გუშინ აღიძრა და ერთი პირი უკვე პასუხისგებაშა მიცემული:
“მიმდინარე წლის 15 ივნისს შინაგან საქმეთა სამინისტროს გურიის პოლიციის დეპარტამენტში გამოძიება ოზურგეთის საკრებულოს “ნაციონალური მოძრაობის” დეპუტატ ბესო ქათამაძის ცემის ფაქტზე, საქართველოს სსკ-ს 126-ე მუხლის 1-ლი ნაწილით დაიწყო, რაც ცემას ან სხვაგვარ ძალადობას გულისხმობს.
გამოძიებით დადგინდა, რომ ოზურგეთის საკრებულოს შენობაში დეპუტატ ბესო ქათამაძეს სიტყვიერი და ფიზიკური შეურაცხყოფა მიაყენეს, რის შედეგადაც მან თავის არეში დაზიანება მიიღო.
ექიმების განმარტებით, დაშავებული დეპუტატის ჯანმრთელობის მდგომარეობა დამაკმაყოფილებელია, იგი მკურნალობას საავადმყოფოში გადის.
გამოძიების ფარგლებში, გამოიკითხნენ ინციდენტის მონაწილეები და თვითმხილველები. ჩატარებული ოპერატიულ-საგამოძიებო მოქმედებების შედეგად, გამოვლინდა და ბრალი წარედგინა ინციდენტში მონაწილე პირს – ოზურგეთის საკრებულოს დეპუტატს „ქართული ოცნებიდან“ ტარიელ აროშიძეს.
საქმესთან დაკავშირებით ინტენსიური საგამოძიებო მოქმედებები გრძელდება”, _ აღნიშნავენ შინაგან საქმეთა სამინისტროში.
ამავე თემაზე: ხელჩართული ჩხუბი გურიის გუბერნიასთან _ დაკავებულია რამდენიმე ადამიანი
“ქართული ოცნება” ბესო ქათამაძის ცემის ფაქტს განცხადებით ეხმაურება _ “არ აჰყვეთ პროვოკაციას”
ბესო ქათამაძეს საქმე გაურჩიეს _ „ნაციონალ“ დეპუტატს თავში ჩაარტყეს
ნაციონალების” დეპუტატი სტატუსის და “გურია ნიუსში” გამოქვეყნებული სტატიის გამო ” სცემეს
მოვითხოვ, დროულად იქნას გამოძიებული ჩემი შვილის საქმე _ ბესო ქათამაძის დედა
