22 აგვისტოს, ოზურგეთის მუნიციპალიტეტის საკრებულოს ბიუროს სხდომაზე სამი საკითხი წარმოადგინეს.
პირველ საკითხზე _ 2019 წლის ბიუჯეტის შესრულების მეორე კვარტლის ანგარიშზე, მიმოხილვა საფინანსო სამსახურის უფროსმა გია მამაკაიშვილმა გააკეთა.
მან თქვა, რომ ბიუჯეტის მეორე კვარტლის შემოსულობებმა 2018 წლის გარდამავალი ნაშთების გარეშე შეადგინა 17 797,4 ლარი, რაც წლიური გეგმის 54,04 %-ია, ხოლო გადასახდელების გეგმა დაზუსტების შემდეგ შეადგენს 40 341,5 ლარს. საკასო ხარჯებმა მეორე კვარტლის მდგომარეობით კი შეადგინა წლიური გეგმის 39,96% და ხაზი გაუსვა, რომ შემოსულობების გეგმის შესრულების მხრივ ჩავარდნააა სათამაშო ბიზნესის მოსაკრებელზე. თუმცა, ეს ბიუჯეტის შესრულებაზე გავლენას ვერ მოახდენს:
_ მიმდინარე ექვს თვეში შემოსულია 60 ათასი ლარი, ერთი მილიონის ნაცვლად. ვინც ამ სფეროში იყო დასაქმებული, ოზურგეთის ტერიტორიაზე აღარ გააგრძელეს ლიცენზირება და ამიტომ მოხდა ეს, _ თქვა გია მამაკაიშვილმა.
დეპუტატმა ლავრენტი ბიგვავამ დასვა კითხვები და თქვა, რომ თემა ძალიან მნიშვნელოვანია, რადგან ადგილობრივი მოსაკრებელი არის მათი საქმიანობის ანაბანა, ქვაკუთხედი და უნდა მოხდეს მეტი კორექტირება.
ლავრენტი ბიგვავამ და საკრებულოს თავმჯდომარის მოადგილემ გიორგი ღურჯუმელიძემ, ასევე, დასვეს კითხვები იმის თაობაზე, რომ ბიუჯეტის შესრულება კვარტალურად იყო დაგეგმილი და ეს უფრო კარგია იმისთვის, რომ ბიუჯეტის ანალიზი უფრო უკეთესი და გასაგები იქნება.
_ მე ცოტა “ჩალიჩი” დამჭირდება, მაგალითად, რომ გავიგო, რა მონაცემებიც აქ არის. მით უფრო, ვერ გაიგებს რიგითი მოქალაქე. ამიტომ არის საჭირო კვარტალური ანგარიშის წარმოდგენა, _ თქვეს მათ და მიუთითეს, რომ ყველა სფეროში ბიუჯეტის ხარჯები წარმოდგენილია წლიური გეგმის მიხედვით. მაგალითად, საგანმანათლებლო ღონისძიებების დაფინანსებამ შეადგინა 2 877,6 ლარი, რაზეც მითითებულია, რომ არის წლიური გეგმის 50,89%. სპორტული და კულტურული ობიექტების და ღონისძიებების დაფინანსებამ შეადგინა 2 182,9 ათასი ლარი, რაც არის წლიური გეგმის 51,32%. არადა, მიღებული იყო გადაწყვეტილება, რომ კვარტალური შედეგების მიხედვით იქნებოდა წარმოდგენილი ბიუჯეტის შესრულება, რომ უფრო გამჭვირვალე ყოფილიყო ყველაფერი, _ თქვა ბიგვავამ.
_ მიღებულია შენიშვნები. გავაკეთებთ, როგორც თქვენ გინდათ, _ თქვა გია მამაკაიშვილმა.
_ მე კი არ მინდა, საქმეს უნდა ასე, _ უპასუხა ლავრენტი ბიგვავამ.
ბიუროს წევრებმა აღნიშნეს, რომ აუცილებელია კვარტლის ანგარიში წარმოადგინონ კვარტლის გეგმასთან მიმართებაში, რომ საკრებულოს წევრისთვის და ნებისმიერი დაინტერესებული მოქალაქისთვის შესაძლებელი გახდეს სიღრმისეული ანალიზის გაკეთება. ეს შესაძლებლობას იძლევა შემდგომი ღონისძიებების განსასაზღვრადაც.
საბოლოოდ, ბიუროს გადაწყვეტილებით, 2019 წლის ბიუჯეტის მეორე კვარტლის ანგარიშის პროექტი საკრებულოს მორიგი სხდომის დღის წესრიგში შევიდა.
დეპუტატმა შოთა გოგიბერიძემ, ისევე, როგორც გასული წლის საკრებულოს სხდომებზე ითხოვდა, კვლავ მოითხოვა ვეტერანებისთვის დახმარება ერთჯერადი ფულადი პრემიის სახით:
_ ეს არის ნაომარი, მებრძოლი ხალხი, რომლებიც 20 ლარის ამარა არიან მიტოვებულები. აქ იგულისხმება ის მონაწილეები, რომლებსაც ვეტერანის მოწმობა არ აქვთ, თუმცა, იომეს, სისხლი დაღვარეს და 20 ლარის მიცემა სირცხვილია. რა გახდა 750 კაცის წელიწადში ერთხელ ასი ლარით დაჯილდოება? 75 ათასი ლარის ამბავია სულ. რეგიონის მუნიციპალიტეტებში, მაგალითად, ლანჩხუთში, როგორც ვიცი, ყოველთვიურად არის მათთვის გამოყოფილი თანხის გარკვეული რაოდენობა. დაზუსტებით არ ვიცი, მაგრამ თქვენ შეგიძლიათ, გადაამოწმოთ, _ მიმართა მან სხდომის მონაწილეებს.
გია მამაკაიშვილმა მაშინვე გადაამოწმა გოგიბერიძის ნათქვამი, რაც სიმართლე აღმოჩნდა _ ლანჩხუთში თითოეულ ვეტერანს თვეში 35 ლარის ოდენობით დანამატი ეძლევა.
_ აი, ყველა თვეში აქვთ დანამატი და მე ვამბობ, რომ წელიწადში ერთხელ მაინც დაეხმარეთ 100 ლარით. ოღონდ დაეხმარეთ და ჩემი წინადადებით გაკეთებულს ნუ დაარქმევთ _ ჩვენი, თქვენი გაკეთებული იყოს. ცოდვაა ის ხალხი, _ თქვა გოგიბერიძემ.
ბიუროს წევრებმა მიიღეს გადაწყვეტილება, რომ ამ საკითხს საკრებულოს სხდომაზე განიხილავენ და გამოთქვეს იმედი, საკითხი დადებითად გადაწყდება, რისთვისაც გოგიბერიძემ მათ მადლობა გადაუხადა.
