გუშინ, შეკვეთილში, „ბლექსი არენაზე“, ქართული ხალხური სიმღერის და ცეკვის სახელმწიფო ანსამბლმა „ერისიონმა“, განახლებული შოუ-პროგრამა _ „ქართული საგანძური“ წარმოადგინა. უამრავი მაყურებლის ემოცია, კონცერტის დაწყებამდე, უზარმაზარ მონიტორებზე წარმოდგენილმა განწყობის შესატყვისმა მესიჯებმა გააორკეცა: აკოცე“, „მოეფერე“, „ხელი გადახვიე“, „გაიცინე“.
ანსამბლმა სრულად წარმოადგინა განახლებული შოუ. თითოეული ცეკვის შემდეგ დარბაზში არ წყდებოდა ოვაციები.
განსაკუთრებით თავბრუდამხვევი იყო ფინალი და, შესაბამისად, კონცერტის დასრულების შემდეგ მაყურებელმა ასე გამოხატა თავისი განწყობა:
ბექა დოლიძე: რა კომენტარი გავაკეთო? აღფრთოვანებული ვარ. მინდა, რომ მთელმა მსოფლიომ ნახოს ზღაპრული ბლექსი არენა და აქ წარმოდგენილი კონცერტებიდან და ღონისძიებებიდან გაიგონ, უძველესი და მაღალი ქართული კულტურის შესახებ.
მაია სანიკიძე: აი, ისეთი განწყობა მაქვს: „სული საზღვრებს გადასცდება ფრენით“.
ნანა ბარქაია: იცით, რა მინდა ვთქვა? „ბლექსი არენა“ ეს არის მიზიდულობის ცენტრი ამ პატარა გურიაში და მე მინდა, გახდეს მთელი მსოფლიოს მიზიდულობის ცენტრი. ვხუმრობ რაღაცნაირი სიხარულით და შინაგანად ვიჯერებ, რომ ეს ასე იქნება. დიდებულია ეს ყველაფერი!
ნინო წიქორიძე: კარგა ხანია, ახლგაზრდული ასაკს და შესაბამისად, მხიარულების განცდას გადავცდი, თუმცა, რაც აქ ვნახე, მგონია, რომ ახალგაზრდობაში დავბრუნდი. პირველად ვარ აქ და აწი, სანამ შევძლებ, სულ ჩამოვალ, ისეთი ძლიერი შთაბეჭდილებით მივდივარ.
ზღვისპირეთის დამსვენებლები უახლოეს დღეებში კიდევ მრავალ კონცერტს ელიან „ბლექსი არენაზე“ .
