ჩოხატაურის მუნიციპალიტეტის ნიკო მარის სახელობის პირველ საჯარო სკოლაში მეთორმეტე კლასელებისთვის დღეს ბოლო ზარი დაირეკა.
სკოლის დამთავრების აღსანიშნი ღონისძიება ხელოვნების სასახლეში გაიმართა.
სკოლადამთავრებულებმა სხვადასხვა მუსიკალური და ქორეოგრაფიული ნომრები დადგეს, გაკვეთილის იმიტაცია ჩაატარეს.
ღონისძიების მიმდინარეობისას სიტყვით გამოვიდა ჩოხატაურის მუნიციპალიტეტის მერი დავით შარაშიძე.
შარაშიძემ სიტყვით გამოსვლა კურსდამთავრებულებისთვის, მშობლებისა და მასწავლებლებისთვის ბოდიშის მოხდით დაიწყო. ბოდიშის მიზეზი ის გახდა, რომ პირველი საჯარო სკოლის შენობის დემონტაჟი მიმდინარეობს, რაც დისკომფორტს ქმნის.
ამას გარდა, შარაშიძემ კურსდამთავრებულებს ცხოვრების ახალ ეტაპზე გადასვლა მიულოცა.
პირველი საჯარო სკოლის კურსდამთავრებული ლუკა ძნელაძე “გურია ნიუსთან” საუბარში ამბობს, რომ იმედი აქვს სამომავლოდ მშობლიურ მუნიციპალიტეტს გამოადგება.
“გვიხარია სკოლის დამთავრება და ყველას, ვინც სკოლაში სწავლა დაასრულა, ვულოცავთ. რაც შეეხება მოლოდინებს, იმედი მაქვს რომ მუნიციპალიტეტს გამოვადგებით”,_ გვითხრა ლუკა ძნელაძემ.
ღონისძიების დასასრულს “გურია ნიუსი” კლასის დამრიგებელსა და სპორტის მასწავლებელს მარინა სიხარულიძეს ესაუბრა.
“ჩემს სადამრიგებლოში 26 მოსწავლე იყო. მარტივი არ არის კლასის დამრიგებლად ყოფნა, მაგრამ შევძელით მეგობრები ვყოფილიყავით და 7 წელი ერთად სითბოსა და სიყვარულში გაგვეტარებინა. ვიმედოვნებ, წარმატებული სტუდენტები იქნებიან”,_ აღნიშნა ჩვენთან საუბრისას მარინა სიხარულიძემ.
