ჩოხატაურის მუნიციპალიტეტში დაგეგმილი მასშტაბური ინფრასტრუქტურული სამუშაოები, შესაძლოა, გაურკვეველი ვადით შეფერხდეს. მიზეზი მერიის მიერ გამოცხადებული ტენდერის უარყოფითი შედეგით დასრულებაა — სატენდერო კომისიამ პრეტენდენტს დისკვალიფიკაცია მისცა.
აღსანიშნავია, რომ მოცემულ ეტაპზე მერია არა უშუალოდ სამშენებლო სამუშაოებს, არამედ ექსპერტიზაგავლილი საპროექტო-სახარჯთაღრიცხვო დოკუმენტაციის მომზადებას შეისყიდდა. სწორედ ამ დოკუმენტაციის არარსებობა აფერხებს შემდგომში მშენებლობის პროცესის დაწყებას.
ჩოხატაურის მერიამ 20 აპრილს გამოაცხადა ელექტრონული ტენდერი აუქციონის გარეშე NAT260007913, რომელიც 18 სხვადასხვა პუნქტს მოიცავდა.
სამუშაოების საპროექტო დოკუმენტაცია შემდეგი ადმინისტრაციული ერთეულებისთვის უნდა მომზადებულიყო:
_ ხიდისთავის ადმინისტრაციულ ერთეულში, მ. კალანდაძის უბანში ღელის გასწორხაზოვნებისა და გაბიონის მოწყობის სამუშაოები;
_ ხიდისთავის ადმინისტრაციულ ერთეულში, რ. მიქაბერიძის უბანში რკ/ბეტონის მილისა და რკ/ბეტონის კიუეტისა(ცხაურით) და გრუნტის არხის მოწყობის სამუშაოები;
_ ხიდისთავის ადმინისტრაციულ ერთეულში, სოფელ ზენობანში რკ/ბეტონის კიუეტის მოწყობის (ცხაურით) სამუშაოები;
_ დიდი ვანის ადმინისტრაციულ ერთეულში სასაფლაოსთან მისასვლელ გზაზე ოთხკუთხა მილის მოწყობის სამუშაოები;
_ გორაბერეჟოულის ადმინისტრაციულ ერთეულში, ცენტრალურ გზაზე, სანიაღვრე სისტემის მოწყობის სამუშაოები;
_ შუაამაღლების ადმინისტრაციულ ერთეულში, ჯიბლაძე-ყაჭეიშვილის უბანში, გრუნტის არხისა(ცხაურით) და წყალგამტარი მილის მოწყობის სამუშაოები;
_ ამაღლების ადმინისტრაციულ ერთეულში, სოფელ სამებაშ, საბავშვო ბაღის მიმდებარედ სადრენაჟე სისტემის მოწყობის სამუშაოები;
_ ზომლეთის ადმინისტრაციულ ერთეულში, სოფელ ვანში, ლ. ჯაშის ეზოს, სახლის მიმდებარედ სადრენაჟე სისტემისა და კიუეტის მოწყობის სამუშაოები;
_ ბუკისციხის ადმინისტრაციულ ერთეულში, სასაფლაოსთან მისასვლელ გზაზე რკ/ბეტონის კედლის მოწყობის სამუშაოები;
_ გუთურის ადმინისტრაციულ ერთეულში, დ. გიორგაძის უბანში, ღელის კალაპოტის გასწორხაზოვნებისა და მილხიდის მოწყობის სამუშაოები;
_ დაბის ადმინისტრაციულ ერთეულში, ნ. მარის ქუჩაზე არსებული კიუეტების და მილების დემონტაჟისა და ახალი კიუეტების და მილების მონტაჟის სამუშაოები;
_ ბუკისციხე-დიდი ვანის დამაკავშირებელ ცენტრალურ გზაზე არსებული დაზიანებული ბეტონის ბლოკების ყრილდამჭერი კედლის აღდგენის სამუშაოები;
_ დიდი ვანის ადმინისტრაციულ ერთეულში, გაღმა დობიროში, ცხაურის, რკ/ბეტონის წყალგამტარი მილებისა და პორტალის მოწყობის სამუშაოები;
_ ნაბეღლავის ადმინისტრაციულ ერთეულში, სოფელ ქვაბღაში, ს. მამალაძისა და მ. დუმბაძის უბანში, გაბიონისა და რკ/ბეტონის მილის მოწყობის სამუშაოები;
_ ქვენობნის ადმინისტრაციულ ერთეულში, მ. შეშელიძის უბანში, ღელის გასწორხაზოვნებისა და რკ/ბეტონის მილის მოწყობის სამუშაოები;
_ ქვენობნის ადმინისტრაციულ ერთეულში, გოგიბერიძეების უბანში, რკ/ბეტონის მილისა და ღელის გასწორხაზოვნების სამუშაოები;
_ გუთურის ადმინისტრაციულ ერთეულში, გ. ტრაპაიძის უბანში, რკ/ბეტონის არხის მოწყობის სამუშაოები;
_ გუთურის ადმინისტრაციულ ერთეულში, გურგენიძის უბანში, რკ/ბეტონის არხის მოწყობა და დაზიანებული გზის სავალი ნაწილის აღდგენის სამუშაოების ექსპერტიზა გავლილი მომსახურების საპროექტო-სახარჯთაღიცხვო დოკუმენტაციის შესყიდვა.
წინადადების მიღება 26 აპრილს დაიწყო, 28 აპრილს კი შეწყდა. შესყიდვის სავარაუდო ღირებულება 15 500 ლარი იყო, თუმცა, ტენდერი უარყოფითი შედეგით დასრულდა.
5 მაისით დათარიღებულ სატენდერო კომისიის ოქმის თანახმად, პრეტენდენტის, კერძოდ, ინდივიდუალური მეწარმე დავითი ღვალაძეს მიერ არ არის წარმოდგენილი სატენდერო კომისიის მიერ მოთხოვნილი დოკუმენტაცია.
აქედან გამომდინარე სახელმწიფო შესყიდვების სააგენტოს თავმჯდომარის 2017 წლის 14 ივნისის #12 ბრძანებით დამტკიცებული „ელექტრონული ტენდერის ჩატარების წესის” 32-ე მუხლის პირველი პუნქტის „გ“ ქვეპუნქტის საფუძველზე, სატენდერო კომისია ახდენს პრეტენდენტის დისკვალიფიკაციას აღნიშნულ ტენდერზე ტექნიკური დოკუმენტაციის არდაზუსტების გამო. აღნიშნულ წინადადებას მხარი დაუჭირა კომისიის ყველა წევრმა.
Tendermonitor.ge-ს გვერდზე განთავსებული ინფორმაციის თანახმად, ინდივიდუალურ მეწარმე დავით ღვალაძეს მონაწილეობა სულ 10 ტენდერში აქვს მიღებული. აქედან 2 მოიგო, 1 არ შედგა, 4 მიმდინარეა, ხოლო 3 წააგო.
მოგებული ტენდერების საერთო სავარაუდო ღირებულება 8 760 ლარია. მოგებული კონტრაქტების საერთო რაოდენობა 4 974 ლარი. 1 გამარტივებული შესყიდვის ღირებულება კი 150 ლარს შეადგენს.
აღსანიშნავია, რომ ინდივიდუალურ მეწარმე დავით ღვალაძეს ჩოხატაურის მუნიციპალიტეტში მოგებული აქვს დაბაში წერეთლის ქუჩაზე მერიის მიმდებარე ტერიტორიაზე ჩოგბურთის კორტის ,,პადელი‘’-ს მოწყობის სამუშაოების ექსპერტიზა გავლილი საპროექტო-სახარჯთაღიცხვო დოკუმენტაციის შეძენა NAT260006317 სავარაუდო ღირებულებით 5 000 (ხუთიათასი) ლარი. ხელშეკრულებას, რომლის ჯამური ღირებულება შეადგენს 3 977 ლარს, ხელი 21 აპრილს მოეწერა და ძალაში 21 ივნისამდეა, ინდმეწარმეს კი მომსახურეობის გასაწევად ვადა 21 მაისამდე აქვს.
გარდა ამისა, ამავე ინდმეწარმესთან მიმდინარეობს ხელშეკრულების მომზადება სოფელ ქვაბღაში ცენტრალური გზიდან ზოტისკენ მიმავალი გზის მოწყობისა და სოფელ ქვაბღაში საჯარო სკოლის მიმდებარედ გზის გასწვრივ ლითონის ზღუდარის მოწყობის სამუშაოების და ჩოხატაურის მუნიციპალიტეტში, რუსთაველის ქ #4ა -ში მდებარე საცხოვრებელი კორპუსის სახურავის (წყალშემკრები ღარების, მილებისა და თოვლის დამჭერი კონსტრუქციის მოწყობა) მცირე რეაბილიტაციის სამუშაოები-ს საინჟინრო მომსახურების საპროექტო-სახარჯთაღიცხვო დოკუმენტაციის შეძენის ექსპერტიზა გავლილი საპროექტო-სახარჯთაღიცხვო დოკუმენტაციის შეძენის შესახებ გამოცხადებულ სახელმწიფო შესყიდვაზე NAT260007476.
აღნიშნული ტენდერი აუქციონის გარეშე ჩოხატაურის მუნიციპალიტეტის მერიამ 14 აპრილს გამოაცხადა. წინადადებების მიღება 20 აპრილს დაიწყო, ხოლო 22 აპრილს შეწყდა. შესყიდვის სავარაუდო ღირებულება 4 100 ლარს შეადგენდა.
როგორც სახელმწიფო შესყიდვების გვერდზეა მითითებული, საინჟინრო მომსახურების მიწოდება ხელშეკრულების გაფორმებიდან 30 კალენდარული დღის ვადაში უნდა გახორციელდეს.
ამ ეტაპზე უცნობია, როდის გამოაცხადებს ჩოხატაურის მერია ხელახალ ტენდერს 18 პუნქტიანი გეგმის განსახორციელებლად. ფაქტია, რომ საპროექტო სამუშაოების დაგვიანება პირდაპირ აისახება უშუალოდ სამშენებლო პროცესების დაწყების ვადებზე, რაც ადგილობრივი მოსახლეობისთვის კრიტიკულად მნიშვნელოვანია.
ავტორი
