საქართველოს პრემიერ-მინისტრის ინიციატივით ახალი პროგრამა იწყება, რომელიც ქვეყნის მასშტაბით 885 საბავშვო ბაღის მშენებლობა-რეაბილიტაციას ითვალისწინებს. კერძოდ: აშენდება 330 ახალი და რეაბილიტაცია ჩაუტარდება 555 არსებულ ბაღს.
აღსანიშნავია, რომ პირველი ეტაპის სამუშაოებისთვის 100 მილიონი ლარი 2023 წლის ბიუჯეტში უკვე გათვალისწინებულია.
სამშენებლო და სარეაბილიტაციო სამუშაოებს საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდი განახორციელებს, ტენდერები უახლოეს მომავალში გამოცხადდება.
რომელი ბაღების აშენება და რეაბილიტაცია იგეგმება ჩოხატაურში? ამის შესახებ ინფორმაციის მისაღებად ჩოხატაურის მუნიციპალიტეტის ეკონომიკისა და ქონების მართვის სამსახურის სპეციალისტს, ნოდარ ჟღენტს ვესაუბრეთ.
როგორც ჟღენტი ჩვენთან საუბრისას ამბობს, ჩოხატაურში 8 ახალი ბაღი აშენდება. აღნიშნული ბაღებიდან, წელს 4 ბაღის მშენებლობა იგეგმება.
“ჩოხატაურში 8 ახალი ბაღი აშენდება სოფლებში _ იანეული, გოგოლესუბანი, შუა ამაღლება, ვან-ზომლეთი, ქვენობანი, დაბლაციხე, გორაბერეჟოული და გუთური.
მშენებლობა დაიყოფა ეტაპებად. როგორც ვიცით, წელს 4 ახალი ბაღის აშენება იგეგმება. ეს ბაღები იქნება გუთურში, შუა ამაღლებაში, გოგოლესუბანში. სიაში შეტანილია ვან-ზომლეთიც, თუმცა, მიწის რეგისტრაციის კოდთან დაკავშირებით წარმოიშვა პრობლემა და შეიძლება, ჩანაცვლდეს სხვა რომელიმე სოფლის ბაღით. რაც შეეხება დანარჩენ საბავშვო ბაღებს, ყველა გარემონტდება.
შემოდგომაზე იყვნენ მუნიციპალური განვითარების ფონდიდან ჩამოსულები, ყველა ბაღი მოვიარეთ და აღვწერეთ. ახლა უკვე თვითონ გადაწყვეტენ რომელი ბაღის მშენებლობა დაიწყება პირველი და ა.შ.
სასურველია, რომ ყველგან აშენდეს 2-ჯგუფიანი ბაღი. ბიუჯეტი არ ვიცით რა დაჯდება, პროექტის ავტორები რომ ჩამოვლენ, თვითონვე განსაზღვრავენ ღირებულებას”, _ ამბობს ჟღენტი.
კითხვაზე, რა ბედი ეწევა იმ შენობებს, სადაც ამჟამად საბავშვო ბაღებია განთავსებული, ნოდარ ჟღენტი გვპასუხობს:
“რამდენიმე ბაღი განთავსებულია ადმინისტრაციულ შენობებში, გამონთავისუფლდება ეს სივრცე და გამოვიყენებთ სხვა რამეში”.
როგორც ცნობილია, ახალი პროგრამის ფარგლებში, საბავშვო ბაღები თანამედროვე სტანდარტების შესაბამისად აშენდება და რეაბილიტირდება. მოეწყობა ბაღების შიდა და გარე სივრცეები, რეკრეაციული ზონები, კომუნიკაციები და სველი წერტილები. ბაღები სრულად იქნება ადაპტირებული განსაკუთრებული საჭიროებების მქონე პირთათვის. საბავშვო ბაღების ინფრასტრუქტურის განვითარება ადგილობრივი თვითმმართველობების მიერ მოწოდებული ინფორმაციისა და პრიორიტეტების მიხედვით იგეგმება.
გურიის სახელმწიფო რწმუნებულის პრესსამსახურში, აღნიშნულ საკითხთან დაკავშირებით “გურია ნიუსს” განუცხადეს, რომ პროგრამა რეგიონში შემავალ სამივე მუნიციპალიტეტში გახორციელდება, თუმცა, ზუსტდება მონაცემები იმის შესახებ, სად რამდენი ახალი ბაღი აშენდება და რამდენს ჩაუტარდება რეაბილიტაცია. შესაბამისად, დაზუსტებულ ინფორმაციას უახლოეს მომავალში მოგვაწვდიან.
ავტორი
