დღეს, ჩოხატაურში, ედმუნდ კალანდაძის სახელობის თანამედროვე სახვითი ხელოვნების გალერეაში ბეგი მამალაძის ფონდის სტიპენდიანტის მარი ბრეგუს ფერწერული და გრაფიკული ნამუშევრების პერსონალური გამოფენა გაიხსნა.
გამოფენის გახსნას ესწრებოდნენ ადგილობრივი ხელისუფლების და სახელოვნებო წრის წარმომადგენლები. გამოფენას უძღვებოდა ჩოხატაურის მუნიციპალიტეტის სახელოვნებო გაერთიანების სამხატვრო სკოლების მენეჯერი, მზია კვინტრაძე.
საპატიო მიზეზის გამო გამოფენას ვერ ესწრებოდა გაბრიელ-ბეგი მამალაძის ფონდის ,,ჩემი საქართველო’’- ს პრეზიდენტი, მარიკა ზედელაშვილი და ფონდის სახელით მზია კვინტრაძემ მარი ბრეგუს ფულადი ჯილდო გადასცა.
ღონისძიებაზე სიტყვით გამოვიდა საკრებულოს თავმჯდომარე ირაკლი კუჭავა.
„გამაოცა თემატიკის მრავალფეროვნებამ და დარწმუნებული ვარ, რომ დიდი წარმატება გელოდება“,_ ასე მიმართა ირაკლი კუჭავამ მარი ბრეგუს და ფულადი საჩუქარი გადასცა.
სახელოვნებო სკოლების გაერთიანების სამხატვრო სკოლის დირექტორმა მარი ბრეგუ მადლობის სიგელით დააჯილდოვა.
დამსწრე საზოგადოებას სიტყვით არაერთმა ადამიანმა მიმართა.
მათ შორის, ოზურგეთის თანამედროვე სახვითი ხელოვნების ცენტრის დირექტორმა, ავთანდილ თავართქილაძემ.
მან მარი ბრეგუს დიდი მომავალი უწინასწარმეტყველა და უთხრა, რომ სამომავლოდ წარმატების მისაღწევად საკუთარ თავზე ბევრი უნდა იმუშაოს.
მარი ბრეგუს ბიოგრაფიის შესახებ ისაუბრა მზია კვინტრაძემ.
როგორც მან თქვა, მარი ბრეგუ 2010 წელს დაიბადა ალბანეთში, ნახევრად ალბანურ და ნახევრად ბერძნულ ოჯახში, დედა ჰყავს ქართველი. ცხოვრობს გუბაზეულის ხეობაში 2 წლიდან.
მარი ბრეგუს დედა, ხათუნა ვაჩეიშვილი „გურია ნიუსს“ უყვება, რომ მარიმ ხატვა პატარა ასაკში დაიწყო.
„მარი ძალიან პატარა იყო როცა ხატვა დაიწყო. აქ არის გამოტანილი ნახატები, რომელიც 4-5 წლის ასაკში დახატა. მასში ვხედავდი განსაკუთრებულ ხედვას და ნახატებს ვინახავდი. მე როგორც დედას, მისთვის სტიმული რომ მიმეცა, ამ ნახატებს ჩარჩოში ვსვამდი“,_ ამბობს ხათუნა ვაჩეიშვილი.
ჩვენ გავესაუბრეთ მარი ბრეგუს და ვკითხეთ, თუ რომელი ნამუშევრებია წარმოდგენილი ნახატებიდან მისი გამორჩეული და რას ურჩევს დამწყებ მხატვრებს.
„როგორც მხატვრებმა და ხელოვანებმა აღნიშნეს გამოვარჩევდი ჩემს ბოლო ნამუშევრებს. პირველი არის „გოგონა“ , რომელიც ემოციებს გადმოსცემს ემოციებს, რაც გულში აქვს ჩამალული და მეორე არის „ინდაური“. დამწყებ მხატვრებს შემიძლია ვურჩიო რომ რაც შეიძლება ბევრი დახატონ და აუცილებლად განვითარდებიან. ყველა ნაბიჯზე გააკრიტიკონ თავის ძველი ნამუშევარი, რომ შემდეგ უფრო კარგი ნამუშევარი შექმნან“,_ გვითხრა მარი ბრეგუმ.
გამოფენაზე წარმოდგენილია 2014-2025 წლებში შექმნილი 100 ნამუშევარი.
ინფორმაციისთვის, ეს მარი ბრეგუს პირველი პერსონალური გამოფენა არ არის.
ავტორი
