გამარჯობა, მე ვარ მარიამ ჯვართავა 27 წლის, ქალაქ ბათუმიდან, პროფესიით ბიოლოგი, ახლა კი უკვე სამოქალაქო აქტივისტი.
2018 წელს, როდესაც ვსწავლობდი ბათუმის სახელმწიფო უნივერსიტეტში, მივიღე მონაწილეობა ერასმუს პლუს გაცვლით პროგრამაში, ბიოლოგიის განხრით, ჩემი პროფესიით, რამაც მომცა საშუალება, რომ ერთი სემესტრის მანძილზე მესწავლა გერმანიაში, იენაში, ფრიდრიხ შილერის სახელმწიფო უნივერსიტეტში.
ამ გამოცდილებამ ძალიან დიდი კვალი დატოვა ჩემს ცხოვრებაში, რომელიც დღემდე თან მდევს. ეს ჩემი პირველი გამოცდილება იყო ევროპაში სწავლის და პირველად დავინახე, თუ როგორი განათლების სისტემა აქვს ევროპას, კერძოდ კი გერმანიას.
ჩემთვის ძალიან ყურადსაღები იყო ის ფაქტი, რომ სტუდენტი იქ იყო ძალიან დაფასებული, სტუდენტის თავისუფალი აზრი ყველასთვის, განსაკუთრებით კი ლექტორებისთვის, იყო მნიშვნელოვანი.
ერთადერთი ბარიერი, რაც შემხვდა, იყო ენის, რადგან მიჩვეული ვიყავი ჩემს ქვეყანაში ქართულად საუბარს, თუმცა, იმდენად გულისხმიერები აღმოჩნდნენ ლექტორები, რომ ჩემთვის დამატებით გამოყოფდნენ დროს… არამხოლოდ ჩემთვის _ ისინი უცხოელ სტუდენტებს ლექციების შემდეგ ან ლექციებამდე დამატებით დროს გვითმობდნენ, რომ მოცემული მასალა კარგად გაგვეაზრებინა, რახან შემდეგ მოვმზადებულიყავით ტესტირებისთვისა და გამოცდებისთვის.
ასევე, ყველაზე მეტად ჩემთვის დასამახსოვრებელი იყო უშუალოდ ქალაქი იენა, რომელიც რეალურად არის სტუდენტური ქალაქი. აქ სტუდენტებისთვის მაქსიმალურად გაადვილებული იყო ყველაფერი, ყველა სტრუქტურასა და დაწესებულებაში, იქნებოდა ეს პროდუქტების თვალსაზრისით თუ საცხოვრებლის კუთხით, რაც ჩემთვის ძალიან მნიშვნელოვანი იყო.
საცხოვრებელი სრულიად უზრუნველყო ჩემმა უნივერსიტეტმა _ მე წინასწარ შევიტანე განაცხადი და ყოველთვიურად გარკვეულ თანხას ვიხდიდი საერთო საცხოვრებელში, რომელიც სრულიად მოწესრიგებული და აღჭურვილი იყო ყველა ინვენტარით და ტექნიკით, რაც სტუდენტს ესაჭიროებოდა.
ასევე, ძალიან მნიშვნელოვანი არის ის, რომ ქვეყანამ, ქალაქმა და ჩემმა უნივერსიტეტმა მომცა საშუალება, მქონოდა ყოველთვიური დაზღვევა, რომელშიც ასევე, რა თქმა უნდა, ვიხდიდი გადასახადს ყოველთვიური სტიპენდიის საშუალებით, რომელიც გამომიყო ფრიდრიხ შილერის უნივერსიტეტმა.
ჩვენი უნივერსიტეტი კვირაში ერთხელ აწყობდა შეკრებებს, რომლებიც გვეხმარებიდა სტუდენტებს სხვადასხვა ქვეყნებიდან გავცნობოდით ერთმანეთს და ერთმანეთის კულტურას.
ასევე, იყო საღამოები, როდესაც ნებისმიერ სტუდენტს შეეძლო, რომ წარედგინა მცირე პრეზენტაცია და გაეცნო სხვა სტუდენტებისთვისა და ლექტორებისთვის მათი კულტურა, ამის საშუალება მეც მომეცა და ძალიან ვამაყობ, რომ წარმოვაჩინე ჩემი ქვეყანა გერმანიაში, სხვადასხვა ქვეყნის სტუდენტებთან.
ჩვენი ქვეყანა და ქართველი ხალხი უკვე რამდენიმე წელია იბრძვის იმისთვის, რომ საქართველო გახდეს ევროკავშირის ღირსეული წევრი და მიიღოს ყველა ის სიკეთე, რასაც გასცემს ევროკავშირი მათი წევრი ქვეყნებისთვის, ეს იქნება განათლების მხრივ, ფინანსური თვალსაზრისით, ჯანდაცვის მხრივ თუ სხვა, რაც ჩვენთვის, ჩვენი ქვეყნისთვის, ეკონომიკისთვის, ხალხისთვის არის სასიცოცხლოდ აუცილებელი.
“გურია ნიუსმა” მიიღო დაფინანსება ამერიკის შეერთებული შტატების საერთაშორისო განვითარების სააგენტოსგან (USAID).
“გურია ნიუსი” ინარჩუნებს სრულ სარედაქციო დამოუკიდებლობას.
“გურია ნიუსის” მიერ გამოქვეყნებული მასალა არ ასახავს USAID-ის ან ამერიკის შეერთებული შტატების მთავრობის პოზიციას.
