“დაპატიმრებული” ჭა, “შინმოუსვლელი” გაზი, ინტერნეტის გარეშე დარჩენილი მოსწავლეები

ოზურგეთის მუნიციპალიტეტის სოფელ მერიის თემში სულ სამი სოფელია გაერთიანებული: მერია, ნაღობილევი და ხვარბეთი. ამ სამ სოფელში 1500-მდე კომლია.

მალე ამ სოფლებში ციტრუსოვანთა კრეფის სეზონი დაიწყება და ადგილობრივები აქედანვე საუბრობენ სავარაუდო სიძნელეებზე, რაც, შესაძლოა, რეალიზაციის პროცესში გაჩნდეს. ყველაზე მეტად კი, როგორც თავად ამბობენ, ეს პანდემიის გამო იქნება, რადგან რიგი შეზღუდვების გამო, მოსალოდნელია, მოსავალი რეალიზაციის გარეშე დარჩეთ.

თუმცა, ყველაზე ძალიან, მრავალ დასახელებულ პრობლემას შორის, რაც აქაურებს აწუხებთ, უწყლობაა. დიდი ხანია, ადგილობრივ მცხოვრებლებს სასმელი წყალი არ აქვთ და ერთი ჭის წყლით რამდენიმე ოჯახი სარგებლობს, ზაფხულში კი მდგომარეობა უფრო გაუარესებულია.

_ რამდენიმე ოჯახშია მოქმედი ჭა. ვისაც ჰქონდა, ყველგან დაშრა, რაც ნაირ-ნაირი კარიერები აღმოცენდა მდინარე ნატანებზე. ასეთი მწყურვალი სოფელი სად იქნება?! 700 კომლზე მეტია სოფელში. ჭა ვისთანაც არ არის დამშრალი, იქ სამი-ოთხი ოჯახი მაინც მიდის წყლისთვის. ზოგი ძაღლის დაბმას ვერ აუდის, იმდენი წყლის მთხოვნელი ჩადის ეზოში. სოფლის ცენტრში გვაქვს ერთი “დაპატიმრებული” ჭა და ამ ერთ ჭაზე, სამი “მატორი” და 6 ოჯახია “ჩამოკიდებული”. ვინმე ან რაიმე რომ არ ჩავარდეს, კბილებიანი მავთული შემოვავლეთ. სამი “მატორია” ჩაკიდული და სამჯერ სამ ოჯახს სათლით ამოაქვს წყალი ,_ გვეუბნებიან მერიელები და გვაჩვენებენ აღნიშნულ ჭაში ჩაკიდულ წყლის რამდენიმე ტუმბოს და ასევე სათლს, რომლითაც, მათივე თქმით, “ლამის წყლის დატაცება ხდება”.

ამ ჭით რამდენიმე ოჯახი სარგებლობს

_ ჩემი ჭით ოთხი ოჯახი სარგებლობს. მეზობლებს წყალზე უარს ხომ ვერ ვეტყვი?! ზაფხულში ფსკერზე ძლივს ჩანს წყალი, მაგრამ სანამდეც გვეყოფა და რამდენსაც გვეყოფა, ასე ვიყოფთ. ხომ შეიძლება, საშველი დაგვადგეს?! მეზობელ სოფლებში გააკეთეს ჭაბურღილები. ჩვენთან გაზიც არაა ამხელა სოფელში. როგორც იქნა, მილები ჩაყარეს, მაგრამ სახლებში ჯერ არსადაა შეყვანილი. ახალი წლისთვის გვპირდებიან და აგერ, მოსულია ეგეც ეს ახალი წელი, _ გვითხრა სოფლის მკვიდრმა ანა მარგალიტაძემ.

მერიის მკვიდრი ნატო დოლიძე ამბობს, რომ თავად საკუთარ ეზოში გააკეთა ჭაბურღილი, საიდანაც მეზობლებსაც აწვდის წყალს, თუმცა, სოფელს ჰაერივით სჭირდება წყალი:

_ მერიაში რომ წყალზე გასაჭირია, არ მგონია, სადმე, გურიის სოფელში მსგავსი მდგომარეობა იყოს. ოღონდაც გააკეთონ, რაიმე იღონონ, ხალხიც დავდებთ ფულს, რასაც შევძლებთ. უმეტესობის ეზოებში ჭა დამშრალია. აქა-იქ შემორჩა და ლუკმასავით უყოფენ ერთმანეთს. ზაფხულში განსაკუთრებით, აქ დასალევი თუ საჭმლის გასაკეთებელი წყალი, წვეთ-წვეთად საძებარია, _ გვეუბნება ნატო დოლიძე.

_ სოფლის ცენტრში ვცხოვრობ. შეხედავ, საუცხოო გზა, დიდი სოფელია. ურეკისკენ მიმავალ ტრასაზე, ასეთ დასახლებაში, ვინმე იფიქრებს, აქ უწყლოდ იხრჩობიანო? გაზიც რომ არ გვაღირსეს?! არის ოზურგეთში ასე დიდი სოფელი დარჩენილი გაზის გარეშე? ამ გაზს, ჯანდაბას, ვყიდულობთ. წყალიც როგორ ვიყიდოთ? ვეზიდები მეზობლებისგან და სულ სხვის ეზოში ჩასვლაც შეგრცხვება ადამიანს, რაც უნდა კეთილგანწყობილები ვიყოთ ერთმანეთთან, _ შემოგვჩივლა მერიის მკვიდრმა მზია ჯაშმა.

ვახტანგ მარგალიტაძე, მერიის მკვიდრი:

“სოფელი მერია უწყლოდაა. ეს არის ძალზე დიდი პრობლემა ამ სოფლისთვის, თორემ პრობლემა სხვაც ბევრია. კომუნისტების დროს, გოგორეთის უბანში, რომელიც ზეგანზე მდებარეობს, მოთავსებული იყო გამანაწილებელი აუზი. მდინარე ნატანებიდან წყალსაქაჩი ტუმბოებით ხდებოდა ამ უზარმაზარი აუზის ავსება და ხალხს უწყვეტ რეჟიმში მიეწოდებოდა წყალი. ამას ახლა ასე ვინ გააკეთებს?! სახელმწიფოს თანადგომა უნდა და დიდი ფინანსური შესაძლებლობა. ადვილად არ მოხერხდება. ნაწილ-ნაწილ მაინც უნდა გაკეთდეს, რომ ხალხმა სული მოითქვას”

ოზურგეთის მუნიციპალიტეტის მერიის ინფრასტრუქტურის სამსახურის უფროსის, თემურ გიორგაძის განმარტებით, გოგორეთის უბანში დასრულების პირასაა ჭაბურღილის მშენებლობა, რომელიც მუნიციპალიტეტის ბიუჯეტიდან ფინანსდება.

_ ჭაბურღილი უკვე გაკეთებულია. ახლა ხდება ამორეცხვის სამუშაოები. იგი მალე დაიწყებს ფუნქციონირებას, _ გვითხრა მან.

_ კარგია, 50 თუ ასი ოჯახის სამყოფად გაკეთდება წყალი, თუმცა, წყალი ყველას გვინდა, _ ამბობს ვახტანგ მარგალიტაძე.

თავის მხრივ, თემურ გიორგაძეც ამბობს, რომ უწყლობის პრობლემა ყველგან უცბად ვერ გადაწყდება:

_ თანდათან ყველგან ექნებათ წყალი, რადგან ინფრასტრუქტურული სამუშაოები არ შეჩერდება. ჩვენ ვიცით ამ პრობლემების შესახებ. სხვაგანაც კეთდება, თან ბევრგან. მარტო ეს რომ იყოს პრობლემა, ადვილად მოგვარდებოდა, _ გვარწმუნებს ის.

_ წყალი არის ყველაზე დიდი პრობლემა, თუმცა, ეს “შინმოუსვლელი” გაზიც რომ უსაშველო გახდა? რამდენი წელია, ოზურგეთის სოფლებში გაზი შეყვანილია. მერია კი დღემდე გაზის გარეშეა. როგორც იქნა, მილები ჩაყარეს. ყველა ჭიშკართან მიყვანილია, მაგრამ შინ შეყვანას საშველი არ დაადგა. ახალ წლამდე დავასრულებთო, გვითხრეს ახლა. როცა შევიყვანთ, მხოლოდ მაშინ დავიჯერებთ. თორემ დაპირებას, ბარე ხუთი წელია ვუსმენთ და ვუცდით, _ გვეუბნება მერიის მცხოვრები აბესალომ ხინთიბიძე.

მერიაში ახალგაზრდები, განსაკუთრებით, უფროსკლასელები ინტერნეტიზაციის პრობლემებზე საუბრობენ, რადგან ახლა, ონლაინ სწავლების დროს, მრავალ ბავშვს, განსაკუთრებით უმცროსკლასელებს სწავლაში ხელი ეშლებათ:

_ ჩვენ, მეთორმეტეკლასელებს კიდევ არა გვიშავს _ თავის დროზე ვისწავლეთ. ახლა აქ ყველას გვაქვს ონლაინსწავლებაში ჩართვის საშუალება. თუმცა, ჩვენი სკოლის ბევრი მოსწავლე ვიცით, განსაკუთრებით, დაწყებითი კლასების მოსწავლეები, რომლებსაც არ აქვთ ინტერნეტი. როგორ უნდა ისწავლონ მათ? ეს ძალიან გვაფიქრებს, _ გვითხრეს მერიის საჯარო სკოლის მეთორმეტეკლასელებმა: ნინო ნაკაშიძემ, ქეთი მახარაძემ, სოფო დიასამიძემ.

მერიელი მოსწავლეების უმეტესობას ინტერნეტი არ აქვს

სოფელ მერიაში, ცენტრალურ ადგილზე, სადაც მუნიციპალიტეტის მერიის მიერ, მგზავრთა მოსაცდელი აშენდა, ერთი დეპუტატობის კანდიდატის ფოტოა შემორჩენილი და ირგვლივ, ტერიტორია, ისევე, როგორც მოსაცდელი, ნაგვითაა სავსე. ცოტა მოშორებით კი, რამდენიმე მეტრში, უზარმაზარი ნაგვის ურნები დგას. აქვეა, კომუნისტური წეს-წყობილების დროს მოქმედ დაწესებულებათა შენობები, ნახევრად დანგრეული, გარემოს რომ უარესად ამახინჯებს, რომელთა დემონტაჟზე, როგორც ადგილობრივმა დავით ბუცხრიკიძემ გვითხრა, არავინ ფიქრობს:

_ ეგ შენობები ძალიან ძვირად ფასობს. აქ, როგორც ამბობენ, მხოლოდ ერთი, ზედა სართულის ფართს 5 ათას დოლარს აფასებენ. ვინ იყიდის? არადა, ეს ყველაზე უარეს ნაგვად ჩანს აქ. ისე, კი ხედავთ, ნაგვის ურნაში უბრალო ქაღალდს და ბოთლს არ ყრიან, აგერაა მოფანტული… რა ვიცი, ყველაფერი პრობლემაა, წყალი გვექნებოდეს და არაფერს დავეძებთ. როცა წვიმაა, კი არის ჭებში წყალი, მაგრამ ზაფხულში რაც გვჭირს, მწყურვალის გარდა, ვერავინ მიხვდება! _ გვითხრა დავით ბუცხრიკიძემ.

მოსაცდელი კედელზე ვასილ ჩიგოგიძის პლაკატით და იატაკზე _ ნაგვით

მერიის ცენტრს არც ნანგრევები აკლია და არც ნაგავი…