სამტრედია-გრიგოლეთს ავტობანის მშენებლობის დასრულება კითხვის ნიშნის ქვეშ დგას, არადა, მისი დამთავრება 2018 წელს იყო დაგეგმილი.
დატბორილი გვირაბები, დაშლილი ხიდები _ ეს ის რეალობაა, რომელიც 113-მილიონიან გზაზე დაგვხდებათ.
პროექტის თანახმად, რომელიც ევროპის საინვეტიციო ბანკის დაფინანსებით ხორციელდება, 10-კილომეტრიან მონაკვეთზე ახალი მიმართულების ოთხზოლიანი ასფალტ-ბეტონის გზა, პარალელური გზაგამტარი, სატრანსპორტო კვანძი, რკინა-ბეტონის მიწისქვეშა გასასვლელი და წყალგამტარი მილები უნდა გაკეთებულიყო.
თუმცა, ეს პროექტით. რეალურად კი ირკვევა, რომ შესრულებული სამუშაოები უხარისხოა და უკვე აშენებული ხიდები იშლება.
“ინფრასტრუქტურის სამინისტროს უპასუხისმგებლო მუშაობის გამო რომ ვადები დარღვეულია, ეს ცალსახაა. წინა მინისტრს, ალავიძეს, სად ეცალა ასეთი პროექტის ვადებისთვის _ მილიონები ჰქონდა საშოვნი! რაც შეეხება ახლანდელ მდგომარეობას _ მოსახლეობამ უნდა იცოდეს, რომ ეს პროექტი ხორციელდება მათი ფულით, რაც იმას ნიშნავს, რომ სახელმწიფოს აღებულ აქვს გრძელვადიანი კრედიტი/ვალი სხვადასხვა დონორი ორგანიზაციებისგან, რომელიც ჩვენი და ჩვენი შვილების გადასახადია. და რა ხდება ამ დროს? 34 ხიდი, რომლითაც მოსახლეობას უნდა ესარგებლა საკუთარ საყანე ფართობებში მისასვლელად, აღმოჩნდა, რომ ამ ფუნქციის შესასრულებლად სრულიად უვარგისია.
წარმოგიდგენთ, რამდენი ფულია დახარჯული ამ ხიდების მონტაჟზე; ახლა წარმოიდგინეთ ამ უხარისხოდ გაკეთებული ხიდების დემონტაჟს რამდენი დასჭირდება, მერე ისევ ხელახლა მონტაჟს და ადვილი გასაგები იქნება, რომ ზარალი მილიონებზე ადის. დარწმუნებული ვარ, „ოცნების“ ხელისუფლებას ხელში ამ დანაშაულისთვის არც არავის მოეთხოვება პასუხი.
მე თავში მოგახსენეთ ალავიძეზე და შემთხვევით არ მიხსენებია _ თავად მმართველი პარტია ედავებოდა კორუფციას კვირიკაშვილთან ერთად და დასჯილი ნახეთ ვინმე?! მოქმედი მინისტრი, დარწმუნებული ვარ, როგორც აქედან და ტოკიო ისე ერკვევა ინფრასტრუქტურულ საკითხებში და თუ ერკვევა, მაშინ გასცეს შეკითხვებს პასუხი“, _ აღნიშნა ჩვენთან საუბრისას „ნაციონალური მოძრაობის“ ლანჩხუთის ორგანიზაციის ხელმძღვანელმა კახა ასკურავამ.
რეგიონული განვითარებისა და ინფრასტრუქტურის სამინისტროში არ უარყოფენ, რომ ავტობანის მშენებლობაზე ბევრი ხარვეზია:
_ ხარვეზები არსებობს. ამას გიდასტურებთ და მიმდინარეობს მათი გამოსწორება. ყველა დამატებითი ხარჯი კომპანიას ეკისრება, _ გვითხრეს უწყების პრესსამსახურში.
მათივე ცნობით, მშენებელი კომპანიები უკვე დაჯარიმებულნი არიან:
„სამტრედია-გრიგოლეთის მეორე და მეოთხე მონაკვეთზე ჩინური კომპანიები _ „სინოჰიდრო“ და „ჩაინა რეილვეი 23“ მუშაობენ. „სინოჰიდრო“ დაჯარიმებულია 11 მილიონი ლარით, „ჩაინა რეილვეიმ“ კი უახლოეს დროში უნდა წარმოადგინოს საბუთი, რის მიხედვითაც დაითვლება ჯარიმის ზუსტი ოდენობა“, _ აღნიშნეს „გურია ნიუსთან“ საუბრისას სამინისტროში.
მას შემდეგ, რაც თემის დეტალებით „გურია ნიუსი“ დაინტერესდა და ჟურნალისტური გამოძება დაიწყო, ლანჩხუთში ევროპის რეკონსტრუქციისა და განვითარების ბანკის, საგზაო დეპარტამენტისა და ავტობანზე სამშენებლო სამუშაოების მწარმოებელი კომპანიის _ “სინოჰიდროს” წარმომადგენლები ჩავიდნენ.
ლანჩხუთის მუნიციპალიტეტის მერიის პრესსამსახურის ინფორმაციით, „სტუმრებმა, ადგილობრივი ხელისუფლების პირველ პირებთან ერთად, ყველა ის მონაკვეთი დაათვალიერეს, სადაც, სამუშაოები ხარვეზებითაა შესრულებული“:.
„ადგილებზე შესაბამის ადმინისტრაციულ ერთეულში მერის წარმომადგენლებიც იმყოფებოდნენ და სტუმრებს თავად აჩვენებდნენ ყველა მცირეოდენ პრობლემასაც კი. სტუმრების მხრიდან აღინიშნა, რომ პრობლემები მართლაც თვალშისაცემია. ერთობლივი მოლაპარაკების შედეგად კი გადაწყდა, რომ აბსოლუტურად ყველა ხარვეზი დროულად აღმოიფხვრება და გამოსწორდება”, _ გვითხრეს პრესსამსახურში.
არსებულ პრობლემებზე კომენტარი გააკეთა ლანჩხუთის მერმაც. ალექსანდრე სარიშვილი ამბობს, რომ პრობლემები ბევრია:
_ განსაკუთრებით გვირაბებში და ეს არაერთხელ გვითქვამს. ბევრჯერ მივწერეთ კომპანიასაც. მოსახლეობა ქუჩაშიც კი გამოვიდა. როგორც გვეუბნებიან, ხარვეზებს მალე გამოასწორებენ, _ აღნიშნა ჩვენთან საუბრისას სარიშვილმა.
როდის იქნება ეს „მალე“, არც სარიშვილმა იცის და ვერც სამინისტროში გვეუბნებიან. არადა, მოსალოდნელი პრობლემების შესახებ „გურია ნიუსი“ 2 წლის წინ წერდა.
2017 წელს, იმდროინდელ ინფრასტრუქტურის მინისტრთან, ზურა ალავიძესთან ექსკლუზიური ინტერვიუს დროს, ექსპერტებზე დაყრდნობით, ვუთხარით, რომ ავტობანის მშენებლობაზე გამოყენებული მდინარის კარიერი პრობლემების შექმნიდა.
მაშინ ჩვენ გვქონდა ინფორმაცია, რომ მშენებლობაზე მხოლოდ მდინარის კარიერს იყენებდნენ, რაც დაუშვებელი იყო. უფრო მეტიც, რამდენადაც ჩვენთვის ცნობილი გახდა, ავტობანის დაპროექტების დროს, გათვალისწინებული იყო მთების კარიერის გამოყენება, რომელიც საქართველოში დახურული იყო და მისი გახსნის ნაცვლად პროექტების შეცვლა მოხდა…
“სამწუხაროდ, ეს გზები სულ კარგადაც არ იყო დაპროექტებული. ბევრი პრობლემები გვაქვს და მარტო გზებში არა. 22 ქალაქში წყალმომარაგების სამუშაოები მიმდინარეობს და იქაც, პროექტირების, გამო სერიოზული პრობლემები შეგვექმნა” _ გვითხრა მაშინ ალავიძემ და დეტალებზე საუბარს თავი აარიდა. თუმცა, არ უარყვია, რომ პროექტის შეცვლა მოხდა.
რაც მოყვა ამ შეცვლილ პროექტს და სრულ უკონტროლობას ყველა ერთად ვხედავთ _ სამუშაოები თავიდანაა შესასრულებელი. თუმცა, რამდენად ხარისხიანად, ეს არავინ იცის. როგორც დავაზუსტეთ,. მშენებლობაზე ისევ მდინარის კარიერების გამოყენება ხდება და არა მარტო _ იქ დასაქმებული ადამიანები ჩვენთან საუბარში ამბობენ, მშენებლობაზე უხარისხო მასალების გამოყენება ხდება.
ამის ეჭვი აქვთ „ახალგაზრდა ადვოკატებსაც“, რომლებმაც გასულ წელს პროკურატურაშიც კი შეიტანეს განცხადება და მშენებელი კომპანიის წინააღმდეგ გამოძიების დაწყება მოითხოვეს.
„ახალგაზრდა ადვოკატების“ განცხადებით, მათი კვლევის შედეგად დადგინდა, რომ ტენდერში გამარჯვებულმა შემსრულებელმა კომპანიამ სამტრედია-გრიგოლეთის საავტომობილო გზის მშენებლობის პროექტი სახელმწიფოს შესაბამის კომპეტენტურ უწყებებთან ნებართვების მიღების გარეშე შეცვალა. თავდაპირველად, პროექტიც განისაზღვრა, რომ ვინაიდან ტერიტორია წარმოადგენდა ჭაობიან ადგილს, გზა აშენდებოდა ბეტონის ხიმინჯებზე. კომპანიამ პროექტში ცვლილებები მოითხოვა და ტერიტორიაზე ფითილები დამონტაჟდა, თუმცა, ფითილების გამოყენებით გზის მშენებლობამ შედეგი არ გამოიღო.
„მივიღეთ შედეგი, როდესაც სამტრედია-გრიგოლეთის მეორე ლოტის მშენებლობა სერიოზული ხარვეზებით მიმდინარეობს. მოკვლევამ უკვე აჩვენა, რომ პროექტზე განსაზღვრულ 254 მილიონი ლარიდან, დახარჯულია 150 მილიონ ლარზე მეტი, ხოლო საავტომობილო გზების დეპარტამენტმა, პროექტში თავის დროზე გახორციელებული ცვლილების სამართლებრივი საფუძვლების შექმნისთვის, ლევან სამხარაულის სახელობის სასამართლო ექსპერტიზის ეროვნულ ბიუროს მხოლოდ 2018 წელის 18 იანვარს მიმართა, რაც კანონის უკიდურესი დარღვევაა”, _ აღნიშნულია გასულ წელს გამოქვეყნებულ განცხადებაში.
„ახალგაზრდა ადვოკატების“ ხელმძღვანელი არჩილ კაიკაციშვილი „გურია ნიუსთან“ საუბრისას ამბობს, რომ მათ მიერ მოკვლეული მასალები პროკურატურამ საქმეს მტკიცებულებად დაურთო.
ის, რომ სამტრედია-გრიგოლეთის ავტობანის მშენებლობასთან დაკავშირებით გამოძიება მიმდინარეობს, დაგვიდასტურეს მთავარ პროკურატურაშიც:
„ამ ეტაპზე მხოლოდ ის შემიძლია გითხრა, რომ სამტრედია – გრიგოლეთის საავტომობილი გზის მშენებლობასთან დაკავშირებით საქართველოს გენერალურ პროკურატურაში მიმდინარეობს გამოძიება. სამწუხაროდ, სხვა დეტალებს ვერ გეტყვით“, _ აღნიშნა ჩვენთან საუბრისას გენერალური პროკურატურის პრესსამსახურმა გიორგი გრძელიშვილმა.
ჩვენ შევეცადეთ ამ საკითხზე მშენებელი კომპანიის წარმომადგენლების კომენტარებიც მიგვეღო, თუმცა, ამ დროისთვის ვერ შევძელით.
ჩინური კომპანიის თარჯიმანმა მხოლოდ ის გვითხრა, რომ მისთვის, ცნობილი არც 11 მილიონით დაჯარიმების თემაა და არც პროკურატურაში დაწყებული გამოძიების.
თარჯიმნისგან იმის პირობა მივიღეთ, რომ კომპანიის ჩინელ მმართველებს ჩვენს შეკითხვებს გადასცემს და თუ პასუხის გაცემას მოისურვებენ კონტაქტზე თავად გამოვლენ.
