ადიდებულმა მდინარე რიონმა ქალაქი ონი დატბორა. რაჭა-ლეჩხუმისა და ქვემო სვანეთის გუბერნიის პრესსამსახურის ინფორმაციით, სერიოზული პრობლემები შეიქმნა რამდენიმე სოფელში:
“ადიდებულმა მდინარეებმა დააზიანა ხიდები, ნაპირსამაგრები, დაიტბორა სასოფლო–სამეურნეო სავარგულები, წარმოიქმნა მეწყრული ზონები. ადიდებულმა მდინარემ სოფელ გონაში წაიღო 2 საავტომობილო ხიდი, ნაპირსამაგრი დაზიანდა სოფელ უწერაშიც, რამაც გამოიწვია სასოფლო–სამეურნეო სავარგულების ნაწილისა და მინერალური წყლის ,,ნაპერწკალას“ მიმდებარე ტერიტორიის დატბორვა. ადიდებულმა მდინარე ჩვეშურმა დააზიანა საგლოლო–ღების სახელმწიფო გზის გარკვეული მონაკვეთი, რომელიც ამ ეტაპზე აღდგენილია, თუმცა გადაადგილება შესაძლებელია მხოლოდ მაღალი გამავლობის ავტომანქანებით. გაიხსნა ჭიორა–საგლოლოს დამაკავშირებელი გზაც” _ აღნიშნულია პრესსამსახურის მიერ მოწოდებულ ინფორმაციაში.
ონის მუნიციპალიტეტის გამგეობის ინფორმაციით, ქუთაისი-ალპანა-შოვი-მამისონის სახელმწიფო გზის მონაკვეთებზე წარმოქმნილია მეწყრული კერები.
რაჭა-ლეჩხუმისა და ქვემო სვანეთის გუბერნიის პრესსამსახურის ფოტოები
