ჩოხატაურს მწერალი დათო ტურაშვილი ეწვია. ის სხვადასხვა სკოლის მოსწავლეებს ნიკო მარის სახელობის N1 საჯარო სკოლაში შეხვდა. შეხვედრა „ახალგაზრდული სტუდენტური გაერთიანებისა“ და ორგანიზაცია „ქალები ქალებისთვის“ ორგანიზებით ჩატარდა.
ტურაშვილმა ისაუბრა მის მიერ დაწერილი წიგნების შესახებ და მოსწავლეებს აუხსნა, თუ რატომ არის მნიშვნელოვანი კითხვა. მაგალითად კი გურიის რესპუბლიკის შემქნის ისტორია მოიყვანა.
მწერალმა აღნიშნა, რომ იმ პერიოდში გურიის ყველა სოფელში იყო ე.წ. ქოხ-სამკითხველოები, სადაც წაკითხული წიგნებით მიღებული ცოდნის შედეგად გურულები გახდნენ განათლებულები და მიხვდნენ, რომ თავისუფლება და სამართლიანობა უნდა მოეთხოვათ.
“რუსეთის იმპერიას გამოეყო გურია 1905 წელს და შექმნეს გურიის რესპუბლიკა, უნიკალური ქვეყანა კაცობრიობის ისტორიაში. პირველი ქვეყანა, სადაც ქალებს ჰქონდათ ხმის მიცემის და არჩევანის უფლება, ყველას დაასწრეს ზელანდიელებსაც და ბელგიელებსაც კი, ოფიციალურად ითვლება, რომ ისინი იყვნენ პირველები და შექმნეს ყველაზე დემოკრატიული გარემო, ყველა რუსი მოხელე გააძევეს, ეთნიკურად რუსი კი არა, ჩინოვნიკები, რომლებიც წარმოადგენდნენ რუსეთის ხელისუფლებას, გააძევეს გურიიდან. 7 თვე გაძლო გურიის რესპუბლიკამ და ყველაფერი იყო არჩევითი არა მხოლოდ, პარლამენტი, პრეზიდენტი_ ბერიამინ ჩხიკვიშვილი, არამედ ყველა, მოსამართლეც კი. გურიის ყველა სოფელში ჩატარდა არჩევნები. ეს არის დაუჯერებელი ექსპერიმენტი, რომელმაც აქ გაამართლა, იმიტომ, რომ გურიის ყველა სოფელში იყო ე.წ. ქოხ-სამკითხველოები. მთელი გურია კითხულობდა წიგნებს და მიხვდნენ, რომ გახდნენ განათლებულები, თუ რატომ უნდა ყოფილიყვნენ რუსეთის იმპერიის ნაწილი ეს წიგნიერი უნიჭიერესი და განათლებული ხალხი, როგორებიც გურულები არიან და ამიტომ მოითხოვეს სამართლიანობა, თანასწორობა და თავისუფლება”,_ განაცხადა ტურაშვილმა.
სკოლის მოსწავლეებმა მონაწილეობა მიიღეს სახალისო ვიქტორინაში, გამარჯვებულ ბავშვებს კი დავით ტურაშვილის საავტორო წიგნები გადაეცათ. წიგნებით დაჯილდოვდნენ სკოლებიც.
სკოლის მოსწავლეები ამბობენ, რომ ძალიან, სასიამოვნოა ასეთი ნიჭიერი ადამიანების სტუმრობა ისურვებდნენ მსგავსი სახის ღონისძიებები სულ ტარდებოდეს.
