დედა 25 წლის შვილმა საკუთარ მანქანაში ააფეთქა. შემთხვევა 2 აპრილს, ოკუპირებულ აფხაზეთში, ოჩამჩირის რაიონის სოფელ კვიტოულში, ადგილობრივი საავადმყოფოს მთავარი ექიმის მოადგილე, 64 წლის ნადეჟდა ვოუბა ააფეთქეს. შემთხვევა იმ დროს მოხდა, როდესაც ქალი სამსახურში წასასვლელად ემზადებოდა, ავტომანქანა დაძრა და მის ქვეშ დამონტაჟებული ასაფეთქებელი მოწყობილობა ამოქმედდა. ქალს ადგილზე მოსწყდა ფეხი, თუმცა, გონება არ დაუკარგავს და ძლიერი სისხლდენა ფეხზე გადაჭერის შემდეგ შეიჩერა…
Абхаз Авто-ს ცნობით, დაშავებული ექიმი, გულრიფშის რაიონის საავადმყოფოში გადაიყვანეს, სადაც მას ერთი ფეხის ამპუტაცია ჩაუტარდა. აგუძერის ჰოსპიტლის ე.წ. მთავარი ექიმის ზურაბ აჩბას თქმით, ვოუბას მდგომარეობა სტაბილურად მძიმეა, ნაღმის აფეთქებისგან მიღებული მრავლობით დაზიანებები აქვს, თუმცა იცოცხლებს.
ინტერნეტგამოცემის ცნობით, ნადეჟდა ვოუბა “აფხაზეთის ომის ვეტერანია” და დაჯილდოებულია “ღირსების ორდენით”.
დღეს დილით, აფხაზურმა მედიამ გაავრცელა ინფორმაცია, რომ ექიმის აფეთქებაში მისივე შვილი – 25 წლის ბიჭია ეჭვმიტანილი. ის ადგილობრივმა ე.წ. მილიციამ, დედის გამოკითხვის შემდეგ, უკვე დააკავა.
“გამოძიების” ცნობით, გულრიფშის რაიონის სოფელ აგუძერაში დააკავეს დაურ ვოუბა, რომელიც 1994 წელს არის დაბადებული და წლების განმავლობაში ნარკოდამოკიდებული იყო. დაკავების შემდეგ, მას სამედიცინო შემოწმება ჩაუტარდა და ორგანიზმში “მეტადონის” კვალი აღმოუჩინეს. არსებული ვერსიით, ექიმსა და მის შვილს გარკვეულ საკითხებზე, მათ შორის ნარკოტიკებთან დაკავშირებით, მწვავე დაპირისპირება ჰქონდათ.
აფხაზი ინტერნეტმომხმარებლების ნაწილი წერს, რომ “90-იანი წლების ომის შემდეგ, აფხაზების, როგორც ერის განადგურება შედგა…” სხვების თქმით, თითქმის ყველა ექიმი და ზოგადად, მედპერსონალი, რომელიც ნარკოტიკებს ყიდდა, ახლა “ნარკომანი შვილების გადარჩენისა და განკურნებისთვის იბრძვის”.
“მას მკურნალობა სჭირდება. ე.წ. ლომკის დროს, ადამიანს ყველაფრის გაკეთება შეუძლია. შესაძლოა, მას არც კი ახსოვდეს, რა გააკეთა. არავინ იცის, ამ მდგომარეობაში კიდევ რამდენია ჩვენს უბედურ ქვეყანაში”, – წერს სოხუმელი ფსევდონიმით “აფხაზია სუხუმ”.
“შოკში ვარ… რა მკურნალობაზე ლაპარაკობთ, ხალხო, ის ოდესმე ადამიანი იქნება?! მან რა უნდა შექმნას? შვილები უნდა აღზარდოს? რა უთხრა, დედა მოვკალი, რადგან ნარკოტიკს არ მაძლევდაო? მომეცით იარაღი, მე მოვკლავ და დაუნანებლად წავალ ციხეში” – წერს “იასონ აფხაზი”.
“1994 წელს დაბადებულა… ვინ იცის რა ტანჯვით გამოზარდა იმ უბედურ წლებში ამ ქალმა ეს ბიჭი… კიდევ რა უნდა მოხდეს, რომ ვაღიაროთ, რომ მომავალი არ გვაქვს?! ნარკოტიკში ვიხრჩობით და ვიხოცებით. არ მინდა ამ ქვეყნის შვილობა…” – წერს ინტერნეტმომხმარებელი ესმა კიტია.
“ვთხოვ ქვეყნის ხელისუფლებას: ნარკორეალიზატორებზე ან დახვრეტა დააწესონ, ან უბრალოდ, მოგვდგნენ და დაგვხოცონ, მაინც ვერ გადავრჩებით! შვილმა დედას მანქანაში ასაფეთქებელი დაუმონტაჟა, რადგან სავარაუდოდ, დედამ ნარკოტიკების მოტანასა და მოხმარებაზე უარი უთხრა. რა დამოუკიდებლობაზე ვსაუბრობთ? რა გვინდა საერთოდ, რატომ უნდა გადავრჩეთ, როგორც ერი? გვერდიდან შევხედოთ ჩვენს თავს, დაღუპვის პირას ვართ…” – მიაჩნია “ოთარ სუხუმსკის”.
წყარო: ambebi.ge
