გურიის გუბერნატორის მერაბ ჭანუყვაძეს ქონებრივ დეკლარაციაში ასახულია დედის _ ეთერ ჭანუყვაძის სახელზე რეგისტრირებული ქონება, რაც საზოგადოების მაღალ ინტერესს იწვევს.
ამ საკითხით დაინტერესებული პირები “გურია ნიუსს” მიმართავენ და დეკლარაციაში ასახული ქონების შესწავლას სთხოვენ:
“გთხოვთ, გამოიყენოთ თქვენს ხელთ არსებული ყველა რესურსი, გამოიკვლიოთ ეს საქმე და გაასაჯაროოთ”, _ გვწერენ ისინი.
ეს ინტერესი განსაკუთრებით მაშინ გაიზარდა, როცა პარტია “ქართული ოცნების” ოზურგეთის საოლქო ორგანიზაციის თავმჯდომარის პოსტზე მერაბ ჭანუყვაძე დასახელდა. გუბერნატორის დეკლარაციაში აღნიშნული ქონება ასე გამოიყურება:
მერაბ ჭანუყვაძის დედა, ეთერ ჭანუყვაძე ფლობს ოზურგეთში, სოფელ შემოქმედში მდებარე 350.00 კვ.მ.-ის ფართობის საცხოვრებელ სახლს და ამავე სოფელში მდებარე 2 100.00 კვ.მ.-ისა და 3 500.00 კვ.მ-ის ფართის მიწის ნაკვეთებს.
2016 წელს ეთერ ჭანუყვაძის სახელზე რეგისტრირდება ჩუქების სახით მიწის ნაკვეთები ფართით _ 84 568 კვ.მ და 28 106 კვ.მ; ჯამში _ 11 ჰექტარი და 2 674 კვ.მ.
საჯარო რეესტრის საბუთებით ირკვევა, რომ სახელმწიფოსგან 2008 წელს 3 500 ლარად გამოსყიდული მიწა 2009 წელს გასხვისდა, შემდეგ იგი 2010 წელს ისევ უკან გამოისყიდა სოფელ სუფსაში მცხოვრებმა აკაკი საჯაიამ, 2016 წლის ნოემბერში კი 2 ნაკვეთი, საერთო ფართით 11 ფექტარზე მეტი, აჩუქა ეთერ ჭანუყვაძეს.
ლანჩხუთის მუნიციპალიტეტის სოფელ სუფსაში აღნიშნული მიწის ნაკვეთი სოფლის ცენტრიდან, დაახლოებით, 4 კილომეტრით არის მოშორებული; თითქმის მიუვალი ნახევრად ფერდობი, რომელსაც ადრე საძოვრად იყენებდნენ, ახლა ეკალ-ბარდით არის დაფარული.
სუფსაში მცხოვრები 31 წლის აკაკი საჯაია “გურია ნიუსთან” ამბობს, მერაბ ჭანუყვაძის ახლო ნათესავია. მისივე თქმით, მერაბის დედა ეთერ ჭანუყვაძე ისეთივე მემკვიდრეა მისი ბაბუის, როგორც თავად.
“ეს მიწები სახნავად გამოიყენებოდა ადრე, ახლა კი აქ მხოლოდ ეკალ-ბარდია. 2008 წელს აუქციონზე ოფიციალურად შევიძინეთ ეს მიწა, დაახლოებით, 22 ჰექტარი, რომელიც წარსულში ბაბუაჩემის საკუთრება იყო _ გვქონდა იჯარით აღებული და ვსარგებლობდით. ბაბუაჩემის მემკვიდრე როგორც მე ვარ, ისევეა ქალბატონი ეთერი და ნახევარი გადავუფორმე მას. ვაჩუქე 2016 წელს. მერაბი ჩემი მამიდაშვილიშვილია”, _ ამბობს საჯაია.
ჩვენს კითხვებს პასუხობს გურიის გუბერნატორი მერაბ ჭანუყვაძეც და განმარტავს, რომ 2008 წელს, როცა ეს მიწა ეკონომიკის სამინისტრომ გამოიტანა აუქციონზე, ოჯახმა გადაწყვიტა, მიეღო მონაწილეობა ამ აუქციონში და სწორედ ამ გზით მოხდა ქონების დაბრუნება.
_ ბატონო მერაბ, თქვენს დეკლარაციაში ასახულმა მიწის ნაკვეთმა, რომლის მეპატრონე თქვენი დედაა, საზოგადოების მაღალი ინტერესი გამოიწვია. საქმე ეხება სუფსაში არსებულ რამდენიმე ჰექტარ მიწის ნაკვეთს. კონკრეტულად რომელ ნაკვეთზეა საუბარი?
_ ჩემს დეკლარაციაში ასახული მიწის ნაკვეთი წლების წინ ეკუთვნოდა დედაჩემის ბაბუას, რომელიც მას კომუნისტების დროს ჩამოართვეს, სულ ჯამში 22 ჰექტარი იყო. შემდეგ იჯარითაც ჰქონდათ აღებული კონკრეტული ნაკვეთი, იჯარის ხელშეკრულების გაუქმების შემდეგ, 2008 წელს, ეს ნაკვეთი ეკონომიკის სამინისტრომ გამოიტანა აუქციონზე. ოჯახმა გადაწყვიტა მიეღო მონაწილეობა აუქციონში და სწორედ ამ გზით მოხდა ქონების დაბრუნება.
_ როგორც საბუთებიდან ირკვევა, აღნიშნული მიწის ნაკვეთი 2008 წელს 3 500 ლარად არის გამოსყიდული, შემდეგ კი, 2009 წელს გასხვისდა, 2010 წელს კი ისევ უკან გამოისყიდა სუფსაში მცხოვრებმა აკაკი საჯაიამ. 2016 წლის ნოემბერში 2 ნაკვეთი, საერთო ჯამში 11 ჰექტარზე მეტი, რომლის ფასიც, როგორც ჩვენი წყარო ამტკიცებს, დაახლოებით 110 000 ლარის ღირებულებისაა, აჩუქა ქალბატონ ეთერის. როგორც ერთ-ერთი ჩვენი წყარო ამბობს, ეს იყოს დაკავშირებული რაიმე კორუფციულ გარიგებასთან…
_ რაც შეეხება ქონების გადაფორმებას, დედაჩემი სწორედ ისეთივე სამართალმემკვიდრე იყო აღნიშნული ნაკვეთის, როგორიც აკაკი საჯაია. მოხდა გაყოფა და 13 ჰექტარი საჯაიამ გადმოუფორმა დედაჩემს.
რაც შეეხება კორუფციაში დადანაშაულებას, ეს მართლაც სასაცილოა _ კონკრეტულ დაჯგუფებას, რომელსაც ფანტაზიაც აღარ ყოფნის, რომ როგორმე ჩემი პიროვნება ცუდ კონტექსტში წარმოაჩინონ, იმედი უნდა გავუცრუო _ მე მინდა საზოგადოებას განვუმარტო და არა თქვენს ინფორმატორს, რომ მზად ვარ ნებისმიერ თემაზე პასუხი გავცე ღიად, საჯაროდ, იმისთვის, რომ ყველამ გაიგოს, რომელ მხარეს დგას სიმართლე. ასევე, ნებისმიერ დაინტერესებულ პირს თვალსაჩინოებისთვის შეუძლია, ნახოს დაჭაობებული საძოვარი და გთხოვთ, თქვენც მოინახულოთ.
ეს ჭორი ისეთივე სიბინძურეა, როგორსაც ბოლო თვეებია ატრიალებენ, თითქოს მე ვინმეს მიწა გავუყიდე. ეს მაშინ, როცა არანაირი შემხებლობა არ მქონდა და ვერც მექნებოდა კონკრეტულ გადაწყვეტილებასთან! საკუთრების უფლებას ჩვენს ქვეყანაში ვერავინ დაარღვევს! _ ამბობს მერაბ ჭანუყვაძე.
