ერთი კვირაც და სასწავლო წელი დაიწყება. პანდემიის პირობებში სასწავლო წლის დაწყება და პროცესების წარმართვა, ახალი გამოწვევაა სრულიად განათლების სისტემისთვის, რაც მარტივი პროცესი არ არის და საქართველოს პედაგოგთა დიდ არმიას, ახლა განსაკუთრებული მზადყოფნის პოზიცია უჭირავს.
რა ხდება სკოლებში? სკოლაში ფეხის შედგმის მომენტიდან დაწყებული, არის უამრავი ნიუანსი, რასაც სხვა დროს, ყურადღება ნაკლებად მიექცეოდა, ახლა კი ზედმეტად თვალის მიდევნებასაც ითხოვს. ძ როგორ და რა ნაკადით შევლენ მოსწავლეები სკოლაში და ამავე , როგორ გადაადგილდებიან? ჰყოფნის თუ არა ერთმეტრიან დისტანციებს მხოლოდ მერხების დაშორება, ჩატარდება თუ არ თერმოსკრინინგი სრულყოფილად, ყურადღების მაქსიმუმით იქნება თუ არა დაცული სისუფთავის ხარისხი, იქნება თუ არა სამყოფი სასმელი თ ტექნიკური წყალი და ასე შემდეგ.
„გურია ნიუსი“ ოზურგეთის მეოთხე საჯარო სკოლას ეწვია. მაინც როგორ იწყებს ახალ სასწავლო წელს ინოვაციებით ცნობილი დირექტორი ტარიელ კალანდაძე და რას აპირებს თუ მოულოდნელად საგანგებო რეჟიმი ამოქმედდება? ცნობილია, რომ პანდემიამდე დიდი ხნით ადრე, ახალი სასწავლო წლის შესახვედრად, უკვე მერამდენე წელია, ოზურგეთის მეოთხე საჯარო სკოლაში ტრადიციული საპირველსექტემბრო ზეიმით არ იწყებს და მოსწავლეები გაკვეთილებზე პირდაპირ შედიან, ყოველგვარი საკონცერტო შეკრების გარეშე.
ჩვენ, პირველ რიგში, დირექტორს, ტარიელ კალანდაძეს ვესაუბრეთ:
_ჯერ სამზადისზე გეტყვით. მოწესრიგებულია სასმელი წყლის, ტუალეტების ჰიგიენური მხარე. შემოსასვლელიდანვე იგრძნობა სამზადისი, ნახავდით, დეზობარიერი რა ფორმით გავაკეტეთ. სასწავლო წელს, პანდემიის პირობებიც რომ არ იყოს, ჩვენ დიდი ხანია, ვიწყებთ პირდაპირ გაკვეთილებზე შესვლით. გეტყვით, როგორ აღვნიშნავთ. შესაძლოა, სხვებსაც დაუჯდეთ ჭკუაში. ჩვენ, სამ წელზე მეტია, სამი დღით ადრე, ვიდრე სწავლა დაიწყება, საზეიმო სვლით ვიწყებთ. მასწავლებლები, მოსწავლეები და მშობლები ვიკრიბებით სკოლასთან. _ ვანთებთ დიდ კოცონს, ვატარებთ კონცერტს. სხვა მგრძნობიარობა და ხალისი ახლავს , საზაფხულო დასვენების შემდეგ, ასეთ შეხვედრას. ხალისიანი ხმები ცას წვდება. მას შემდეგ, რას ახალი სასწავლო წლის ასეთი „გახსნა“ დავგეგმეთ, სამი წელია და თანამოაზრეთა არმია მოგვემატა. ისეთი მხიარულობა არის ხოლმე, შინ წასვლა გვიან ღამემდე არ სურთ. სწავლის დაწყების დღეს კი, ყოველგვარი ცერემონიალის გარეშე, ბავშვები შედიან კლასებში და პირდაპირ იწყება საგაკვეთილო პროცესი. რას ვაპირებთ პანდემიის პირობებში? ზუსტად იგივე საზეიმო პროცესს, ყოველგვარი რეგულაციების დაცვით , გადავიღებთ კლასებში, სკოლის წინ და ვიდეო რგოლის მეშვეობით მივულოცავთ ახალ სასწავლო წელს , როგორც ჩვენს სკოლას, ისე მთელ საქართველოს! _ გვითხრა სკოლის დირექტორმა, ტარიელ კალანდაძემ.
კითხვაზე, თუ პანდემია გააქტიურდა და კვლავ გადაიდო სწავლის დაწყების თარიღი, რა გეგმა აქვს მას, ასეთ მოსაზრებას გვთავაზობს:
_ გეტყვით ჩემი გეგმის შესახებ, რაც არავის დაუვალებია და არის ჩემი მოსაზრება. დიდი ალბათობით, სწავლა დაიწყება. ასეთ შემთხვევაში ბავშვები მოდიან და ჩვეულებრივ საგაკვეთილო პროცესი მიდის. თუ გამოცხადდება საგანგებო მდგომარეობა, პირდაპირ ონლაინ სწავლებაზე გადავდივართ. სასკოლო სასწავლო გეგმებში მითითებულია, როგორ გადავიდეთ ჩვეულებრივ სასწავლო პროცესიდან ონლაინ სწავლებაზე. ამის გამოცდილება ცოტათი მოგვცა გასულმა წელმა. არაა უბედურება, ონლაინ სწავლება. არაფორმალური განათლება, ონლაინ სწავლების დროს, ისეთივე მნიშვნელოვანია, როგორც საგაკვეთილო პროცესი. ოღონდ ზუსტად ისეთივე პასუხისმგებლობით უნდა აკეთო საქმე, როგორც გაკვეთილზე ყოფნისას, ჩვეულებრივ სასწავლო პროცესში. ამასთანავე, მშობლებთან კომუნიკაცია ძალზე მნიშვნელოვანია. განსაკუთრებით მოეწონათ მშობლებს , სკოლის დაწყებამდე, ღია ცის ქვეშ გამართული კრებები. კვლავ ვაგრძელებთ მშობელთა კრებების ჩატარებას კულტურის და დასვენების პარკში, რომელიც სკოლის წინ მდებარეობს და ამ მხრივ გაგვიმართლა, _ გვითხრა მან.
მეოთხე კლასის დამრიგებელს, თეა კიკალიშვილს, საკლასო ოთახში უკვე ყველაფერი დალაგებული და გამოკრული აქვს, თვალსაჩინოებით დაწყებული და მერხების განლაგებით დამთავრებული. ხოლო პირველი კლასის ხელმძღვანელი , ნათია ბოლქვაძე, სანტიმეტრით ხელში, საგანგებოდ ზომავდა მერხებს შორის მანძილს, რომ დისტანციური ველი მილიმეტრითაც არ დაერღვია.
მეხუთე კლასის ხელმძღვანელი, პედაგოგი მაია სურგულაძე გვეუბნება, რომ რაკი კლასში ბევრი მოსწავლე არ არის და ცვლაში გადასვლა არ დასჭირდათ, დისტანცია ერთ მეტრზე მეტია მერხებს შორის.
კმარა თუ არა მხოლოდ ერთი მეტრით ან მეტრნახევრით მერხების ისე დაშორება, რომ მოსწავლემ მერხი არ ამოძრაოს, არ მოხდეს გადაადგილება ან რომელიმე მიმართულებით გაჩოჩება, პედაგოგი ამბობს, რომ ამისთვის ფერადი სპრეის მეშვეობით კეთდება ნიშნულები გულების თუ ყვავილების ფორმებით, მერხის ფეხთან. მოსწავლე ვალდებული იქნება, ნიშნულს მიაქციოს ყურადღება და არ გასწიოს მერხი ნიშნულს იქეთ.
კითხვებზე, მოსწავლეები როგორ ივლიან ორ ცვლაში ისე, რომ ერთმანეთს დასცილდნენ ერთი ან ორმეტრიანი დისტანციით? მაკონტროლებელი დაინიშნება თუ როგორ მოხერხდება ეს?… ბავშვი ბავშვია და გაკვეთილი შესაძლოა, ყველამ კარგად ისწავლოს, თუმცა მოძრაობა და გადაადგილება ყოველ წუთს, დაზეპირებული მდგომარეობის დაკავებით, გაუჭირდება თუ არა? მასწავლებლები დამლაგებლებად ხომ არ უნდა იქცნენ? როგორ მოხდება საკლასო ოთახების განიავება, დასუფთავება, ჰყოფნით თუ არა რესურსი?
ტარიელ კალანდაძე მიიჩნევს, რომ ეს კითხვები და უამრავი სხვა, რომელიც ახლა, პანდემიის პირობებში და უამისოდაც გაჩნდება, იმ დიდი გეგმის ნაწილია, რასაც მეოთხე საჯარო სკოლის განათლების სამინისტროს და მასწავლებელთა სახლის ერთობლივ პროექტში ჩართვა ჰქვია.
_ ეს პროექტი გულისხმობს საკლასო ოთახში ეროვნული სასწავლო გეგმის შეტანას და გახორციელებას. ამიტომ ჩვენ მობილიზებული ვართ, თითოეული ნიუანსის დაწყებული, ყველაფერი ისე გავაკეთოთ, პანდემიის პირობებშიც კი ვაჩვენოთ ქვეყანას, თუ როგორ შეიძლება შეუძლებლის გაკეთებაც! წინასწარ ვულოცავ მთელ საქართველოს, ჩვენი სკოლის თითოეულ მოსწავლეს და მასწავლებელს ახალი სასწავლო წლის დაწყებას! _ გვითხა მან.
