გურიამ ტურიზმის ფესტივალს პირველად უმასპინძლა. ქალაქ ოზურგეთში “ჭადრების ბაღში“ გამართულ ღონისძიებაზე უამრავი სტუმარი იმყოფებოდა.
ევროკავშირის წარმომადგენელმა საქართველოში დომენიკა სკუბიდამ შეხვედრის დროს მადლობა გადაუხადა გურულებს გამორჩეული მასპინძლობისთვის.
“მინდა, დიდი მადლობა გადავუხადო ყველა გურულს ასეთი მასპინძლობისთვის და სტუმართმოყვარეობისთვის. ასეთი გამორჩეული კუთხე ნამდვილად არ არის საქართველოში. ეს პროექტი ხელს უწყობს გურიის ოთხივე მუნიციპალიტეტის ჩართულობას ტურიზმის სტრატეგიის განვითარებაში“, _ აღნიშნა თავისი სიტყვის გამოსვლის დროს დომენიკა სკუპიდამ.
შეხვედრაზე ქალაქ ოზურგეთის მერმა, ბეგლარ სიორიძე ტურიზმის მნიშვნელობასა და განვითარებაზე ისაუბრა.
“გურიის რეგიონს მართლაც აქვს უმნიშვნელოვანესი რესურსები, რომ იგი საქართველოს ერთ-ერთ საინტერესო და ტურისტებისათვის მიმზიდველ ადგილად იქცეს. ამ მხრივ, ნამდვილად გვაქვს საამაყო, რადგან გურია რელიეფურად მთისა და ზღვის უნიკალურ კურორტებს აერთიანებს.
თქვენ ხედავთ, რომ ამჟამად ოზურგეთში ფოლკლორის ცენტრის მშენებლობა მიმდინარეობს, ასევე, ხედავთ, რომ ხორციელდება უდიდესი პროექტი _ ოზურგეთის სახელმწიფო დრამატული თეატრის მასშტაბური რეაბილიტაცია. ოზურგეთი ყოველთვის გამოირჩეოდა არაჩვეულებრივი თეატრალური ცხოვრებით, მსახიობებითა და ტრადიციით, რაც ამ ქალაქის სავიზიტო ბარათია.
ოზურგეთი ამაყობს ისტორიული მუზეუმით და ექვთიმე თაყაიშვილის სახელობის მუზეუმ-ნაკრძალით, სადაც ჩვენი წარსულის უნიკალური ექსპონატებია დაცული.
რაც შეეხება ტურიზმის განვითარებას, ამ მხრივ, ვფიქრობ, რომ გურიას ნამდვილად უნდა ჰქონდეს პირველობის ამბიცია, რადგან აქ უნიკალური კურორტების კომპლექსია თავმოყრილი. იშვიათად მოიძებნება მხარე, სადაც ტურისტს საშუალება ეძლევა ზღვიდან მთამდე ერთი ნაბიჯი აშორებდეს. მაგნეტიტით ცნობილ საზღვაო კურორტ ურეკიდან სამთო კურორტ გომისმთამდე მანძილის დაფარვას, სულ რაღაც, 60 წუთი ესაჭიროება.
სამთო კურორტებით გურია ნამდვილად განებივრებულია. ჩოხატაურის მუნიციპალიტეტში არსებული კურორტი ბახმარო, ვიტყოდი, რომ მსოფლიოს სხვა სამკურნალო თვისებების მქონე კურორტებს არ ჩამოუვარდება“, _ თქვა შეხვედრაზე ბეგი სიორიძეს.
პროექტის დირექტორმა ნანა თავდუმაძე ჩვენთან საუბრის დროს აღნიშნა, რომ ყველაზე მნიშვნელოვანი ის არის, რომ გურიას ექნება ტურიზმის განვითარების სტრატეგია
“ძალიან აქტიურად არის ამ პროექტში ჩართული ოთხივე მუნიციპალიტეტი და ორი არასამთავრობო ორგანიზაცია სამოქალაქო განვითარების ინსტიტუტი და ახალგაზრდა მეცნიერთა კლუბი. ჩვენ ერთად ვიღებთ გადაწყვეტილებას და ერთად ვქმნით გურიის ტურიზმის სტრატეგიას. ეს ფესტივალი არის ერთგვარი მოსაწვევი, რომ იწყება ოთხდღიანი განხილვა ტურიზმის პერსპექტივებზე. რაც მთავარი და მნიშვნელოვანია, გურიას ტურიზმის სტრატეგია ექნება რეალური“, _ გვითხრა ნანა თავდუმაძემ.
