ქალაქ ოზურგეთში, მოსკოვის ქუჩაზე მოუწესრიგებელი, ამოვსებული და დეფორმირებული არხების პრობლემა, როგორც აქ მცხოვრებნი გვიამბობენ, სამი ათეული წელია, აწუხებთ. “გურია ნიუსი” ამ პრობლემის შესახებ წლის დასაწყისში წერდა, თუმცა, ქუჩის მცხოვრებლებმა ამჯერადაც გვიხმეს და გვთხოვეს, ადგილზე მივსულიყავით და კიდევ ერთხელ გავცნობოდით აქ არსებულ რთულ მდგომარეობას.
_ საკრებულომ რეკლამა გასწია, ელექტრონული პეტიცია სიახლეა და განსაკუთრებით დაეხმარება ჩვენს მცხოვრებლებსო. ჩვენც ავდექით და სასწრაფოდ ვაფრინეთ ხელისუფლებასთან ელექტრონული თხოვნა, თორემ განცხადებებს 26 წელია, დავაფრიალებთ. რად გინდა? დაპირებამ იმატა ელექტრონული სიხშირით. ნახეთ ჩვენი ქუჩის გასწვრივ მდებარე არხები, პატარა მდინარე ნაბჟუარას კალაპოტი. ერთი გაწვიმება საკმარისია და იხვებივით წყალში ვცურავთ, _ ამბობენ აქ მცხოვრებლები.
_ ყველაზე ძალიან მე ვზარალდები, იმიტომ, რომ გზის დაბლა ვცხოვრობ. ჯერ ისეთი დახშული და ამოვსებულია არხები თუ გზის ქვეშ მდებარე წყალგამტარი მილები, ყველა ეზო გაწვიმებისთანავე იტბორება, მე კი პირველ სართულზე საერთოდ ვერ შევდივარ. ახლახან 80 წლის მეზობელმა სამადლოდ ამოწმინდა არხი. ტრაქტორი ჰყავს და შევეხვეწე. ასე სანამ უნდა ვიყოთ?! წვიმის დროს ჩემს სახლში, პირველ სართულზე ყველა ოთახი დატბორილია. არხები ძალიან მალე ივსება სხვადასხვა ნაგვით, ქვიშით და ნატანით. სანამდე უნდა ვიყოთ ცარიელი დაპირების ამარა?_ ამბობს მოსკოვის მცხოვრები გალინა იურიევა.
აქაურები განსაკუთრებით კატეგორიული არიან ქუჩის გასწვრივ ნაბჟუარას არხში ჩაცემენტებული, გაზის მთავარი მაგისტრალის საყრდენი ბოძების გამო, რომელსაც ფუნდამენტი უკვე შემოცლილი აქვს და არავინ იცის, როდის წაიქცევა.
_ მობრძანდით, გადაუღეთ და ფოტო კარგად რომ დაინახონ, ისეთ ადგილზე დადეთ. რომ წაიქცეს ეს კონსტრუქცია და ალბათ, ასეც იქნება, თუ სასწრაფოდ არ ეპატრონა ვინმე, უდიდესი საფრთხის წინაშე ვდგავართ. აქვე, გვერდით, რამდენიმე მეტრში ენერგოსისტემის ცენტრალური ქვესადგურია. წარმოიდგინეთ, ერთმანეთზე დაყრილი ეს ყველაფერი. ნუთუ ვინმე უნდა შეეწიროს ამ არხების მარადიულ პრობლემას? _ გვეუბნება აქ მცხოვრები ნანი გოგოლაძე.
_ აქ არსებული მდგომარეობას აღწერა რად უნდა, შეხედეთ, გაიარეთ ასი მეტრი და ჩვენი კომენტარის გარეშე მიხვდებით, რაც გვჭირს. მოხუცი ხალხი გაჭირვებით წმენდს არხებში ჩასილულ ნაგავს. ჭირმა თავი არ დამალაო, ისე გვჭირს. ამ ქუჩას, ისევე, როგორც ოზურგეთის უმეტეს ქუჩებზეა პრობლემა, არ გააჩნია საკანალიზაციო სისტემა და ზოგს ტუალეტის მილი, უკაცრავად და პირდაპირ არხზე აქვს მიერთებული. წყალდიდობისას ხსნიან და მაშინ ხომ აქ ვერ გაჩერდები, ყარს ყველაფერი. გვითხრეს, რომ ეს ცენტრალური ხელისუფლების მოსაგვარებელია, ადგილობრივი ძალებით შეუძლებელიაო და დავანებეთ თავი. ამ მხრივაც მოლოდინის რეჟიმში ვართ, მაგრამ არხების მოწესრიგება, ჯებირების ამაღლება, გზებზე მდებარე წყალგამტარი მილების ხიდებით შეცვლა და კალაპოტის გაფართოება როდის უნდა მოხდეს? იგეგმებაო, მოგვწერეს ელექტრონულ პეტიციაზე. იგეგმება, რას ჰქვია? დრო და მიახლოებული თარიღი არ არსებობს? _ გვეუბნება აქ მცხოვრები რეზი ხუნდაძე.
ამავე ქუჩის მკვიდრი ლიდა ბუცხრიკიძე ამბობს, რომ ხელისუფლების წარმომადგენლები აქ დაახლოებით, ასჯერ იყვნენ:
_ არ მოდიანო, როგორ ვიტყვით?! მაგრამ ასჯერ მოსვლა, ასჯერ დაპირება ერთხელ საქმით ხომ უნდა შეიცვალოს? სულ ცოტა, 26 წელია, დაპირებებს ვისმენთ. საშველი როდის დაგვადგება, ეს გვაინტერესებს. მალე ზამთარი მოვა და პრობლემა გაძლიერდება. ნაბჟუარას არხში წყალი სულ მოედინება. ცოტა წვიმაც საკმარისია, რომ წყალი სახლში შემოვარდეს. სილითაა ამოვსებული დახურული წყალგამტარი მილები, რომლებიც გზებს კვეთს და ნიაღვარს არ ატარებს. ამიტომ ეს ქუჩა წვიმების დროს მდინარის კალაპოტი გეგონება, ისე მიედინება ზემოდან წყალი. მანქანები მოძრაობას აჩერებენ, ბავშვებს შიშით ვუყურებთ, რომ პატარები ამ დროს ქუჩაში არ მოხვდნენ და წყალმა არხში არ გადაიტანოს. მოაგვარონ ეს საქმე დროულად. მადლობა დაპირებისთვის, მაგრამ ამდენი დაპირება და “იგეგმებას” ძახილი, მოსაბეზრებელი და გამაღიზიანებელია, _ გვეუბნება აქ მცხოვრები ლელა მახარაძე.
“გურია ნიუსი” აღნიშნული პრობლემის შესახებ ოზურგეთის მუნიციპალიტეტის მერიას დაუკავშირდა.
“აღნიშნული პრობლემა მერიის ინფრასტრუქტურის სამსახურისთვის ცნობილია. ამ სანიაღვრე არხების საპროექტო-სახარჯთაღრიცხვო დოკუმენტაციის შესადგენად გამოცხადებულია ტენდერი, რადგან არხების პრობლემა სხვა ქუჩებზეც არის და ერთდროულად უნდა მოხდეს მოწესრიგება. ამ პროცედურების დასრულების შემდეგ, თანმიმდევრულად დაიწყება სამუშაოები, აუცილებლად გაკეთდება ყველა არხი. წლების მანძილზე არსებული ეს პრობლემა, უახლოეს პერიოდში აუცილებლად გადაიჭრება”, _ გვითხრეს მუნიციპალიტეტის მერიის პრესსამსახურში.
“გურია ნიუსი” თვალს მიადევნებს მოსკოვის ქუჩაზე არხების მოწესრიგების საქმეს.
