ელზა სიმონიშვილი: ჰანტავირუსი ოზურგეთისთვის უცნობი არ არის- რა ვითარებაა მუნიციპალიტეტში?

ჰანტავირუსი არ გახლავთ ახალი და უცნობი ინფექცია,_ ამის შესახებ “გურია  ნიუსს” ოზურგეთის საზოგადოებრივი ჯანდაცვის ცენტრის ეპიდემიოლოგმა ელზა სიმონიშვილმა განუცხადა.

ეპიდემიოლოგის თქმით,  წინა წლებში ოზურგეთში ჰანტავირუსის რამდენიმე შემთხვევა დაფიქსირდა.

“ჩვენს მუნიციპალიტეტშიც  გვიფიქსირდებოდა ჰანტავირუსის ლაბორატორიულად დადასტურებული შემთხვევები, მაგალითად:

2018 წ -2 შემთხვევა,

2022 წ–2 შემთხვევა,

2024 წელს 1 შემთხვევა.

აღსანიშნავია, რომ დაფიქსირებული შემთხვევების უმეტესობა სავარაუდოდ მღრღნელების ბიოლოგიურ სითხეებთან ადამიანის კონტაქტს უკავშირდებოდა”,_ ამბობს ელზა სიმონიშვილი.

ეპიდემიოლოგის თქმით, ჰანტავირუსის დიაგნოზის ლაბორატორიულად დადასტურების შემდეგ ოზურგეთის საზოგადოებრივი ჯადაცვის ცენტრის მიერ იქნა განხორციელებული პროტოკოლით გათვალისწინებული ღონისძიებები:

განხორციელდა ეპიდკვლევა ეპიდემიოლოგის მიერ და მონაცემები დაფიქსირდა ,,დზეის“ (დაავადებებზე ზედამხედველობის ერთიანი ეროვნული სისტემა) პროგრამაში

დადგინდა სავარაუდო ინფიცირების წყარო,

შესწავლილი იქნა კონტაქტები და შეფასდა ეპიდემიოლოგიური რისკები,

ინფორმირებული იქნა და კონტაქტების  კლინიკურ სიმპტომებზე ზედამხედველობის განხორციელებაში ჩართული იქნა პირველადი ჯანდაცვის ორგანიზაციები(სოფლის ამბულატორიები),

ჩატარდა პრევენციული საინფორმაციო შეხვედრები

აღნიშნულის შედეგად პროცესი იქნა იმგვარად მართული, რომ თავიდან ავიცილეთ ჰანტავირუსული ინფექციის ლოკალური და უფრო მასშტაბური ეპიდაფეთქების საფრთხე.

 როგორც ცნობილია, ჰანტავირუსი მღრღნელებს გადააქვთ.

ელზა სიმონიშვილი ამბობს, რომ მიმღებლობა საყოველთაოა,ანუ შეიძლება დაავადდეს ნებისმიერი ასაკის ადამიანი თუმცა, რისკის ჯგუფში შედიან სოფლის მეურნეობის მუშაკები, სამხედროები, მოგზაურები.

ვირუსის. რეზერვუარს წარმოადგენს – ჰანტა ვირუსით ინფიცირებული მღრღნელები.

გადაცემის გზები – კონტაქტური, ალიმენტური(საკვებისმიერი) ინჰალაციის(შესუნთქვის) გზით (ვირუსის ჰაერში მოხვედრით მღრღნელის შარდის, ფეკალიების, ნერწყვის და ბუდის მასალებიდან).

ასევე შესაძლებელია ადამიანიდან ადამიანზე გადაცემა დაავადებული (ცოცხალი ან გარდაცვლილი) ადამიანის დაინფიცირებულ ბიოლოგიურ სითხეებთან კონტაქტის შედეგად.

ინკუბაციური პერიოდი – ფილტვის ფორმის შემთხვევაში  სიმპტომების გამოვლენა ხდება ექსპოზიციიდან 1-5 კვირის შემდეგ,

ხოლო თირკმლის ფორმის შემთხვევაში სიმპტომები ვლინდება ექსპოზიციიდან 8 კვირის განმავლობაში.

გადამდებლობის პერიოდი  მოიცავს პერიოდს  დაავადებული ადამიანის სისხლთან და ბიოლოგიურ სითხეებთან კონტაქტისას და  განსაკუთრებით სიმპტომების დაწყებიდან 1 კვირას.

კლინიკურად ჰანტა ვირუსით გამოწვეული ჰემორაგიული ცხელება არსებობს ორი ძირითადი სახის:

1. ჰემორაგიული ცხელება ფილტვის სინდრომით –რესპირატორული დაავადება, რომელიც უპირატესად აზიანებს ფილტვებს
2. ჰემორაგიული ცხელება თირკმლის სინდრომით — უპირატესად აზიანებს თირკმელებს.

რაც შეეხება სიმპრომებს, ელზა სიმონიშვილი გვეუბნება, რომ ჰანტა ვირუსის ფილტვის  სინდრომი – ახასიათებს ცხელება, ზოგადი სისუსტე,  სურდო, ხველა, ყელის ტკივილი, მიალგია,  სუნთქვის უკმარისობა, რაც შეიძლება გადაიზარდოს მწვავე კარდიო–პულმონარულ ფაზაში და გამოიწვიოს გულ-სისხლძარღვთა სისტემის უკმარისობა.

ჰემორაგიული ცხელება თირკმლის სინდრომით-  საწყისი სიმპტომებია: ცხელება, თავის ტკივილი, კუნთების ტკივილი, ტკივილი მუცლის არეში, შეიძლება გადიდდეს ღვიძლი და ელენთა. გახშირებული გულის ცემა და სისხლის წნევის შემცირება. სახის კისრის, გულ–მკერდის ზედა ნაწილის სიწითლე, კონიუნქტივიტი, მე–3–4 დღიდან გამონაყარი, მოგვიანებით ვლინდება ჰემორაგიული მოვლენები: სისხლჩაქცევები სკლერაზე, მიოკარდიუმში, ფილტვებში, თავის ტვინში, სხვა ორგანოებში და სისხლდენები.    დამახასიათებელია თირკმლის სინდრომი – მცირდება დიურეზი,(შარდის რაოდენობა), ვითარდებაბევრი თირკმლისმიერი გართულება,, რასაც მოსდევს  თირკმლის კაფსულის გასკდომა.

 პრევენციული ღონისძიებები კი ეპიდემიოლოგის თქმით  მოიცავს შემდეგ ღონისძიებებს:

მღრღნელების წინააღმდეგ ბრძოლა

პირადი ჰიგიენის–განსაკუთრებით ხელების ჰიგიენის მკაცრი დაცვა

დამახასიათებელი  კლინიკური ნიშნების გამოვლენისთანავე ინფიცირებულმა დროულად უნდა მიმართოს სამედიცინო დაწესებულებას, რათა ექიმის მიერ მოხდეს  ზუსტი კლინიკური დიაგნოსტირება და შესაბამისი მკურნალობა, როგორც ამბულატორიულ, ასევე ჰოსპიტალიზებულ შემთხვევაში და ჩატარებული იქნას  ცხელებით მიმდინარე სხვადასხვა დაავადებების დროს შესაბამისი  ლაბორატორიული კვლევა.

აღნიშნული პრევენციული ღონისძიებებით თავიდან ავიცილებთ ჰანტა- ვირუსის ეპიდ აფეთქებასაც და ჯგუფური ლოკალური შემთხვევების აღმოცენება-გავრცელებასაც.

ინფორმაციისთვის, ჰანტავირუსის სავარაუდო გავრცელების გამო, არგენტინასა და კაბო-ვერდეს შორის მოძრავ საკრუიზო გემზე სამი ადამიანი დაიღუპა.