ერევა თუ არა დეპუტატი წილოსანის ქმარი საარჩევნო პროცესში _ “თავს ვერ დავდებ”

„ქართული ოცნება” ადგილობრივი თვითმმართველობის არჩევნებზე წარსადგენი მაჟორიტარი კანდიდატების ვინაობაზე საბოლოო კონსულტაციებს გადის.

ადგილობრივი რაიონული ორგანიზაციებიდან ცენტრალურ ოფისში სავარაუდო კანდიდატურები უკვე გაიარეს, თუმცა, სია არ დამტკიცებულა.

როგორც მმართველი პარტიის ცენტრალურ ოფისში გვეუბნებიან, კორექტირება კიდევ მოხდება. თუმცა, არც იმას მალავენ, რომ ძირითადი ნაწილი უკვე შეთანხმებულია. მათ შორის, ჩოხატაურის მუნიციპალიტეტის სოფლების მაჟორიტარობის კანდიდატები, რომელებიც ცოტა ხნის წინ  საგანგებო შეხვედრაზე აარჩიეს.

ჩვენ მიერ მოპოვებული ინფორმაციით, შეხვედრაზე, რომელსაც ლანჩხუთისა და ჩოხატაურის მაჟორიტარი დეპუტატი ნინო წილოსანი, გურიის გუბერნატორი გია სალუქვაძე, პარტიის რეგიონული ოფისის ხელმძღვანელი ირაკლი კუჭავა, აღმასრულებელი მდივანი ბექა გამდლიშვილი,“ოცნების“ გურიის კურატორი კობა დუნდუა და ცენტრალური ოფისის წარმომადგენელი ესწრებოდნენ, კანდიდატურების შესახებ დიდხანს მსჯელობდნენ.

ჩვენ მიერ მოპოვებული სიის თანახმად, „ოცნების“ ჩოხატაურელ მაჟორიტართა სია, რომელმაც შესაძლოა, ცვლილება კიდევ განიცადოს ასე გამოიყურება :

დაბა ჩოხატაური _ დავით ბერძენიშვილი; ბუკისციხე _ ქეთევან სიხარულიძე, ამაღლება _ ზვიად წეროძე, შუა ამაღლება _ ვლადიმერ სიხარულიძე, გოგოლესუბანი _ აკაკი ყაჭეიშვილი, გორა _ დავით ტყეშელიაძე , გუთური _ ლაშა თოლორდავა; დაბლაციხე _ გოჩა ჯიქია, დიდივანი _ ასალო რამიშვილი, შუა სურები _ შორენა ტრაპაიძე, ზემო სურები _ ოთარ სოროზანიშვილი, ერკეთი _ ნატო ჩანტლაძე; ზემოხეთი _ ერეკლე უღრელიძე, ზოტი _ უშანგი ართმელიძე, ნაბეღლავი_ ალექსანდრე შარაშიძე, ხიდისთავი _ კობა კალანდაძე, კოხნარი _ დავით ვაჩეიშვილი, ბუკნარი _ დავით გუდავაძე, ხევი _ ზვიად მამალაძე, საჭამიასერი _ ბესიკ ყენია,  ფარცხმა _ შოთა ცინცაძე.

ამ ეტაპისთვის ვერ შეჯერდნენ ჯვარცხმასა და  ზომლეთში წარსადგენ კანდიდატებზე.  ჩვენი ინფორმაციით, ამ სოფლებში მაჟორიტარ დეპუტატს მისი რჩეულები ჰყავს, პარტია კი არ ეთანხმება _ როგორც გვითხრეს, წილოსანს ჯვარცხმაში დავით თოდრია უნდა, პარტიას კი ამირან ბასილია, ხოლო ზომლეთში თემურ ხუხუნაიშვილი, სადაც პარტია გია თავაძეს უჭერს მხარს.

წილოსანის მიერ მხარდაჭერილ ორივე კანდიდატთან დაკავშირებით რომ შეკითხვებია, როგორც აღმოჩნდა, არ იცის თავად დეპუტატმა.  არადა, როგორც თოდრია, ასევე ხუხუნაიშვილი „ნაციონალური მოძრაობის“ ხელისუფლებაში ყოფნის დროს, ამავე პარტიის გასამარჯვებლად ყველაფერს აკეთებდნენ _ ჟურნალისტებისთვის ჟურნალისტურ საქმიანობაში ხელის შეშლა, ოპოზიციონერთა აქციაზე წამსვლელი პირების ვიდეოფირზე დაფიქსირება, ოპოზიციონერთა დევნა _ ეს მცირე ჩამონათვალია მათი ქმედებებისა, რომელთა დამადასტურებელი ფაქტები „გურია ნიუსის არქივში მრავლადაა.

ნინო წილოსანი ჩვენთან საუბრისას ამბობს, რომ ამით აუცილებლად დაინტერესდება. მისივე თქმით, მაჟორიტარ კანდიდატთა სია ჯერ კიდევ განხილვის სტადიაშია და გადაჭრით არაფრის თქმა არ შეიძლება:

_ სისტემატურად გვაქვს პარტიის შიგნით კონსულტაციები, მაგრამ  ჯერჯერობით, გადაწყვეტილი და მხარდაჭერილი არც ერთი კანდიდატი არაა. იმ შეხვედრაზე, ყველამ ჩვენ ჩვენი აზრი გამოვთქვით.

_ თქვენი აზრით, ხუხუნაიშვილი კარგი კანდიდატია?

_ ჯერჯერობით, ასე აშკარად არავის ვუჭერ მხარს. თემური პიროვნულად ძალიან კარგი ადამიანი, მაგრამ არაფერი ჯერ გადაწყვეტილი არ არის.

_ მისი პოლიტიკური წარსულის შესახებ რამდენად ხართ ინფორმირებული?

_ მართალი გითხრათ, არ ვარ. რამდენჯერმე მქონდა შეხვედრა მასთან და ვიცი, რომ პოპულარობით სარგებლობს. ახლოს ნამდვილად არ ვიცნობ.

_ ეს პოპულარობა რაშ გამოიხატება _ 2012 წელს ოპოზიციაში მყოფი დღევანდელი ხელისუფლების  მომხრეების დევნაში, ჟურნალისტებისთვის სხელისშეშლაში თუ იმაში, რომ „ოცნებაში“ მრეწველების კვოტით „გადაბარგებული“ „ნაციონალების“ ოფისში რომ გადიოდა კონსულტაციებს?

_  მე ვიცი, რომ მოსახლეობაში ძალიან პოპულარულია და უყვართ. თუმცა, მართალი  გითხრათ, ძალიან ღრმად არ ვარ ამ საკითხში ჩახედული.

_ როცა კანდიდატს მხარს უჭერთ,  უფრო მეტი ინფორმაცია არ უნდა გქონდეთ მის შესახებ?

_ რაც ახლა გითხარით, იგივე ვთქვი შეხვედრაზეც. არც მეტი და არც ნაკლები არ მითქვამს  და არ მგონია, ჩემი აზრის დასაფიქსირებლად განსაკუთრებული კვლევის ჩატარება იყო საჭირო. თუმცა, აუცილებლად დავინტერესდები იმ ფაქტებით, რაზეც საუბრობთ. ეს ფაქტები თუ  გაქვთ, შეგიძლიათ მომაწოდოთ.

_ ფაქტები „გურია ნიუსის“ არქივში მრავლადაა. თუ დაინტერესდებით, ამავე არქივში იპოვით მსგავს ფაქტებს აკაკი ყაჭეიშვილზე, რომლის წარდგენასაც გოგოლესუბანში  აპირებთ, ნატო ჩანტლაძეზე, რომლის დაყენებაც ერკეთში გსურთ, დავით თოდრიაზე, რომელსაც ჯვარცხმაში თქვენ პირადად უწევთ რეკომენდაციას…

_ მე ამ სიას ვერ დაგიდასტურებთ და ჩემგან ვარაუდებზე საუბარიც არ იქნება სწორი. ჯერ ახლოსაც არ ვართ საბოლოო ვერსიასთან. ამ ეტაპზე მიმდინარეობს აზრთა გაცვლა და სიაში ბევრი კორექტირება შევა.

_ ქალბატონო ნინო, ჩვენი ინფორმაციით, კანდიდატურების შერჩევაში აქტიურად არის ჩართული თქვენი მეუღლე და რამდენიმე  მათგანს ლობირებს..

_ სიმართლე რომ გითხრათ,  ჩემი მეუღლე საერთოდ არ ერევა ჩემს საქმიანობაში და სხვასთან თუ ლობირებს, ვერ გეტყვით _ ჩემთან ნამდვილად არა.

_ თქვენთვის არ უთქვამს, რომ ბოლო დროს ამ საქმიანობით არის დაკავებული?

_ საერთოდ არანაირი კუთხით არ ერთვება ჩემს საქმიანობაში და კიდევ ერთხელ ვიმეორებ  _ თუ სხვასთან, ასე ვთქვათ, ლობირებს ვინმეს, ამაზე ნამდვილად ვერ დავდებ თავს. თუმცა, ამ თემაზე მე და ჩემს მეუღლეს საუბარი არ გვქონია. სრული დამოუკიდებლობა მაქვს ამ საკითხზე ოჯახიდან.

_  ქალბატონო ნინო, გოჩა მეგრელიშვილმა, დავით ჟღენტმა და ირაკლი კუჭავამ ჩვენთან საუბრისას აღნიშნეს, რომ გამგებლობა სურთ. ისიც გავარკვიეთ, რომ ამ საკითხზე აქტიურად მუშაობენ. თქვენ ვის უჭერთ მხარს?

_ ამ თემაზე ჩამოყალიბებული პოზიცია არ მაქვს, არც განხილვა ყოფილა და თამამად შემიძლია გითხრათ,  რომ არაფერს გიმალავთ. შესაბამისად, სამივე მათგანს წარმატებებს ვუსურვებ.

_ თქვენ ხომ ერთი ხმა გაქვთ?

_ თავისთავად, მაგრამ ამ ეტაპზე  არ არის ეს თემა აქტუალური და მის შესახებ ჩამოყალიბებული პოზიციაც არ მაქვს, _ გვითხრა წილოსანმა.

ამავე თემაზე:ვის სურს ჩოხატაურის გამგებლობა და ვინ რას არკვევს “ოცნების” პოლიტსაბჭოში

“ეს “ქართული” კი არა, “ნაციონალური ოცნებაა”

ტრენერი გამგებელი და ჟურნალისტებისთვის ხელისშემშლელი ჩინოვნიკები

გურიაში საარჩევნო ტემპერატურა მატულობს