“გურია ნიუსი” არაერთხელ წერდა, რომ ოზურგეთის მუნიციპალიტეტის სოფელ ლიხაურში ცემენტის საწარმოს აშენება იგეგმებოდა, რის თაობაზეც ლიხაურელთა მცირე ჯგუფის შეხვედრა გასულ წელს შედგა.
მაშინ აქ გარემოს დაცვის სააგენტოს წარმომადგენლებთან და შპს “ბეთლემი 2008” მფლობელებთან, რომლის ინიციატივაც იყო ამ საწარმოს აშენება, შედგა ლიხაურელთა მცირე ჯგუფის შეხვედრა. როგორც შემდეგ გავიგეთ, მოსახლეობის უდიდესმა ნაწილმა არაფერი იცოდა ამ პროექტის შესახებ.
თუმცა, უკვე როგორც იქ ისაუბრეს დეპარტამენტის წარმომადგენლებმა _ ანა ჩართოლანმა და ნინო კუდაშვილმა და შპს “მწვანე მრჩევლის” წარმომადგენლებმა _ გიორგი თევზაძემ და ლევან ოზბეთელაშვილმა, უკვე სკოპინგის ანგარიშის მოსმენა ხდებოდა.
ამის გამო, მაშინ დარბაზში მყოფი ათიოდე ლიხაურელი ძალიან გაბრაზდა და კითხვები დააყარეს სტუმრებს.
შპს “ბეთლემი 2008”-ის დირექტორმა გიორგი გორგოშიძემ და წარმომადგენელმა ილია კეჭაყმაძემ თავის მხრივ აღნიშნეს, რომ ყველაფერი შესწავლილი ჰქონდათ და საწარმოს აშენება საფრთხეს არ წარმოადგენდა არც გარემოსთვის და არც იქ მცხოვრებთათვის.
“რა სკოპინგი? ექვთიმეს სოფელს შეეშვით. ლიხაური ექვთიმე თაყაიშვილის სოფელია. აქ ეკლესიაც გვაქვს, აჭისწყალიც, ექვთიმეს მუზეუმიც და ლუკმასაც ვჭამთ. არ გვშია და არ გვწყურია. თავი დაგვანებეთ. წაიღეთ ეს საწარმო და სადმე სხვაგან, მოსახლეობისგან დაშორებულ ადგილზე ააშენეთ. აქ ხუთასიოდე მეტრიც არ არის დაშორება დასახლებულ პუნქტთან”, _ კატეგორიულად განაცხადა მაშინ რამდენიმე ლიხაურელმა. მოგვიანებით კი, მათ მთელი კვაჭალათის უბნის მოსახლეობა შეუერთდა და შედეგსაც მიაღწიეს.
როგორც ახლახან გავიგეთ, გარემოს დაცვის სამინისტრომ გაითვალისწინა მოსახლეობის მოთხოვნა და აღნიშნული ცემენტის საკუპაჟე ქარხანა აღარ აშენდება.
თუმცა, სოფელ ლიხაურში შპს “ბეთლემი 2008”-ის მიერ, ცემენტის საწარმოს მშენებლობის თემა, კარგახანს იყო აქტუალური და მოსახლეობა კატეგორიულად აცხადებდა, რომ არ დაუშვებდნენ ქარხნის მშენებლობას.
_ ჩვენ შევეწირებით ამ ამბავს და არ დავუშვებთ სოფელში ეკოლოგიურად საშიში ცემენტის ქარხნის აშენებას. აქ მთავარი ხალხის აზრია და ამ წინააღმდეგობაში ყველა ერთსულოვანია. მე პირადად, ვიმეორებ _ არაფერს დავთმობ და სანამ არ გადაიფიქრებენ აქ ქარხნის მშენებლობას, არ გავჩუმდები. რა თქმა უნდა, ადგილობრივებთან ერთად, _ გვითხრა მაშინ ლიხაურის მკვიდრმა, ლიხაურის საჯარო სკოლის ქართული ენისა და ლიტერატურის მასწავლებელმა, დოდო დონაძემ.
როგორც ადგილობრივები ამბობენ და ახსოვთ, კომუნისტური მმართველობის ხანაში, ამ ადგილზე იყო წვენების ქარხანა და ამ დროში კონკრეტულმა პირებმა გადაწყვიტეს მისი გამოიყენება ცემენტის ქარხნის ასაშენებლად.
როცა მაშინ, განხილვისას, გარემოსდაცვითი დეპარტამენტის წარმომადგენლებმა განაცხადეს, სკოპინგის ანგარიშის შესახებ, შესაბამისი განცხადება იდო გარემოს დაცვისა და სოფლის მეურნეობის სამინისტროს შესაბამის ვებგვერდზე, ასევე, სოფელ ლიხაურის მოსახლეობამ წინა დღით, მობილური კავშირის საშუალებით მიიღეს შეტყობინება ამ განხილვის შესახებ, რაც მათი აზრით, საკმარისი ღონისძიება იყო მოსახლეობის ინფორმირებულობისთვის.
დღეისთვის კი იმავე სამინისტროს ვებგვერდზე დევს განცხადება, ცემენტის საწარმოს აშენების შეჩერების შესახებ!
ყოველივე ეს კი მოსახლეობის აქტიურობამ და პერმანენტულმა ერთობლივმა წინააღმდეგობამ მოახდინა. მიუხედავად იმისა, რომ პროექტის ავტორები ამტკიცებდნენ, რომ ჰქონდათ დასაბუთებული არგუმენტები, რომლის თანახმად გატარებული იქნებოდა ეკოლოგიური საფრთხეების პრევენციული ზომები.
_ აღნიშნული გადაწყვეტილების შესახებ საერთოდ არაფერი ვიცოდით. როგორც კი გავიგეთ, რომ 2024 წლის ბოლოს ასე ვიწრო წრეში მოხდა ცემენტის ქარხნის ამოქმედების საკითხი, სასწრაფოდ შევიკრიბეთ. ფეხზე დადგნენ ახალგაზრდები, სამ დღეში შეაგროვეს ათასორასი მცხოვრების ხელმოწერა და პეტიციით მივმართეთ ოზურგეთის მუნიციპალიტეტის საკრებულოს. მოვითხოვთ, საკრებულოს სხდომამ, ლიხაურელთა თანდასწრებით განიხილოს ეს საკითხი. არ გვჯერა, რომ ეს ქარხანა მხოლოდ ცემენტის დასაფასოებელი ფუნქციით იარსებებს. როგორც გავარკვიეთ, დაიდგმება დანადგარები. თუ ცემენტის მხოლოდ დაფასოებაა საჭირო, რად უნდათ ამდენი დანადგარი? მოსახლეობასთან, ნაცვლად, მინიმუმ, ათასი მეტრის დაშორებისა, ხუთასი მეტრის სიახლოვესაა, რაც ეკოლოგიურად უზარმაზარი საფრთხეა. წავიდნენ და ააშენონ სხვაგან. არ დავუშვებთ აქ ქარხნის მშენებლობას. ნახეს გამოთხრილი ბუნკერი და იქ სურთ, ჩადგან, წვენების ქარხნის საძირკველზე. სხვაგან აშენებას მეტი დრო და სახსრები უნდა. აქ კი ადვილად მოძებნეს გამოსავალი, რათა თავიანთი საქმე გააკეთონ, _ კიდევ ერთხელ განაცხადა მაშინ მტკიცე გადაწყვეტილების შესახებ, პედაგოგმა დოდო დონაძემ.
შემდეგ შესაბამისი განცხადება 1200 ხელმოწერით ოზურგეთის მუნიციპალიტეტის მერიაში წარადგინეს, დღეს კი ლიხაურელები გვეუბნებიან, რომ სასიხარულო ინფორმაცია გაიგეს:
_ უკვე შეაჩერეს ამ ქარხნის მშენებლობა. მადლიერი ვართ “გურია ნიუსის” და “ალიონის” ჟურნალისტების _ თქვენ მაშინ ქმედითი ნაბიჯები გადადგით. სოფელმა ეს არ იცოდა. ჩვენს გვერდით დადგა მუნიციპალიტეტის მერის წარმომადგენელი, ნანა წითლიძე. ამოვისუნთქეთ, _ გვეუბნებიან კვაჭალათისუბნის მცხოვრებლები.
“გურია ნიუსი” შპს “ბეთლემის” დირექტორს, გელა კობალაძეს დაუკავშირდა და ჰკითხა, ნამდვილად შეჩერდა თუ არა აღნიშნული ცემენტის ქარხნის მშენებლობა:
_ დიახ, შეჩერდა ამ ადგილზე მშენებლობა და ჩვენ ვეძებთ სხვა ლოკაციას. მოსახლეობამ მიმართა სახელმწიფოს და გაითვალისწინეს მათი აზრი. ჩვენ ზამთარმაც შეგვიშალა ხელი _ რაღაცეები დაინგრა იქ. ახლა ვცდილობთ, მოსახლეობისგან საკმაოდ მოშორებულ ადგილზე მოვძებნოთ ადგილი, სადაც შესაძლებელი იქნება მშენებლობა. რაც მთავარია, როგორც მოსახლეობას სურდა, ყველაფერი ისე გადაწყდა, _ გვითხრა ბატონმა გელამ.
მანამდე, რამდენიმე თვით ადრე მან ასეთი კომენტარი გააკეთა “გურია ნიუსთან”:
“აღნიშნულ მიწის ნაკვეთზე დაგეგმილია ცემენტის საწარმოს მოწყობა-ექსპლუატაცია. ქვეყნის მასშტაბით და ჩვენს რეგიონშიც ბოლო წლებში ფიქსირდება ინფრასტრუქტურის განვითარების მაღალი ტემპი, რის შედეგადაც საგრძნობლად გაზრდილია მოთხოვნა სამშენებლო მასალებზე, მათ შორის მაღალი ხარისხის ცემენტზე. შესაბამისად შეიქმნება ახალი სამუშაო ადგილები. საწარმოს ძირითადი ინფრასტრუქტურა, მათ შორის ნედლეულის სასაწყობო სივრცეები, ასევე საპროექტო წისქვილები განთავსდება გადახურულ შენობაში. წისქვილის დანადგარები აღიჭურვება სახელოებიანი ფილტრებით, რომლის ეფექტურობა პროექტის მიხედვით 99,96 პროცენტია. პროექტის მიხედვით, საწარმო თვეში მხოლოდ 15 დღით იმუშავებს. დღიურად 1200 ტონა მზა პროდუქციას გამოუშვებს. ეს არის 960 ტონა კლინკერის (80 %), 180 ტონა ღორღის (15%) და 60 ტონა თაბაშირის (5%) ნაზავი. აქ მთავარი, რაც მოსახლეობამ უნდა იცოდეს, ის არის, რომ აქ მოხდება მხოლოდ დასახელებული ნედლეულის შეკუპაჟება და ადგილზე დაფასოება. აქ არ იქნება არავითარი გამონაბოლქვი. არ იქნება არც მაზუთი, არც _ გაზი, მხოლოდ ელექტროენერგიას გამოვიყენებთ. იმუშავებს 2 ამრევი “ბარაბანი”. კლინკერს და თაბაშირს, სავარაუდოდ, თურქეთიდან შემოვიტანთ. მონიტორინგის ჯგუფი ადგილობრივ მოსახლეობას შეხვდება და გზშ-ს განხილვაზე მათ ყველა შეკითხვას გაეცემა პასუხი”.
მისი ნათქვამის შესახებ კობალაძე დღეს ასეთ კომენტარს აკეთებს:
_ დიახ, გითხარით და სადაც ავაშენებთ, ასე გაკეთდება. სამწუხაროდ, ჩვენ ვერ შევძელით მოსახლეობის დარწმუნება. გადაწყვეტილებაც შესაბამისი მიიღო სამინისტრომ, _ გვითხრა მან.
_ სასიხარულო ის ფაქტია, რომ ერთად დგომამ ნაყოფი გამოიღო და სამინისტრომ შეაჩერა ეს მშენებლობა. არ აშენდება! ჩვენ ადვოკატიც გვყავდა შერჩეული და თუ არ დაგვეთანხმებოდა სამინისტრო, პირდაპირ სასამართლოს მივმართავდით. თუმცა, ამჯერად ხალხმა გაიმარჯვა. ასეთი ერთიანობით ყველა პრობლემას გადავჭრით ყოველთვის, _ გვითხრა დოდო დონაძემ.
მუნიციპალიტეტის მერის წარმომადგენელი ლიხაურში, ნანა წითლიძე:
_ საკითხი გადაწყდა ისე, როგორც მოსახლეობას სურდა. მათი სურვილი გაითვალისწინეს. მთავარია, ეს ყველაფერი, საბოლოოდ ასე გადაწყდა და ამაში უდიდესია ადგილობრივთა ძალისხმევა. ხალხის უმეტესობა რასაც ისურვებს, აუცილებლად გათვალისწინებული იქნება ყოველთვის.
ავტორი
