ოზურგეთის მოსახლეობას ძალიან მალე ახალი ავტოსადგური ექნება. “სააქციო საზოგადოება ავტოსადგური“ ქალაქ ოზურგეთის ცენტრში, აპოლონ წულაძის 9 ნომერში, პოლიციის ყოფილი შენობის უკანა ტერიტორიაზე განთავსდება. აღნიშნულ ტერიტორია 1 400 კვ.მ. მიწის ფართობს მოიცავს, ის უკვე ინფრასტრუქტურული სამუშაოები მიმდინარეობს.
აღნიშნული ინფორმაციის გაჟღერებამ ოპოზიციონერ დეპუტატებს, არასამთავრობო ორგანიზაციებს და საზოგადოებას შორის აზრთა სხვადასხვაობა გამოიწვია. ისინი მიიჩნევენ, რომ ადგილობრივი ხელისუფლების მიერ მიღებული გადაწყვეტილება არასწორია, მათი აზრით ქალაქის ცენტრალურ უბანში ავტოსადგურის განთავსება არ არის მიზანშეწონილი და უფრო მეტად გადატვირთავს ამ ტერიტორიას. საზოგადოებაში გაჟღერებულ ინფორმაციას, რომ ავტოსადგური ე.წ. 9 აპრილის სკვერში განთავსება, სადაც რამდენიმე თვის წინ გზა გაიჭრა, არ ეთანხმება ქალაქ ოზურგეთის მერი ბეგლარ სიორიძე, ამასთან დაკავშირებით განმარტებას აკეთებს “სააქციო საზოგადოება ავტოსადგურის“ დირექტორი შაკო ორაგველიძეც.
ახალი ავტოსადგურის ადგილმდებარეობის მონაცვლეობასთან დაკავშირებით, საჭირო ხდება აპოლონ წულაძის ქუჩის გზაგამყოფი ბორდიურის 10-მეტრიანი მონაკვეთის დემონტაჟი. აღნიშნულ საკითხთან დაკავშირებით, ქალაქ ოზურგეთის ხელისუფლების ინიციატივით, 12 აპრილს საჯარო განხილვა გაიმართა საკრებულოს სხდომათა დარბაზში.
“გურია ნიუსი“ დაინტერესდა, თუ რას ფიქრობენ ოპოზიციონერი დეპუტატები და არასამთავრობო ორგანიზაციის წარმომადგენლები ავტოსადგურის ადგილმდებარეობის მონაცვლეობასთან დაკავშირებით.
ლევან ხინთიბიძე, არასამთავრობო ორგანიზაცია დემოკრატიული განვითარების კავშირის აღმასრულებელი დირექტორი:
“ამ საკითხს მრავალმხრივი მიდგომა სჭირდება იმ კუთხით, რომ ვხედავთ, რომ ადგილობრივი ხელისუფლების პოლიტიკა არის არათანმიმდევრული. ამ ტერიტორიაზე, ა.წულაძის ქუჩაზე გაიჭრა ე.წ. “ სკვერი“, ამ დროს ხელისუფლება ამბობდა, რომ იმ “სკვერში“ უნდა გასულიყო გზა, ამას ამართლებდა ადგილობრივი ხელისუფლება იმ თვალსაზრისით, რომ იქ აპირებდა ამ გზის ამ მონაკვეთში არსებული გადატვირთული მოძრაობის განტვირთვას. თუ კი ჩვენ განვიხილავთ ამ საკითხს, ისე რომ ძველი ავტოსადგური შეიცვლის ადგილმდებარეობას და გადმოვა იმ მიმდებარე ტერიტორიაზე, ბუნებრივია, ეს უფრო გაართულებს მოძრაობას და უფრო მეტად გადატვირთავს ქალაქის ამ ცენტრალურ უბანს. იბადება კითხვა, თუკი მოძრაობის განტვირთვის კუთხით მოხდა არსებული სკვერის გაჭრა, ახლა რატომ გადმოდის ავტოსადგური ამ ტერიტორიაზე? ავტოსადგურის გადმოსვლა არ ნიშნავს, იმას, რომ მხოლოდ ერთ კონკრეტულ ადგილას მოხდებოდა ლოკალიზება. ბუნებრივია, ამას თან მოჰყვება მთელი სავაჭრო ობიექტების ფოკუსირება, რაც უფრო მეტად გამოიწვევს ამ გზის დატვირთულობას, შესაბამისად, ის ეფექტი, რომელიც უნდა მიგვეღო, რომ ქალაქის ეს უბანი განტვირთული იქნებოდა, ამ ეფექტს, საბოლოო ჯამში, ვერ მივიღებთ. ეს არ არის ადგილობრივი ხელისუფლების სწორი გადაწყვეტილება და ეს გარემოება, ალბათ, სულ მალე ფაქტის წინაშე დაგვაყენებს“.
თამაზ ტრაპაიძე, არასამთავრობო ორგანიზაცია “ახალგაზრდა იურისტთა ასოციაციის“ ოზურგეთის ოფისის ხელმძღვანელი:
“10 მეტრი სიგრძის ბორდიურის გაჭრა ქალაქის იერსახეს და საზოგადოებრივ სივრცეს დიდად არ დააზარალებს, მაგრამ მეორე საკითხია, რამდენად მიზანშეწონილია ქალაქის ცენტრში ავტოსადგურის გადმოტანა. ვფიქრობ, ეს გამოიწვევს ქალაქის ამ ტერიტორიაზე არსებული ცენტრალური ქუჩების გადატვირთვას. არც თუ შორეულ წარსულში, 2016 წელს ამ ტერიტორიაზე მდებარე სკვერი იმ მიზეზით გაიჭრა, რომ ავტომობილებით გადატვირთული ქუჩები განტვირთულიყო. ახლა კი ეს გადაწყვეტილება მისი საპირისპიროა და საქმისადმი ორმაგი სტანდარტებით მიდგომასთან გვაქვს საქმე. ასევე, აღსანიშნავია, რომ მთელ მსოფლიოში ისეთი ობიექტები როგორიცაა: ავტოსადგური, რკინიგზის სადგური და ა.შ. შეძლებისდაგვარად ცდილობენ, რომ იგი ქალაქის შემოსასვლელებში/გასასვლელებში გადაიტანონ, რითაც ხდება ტრანსპორტის ნაკადის შემცირება.“
თამარ ნადირიძე, ქალაქ ოზურგეთის საკრებულოს ოპოზიციონერი დეპუტატი:
“ საჯარო განხილვა საკუთარი მომხრეების შეკრება არ გახლავთ. კომუნისტების დროსაც კი ხელმძღვანელობასთან წინასწარ შეთანხმებული მეტ-ნაკლებად კრიტიკული აზრიც ფიქსირდებოდა, ახლა კი თუ კი ვინმეს მერთან ჩხუბის სურვილი აქვს, შეუძლია თამამად მივიდეს შეხვედრაზე საკუთარი მოსაზრების დასაფიქსირებლად და ღმერთის მადლობელი უნდა დარჩეს, მისმა მომხრეებმა საჯაროდ იქვე თუ არ გალანძღეს. ჩემი აზრით, ავტოსადგური ქალაქის ცენტრში არ შეიძლება გადმოიტანონ, ასევე, არ შეიძლება ე.წ. “გმირთა მოედანზე“ გაზის ჩამტუმბავი სადგურის მოწყობა, ასევე, არ შეიძლება პარკის დანგრევა, არ შეიძლება ჭადრების პარკის ტერიტორიის და ტროტუარის გაცემა მშენებლობებისათვის, არ შეიძლება გაზონის გაცემა ჯიხურების ჩასადგმელად და კიდევ ბევრი ისეთი რამ არ შეიძლება, რასაც ქალაქ ოზურგეთის მერი ბეგლარ სიორიძე აკეთებს ჩვენს ქალაქში. ქალაქში, რომლის მოსახლეობასაც აღმშენებლობას დაპირდა, სამწუხაროდ, მისი მოღვაწეობის სიმაღლე ერთსართულიან ჯიხურებს ვერ გასცდა“.
ლევან მგელაძე, ქალაქ ოზურგეთის საკრებულოს დამოუკიდებელი დეპუტატი:
“როგორც რიგითი ოზურგეთელი და ქალაქის საკრებულოს დეპუტატი ნამდვილად ვერ დავეთანხმები ქალაქის მერს და მერის საქმიანობით „აღფრთოვანებული“ საზოგადოების მცირე ჯგუფს, რომლებიც ამტკიცებენ, რომ ქალაქის განვითარებისთვის ავტოსადგურის გადმოტანა აპოლონ წულაძის ქუჩაზე (ძველი პოლიციის შენობაში უკან) სასიცოცხლო მნიშვნელობისაა. როცა ქალაქის მერი გვიმტკიცებდა ქალაქის ამ მონაკვეთში საავტომობილო მოძრაობა გადატვირთულია და აუცილებელია სკვერის ხარჯზე ახალი გზის მოწყობა, რომელიც კანონის უხეში დარღვევით, თვითნებურად განახორციელა, საგზაო მოძრაობის უსაფრთხოებისთვის, ახალი საავტომობილო კვანძის მოწყობა უგუნურობაა ან პირადი ინტერესებიდანაა გამომდინარე. რაც შეეხება საკითხის საჯარო განხილვას, მიწვეული არ ვიყავი და არ მომეცა ჩემი აზრის დაფიქსირების საშუალება. ასე რომ, ზემოთ აღნიშნული ღონისძიება ავტოსადგურის ახალ ადგილზე დაფუძნების პრეზენტაციას უფრო წააგავდა, ვიდრე საკითხის საჯარო განხილვას“.
შაკო ორაგველიძე, “სააქციო საზოგადოება ავტოსადგურის“ დირექტორი:
“სააქციო საზოგადოება ოზურგეთის სამგზავრო ავტოსადგური გეგმავს ადგილმდებარეობის შეცვლას, აპოლონ წულაძის #7-ში . არანაირად არ ეხება ეს თემა პარკის გაჭრას, ეს გადადის ძველი პოლიციის შენობის უკანა მხარეს, შიგნით ტერიტორიაზე, აიღება წულაძის ქუჩის გზაგამყოფი ბორდიური 10 მეტრით, საიდანაც დაუბრკოლებლად შევა სატრანსპორტო საშუალებები ავტოსადგურის ტერიტორიაზე. აღნიშნული ტერიტორია არის 1400 კვ.მ. მიწის ფართობი. ეს არის კერძო საკუთრება. აქ იქნება 20 -25 მარშრუტი. ანასეულის, დვაბზუს, მაკვანეთის, ლიხაურის, ბათუმის, ქუთაისის, სამტრედიის, თბილისის, აქ მიმდინარეობს ინფრასტრუქტურული სამუშაოები, თვის ბოლოს დაიგება ასფალტის საფარი, 15 მაისს უკვე გადავა და იქნება მეორე კატეგორიის ავტოსადგური“. ორაგველიძის განმარტებით, ე.წ. “გმირთა მოედანზე“ განთავსებული პატარა ავტოსადგური ისევ იმ მდგომარეობაში დარჩება როგორ არის.
ბეგლარ სიორიძე, ქალაქ ოზურგეთის მერი:
“ეს გახლავთ ის საკითხი, რომელიც ნამდვილად ექვემდებარება საჯარო განხილვას, რადგანაც ის უშუალოდ ეხება როგორც ქალაქის მოსახლეობას, ასევე, სოფლის მოსახლეობას. საქმე ეხება ავტოსადგურის ადგილმდებარეობის შეცვლას კი არა, უფრო სწორად დაფუძნებას. ჩემი წინასაარჩევნო კამპანიის პერიოდში, ერთ-ერთი მთავარი დაპირება მოსახლეობისადმი გახლდათ ის, რომ ჩვენს ქალაქში ფუნქციონირებას დაიწყებდა ახალი ავტოსადგური, რომელიც იყო დღევანდელ დღემდე უფუნქციოდ, რადგან ქალაქში მიმოფანტულია ეს მიკროავტობუსები, რომლებიც მოძრაობენ როგორც სოფლების მიმართულებით ასევე საქალაქთაშორისო მიმართულებითაც, მე დარწმუნებული ვარ, რომ არავის არ მოსწონს ქალაქში ასე მიმოფანტული იყოს ეს მიკროავტობუსები, ამიტომ მოვაწყვეთ საჯარო განხილვა, რომ თუ სად უნდა განთავსდეს ქალაქში ცენტრალური ავტოსადგური. ინფორმაცია, იმის შესახებ, რომ ეს ავტოსადგური კეთდება ე.წ. 9 აპრილის სკვერში, ეს არის ტყუილი, ჩვენ არასდროს გადაგვიდგამს ისეთი ნაბიჯი, რომელიც ჩვენი ქალაქის მაცხოვრებლების ინტერესებს ეწინააღმდეგებოდა. არც მომავალში გავაკეთებთ ისეთ რამეს, რომელიც რაიმე სახის ზიანის მომტანი იქნება“.
