პარიზში გამართულ 2019 წლის ოქროს ბურთის“ დაჯილოდოების ცერემონიალზე გამარჯვებულად ლიონელ მესი გამოცხადდა. ბარსელონას არგენტინელმა თავდამსხმელმა ჯილდო კარიერაში მეექვსედ მოიპოვა. ხმის მიცემის შედეგად, მეორე ადგილზე ლივერპულის ჰოლანდიელი მცველი ვირჯილ ვან დაიკი გავიდა, ხოლო მესამეზე – ტურინის იუვენტუსის პორტუგალიელი ფორვარდი კრიშტიანო რონალდო.
ფრანგული მედიის ინფორმაციით, ლიონელ მესიმ ვირჯილ ვან დაიკს სულ რაღაც 7 ბალით აჯობა. რაც შეეხება კრიშტიანო რონალდოს, პორტუგალიელი გამარჯვებულს მთელი 203 ბალით ჩამორჩა.
ცნობილია ისიც, თუ რომელი ქვეყნის წარმომადგენლებმა რომელ ფეხბურთელებს დაუჭირეს მხარი.
როგორც ირკვევა, ევროპის კონტინენტის მასშტაბით ხმის მიცემაში უპირატესობა ვან დაიკს ჰქონდა. მან 231 ბალი მოაგროვა, მესიმ კი – 194. ჰოლანდიელის უპირატესობა დაფიქსირდა აზიაშიც – 155 ბალი 134-ის წინააღმდეგ.
არგენტინელმა სუპერვარსკლავმა საბოლოო გამარჯვებას პლანეტის დანარჩენ კონტინენტებზე მოპოვებული უპირატესობით მიაღწია. სამხრეთ ამერიკაში მესიმ 47 ბალი მიიღო, ვან დაიკმა – 39.
არგენტინელისა და ჰოლანდიელის ბალები, შესაბამისად, ჩრდილოეთ ამერიკაში იყო – 102:86, ოკეანიაში – 22:14, აფრიკაში – 187:154. სხვათა შორის, აფრიკაში მეორე ადგილზე სულაც ვირჯილ ვან დაიკის თანაგუნდელი ლივერპულში, სენეგალელი ფორვარდი სადიო მანე გავიდა (170).
ქართული სპორტული მედიის მხრიდან უკვე 20 წელიწადზე მეტია წამყვან ფრანგულ გამოცემასთან France Football-თან გაზეთი “სარბიელი” თანამშრომლობს, რომლის ხმებიც შემდეგნაირად გადანაწილდა: კრიშტიანუ რონალდუ, ლიონელ მესი, ვირჯილ ვან დაიკი, სადიო მანე, კევინ დე ბრუინი.
