“გაიყვანონ მძიმე ტვირთმზიდები და ბავშვებს ტრენაჟორები დაუბრუნონ!” _ მოსახლეობის პროტესტი სოფელ ოზურგეთში

ოზურგეთის მუნიციპალიტეტის სოფელ ოზურგეთში, სოფლის პროგრამის ფარგლებში, ბავშვთა გასართობი მოედანი გასულ წელს გაკეთდა. როგორც აქ მცხოვრებლები ამბობენ, მოედანზე საუკეთესო ტრენაჟორებიც დადგეს, თუმცა, მოგვიანებით, “მობლატავე ტიპებმა” გადაიტანეს სხვა უბანში.

მოსახლეობის თქმით, ბოლო სამი თვეა, რაც აქ მდებარე ეკლესიის სიახლოვეს, შესახვევში შედიან მძიმეწონიანი მანქანები და ყრიან გზებიდან აღებული ძველი ასფალტის ნარჩენებს. ასაწყობებენ, ასე გამოდის. შემდეგ ხრეშს ურევენ და გააქვთ სხვადასხვა მიმართულებით, სადაც, სოფელ ოზურგეთის შემოგარენში, გზა კეთდება.

კუთხე, სადაც 40-მდე ოჯახი ცხოვრობს, “რაჭველების უბნის” სახელითაა ცნობილი. სწორედ ამ უბნის მცხოვრებლები გამოვიდნენ აქციაზე მოთხოვნით, თავიანთი სახლების სიახლოვეს შეწყვეტილიყო ხმაური. ასევე, მძიმე ტვირთმზიდების მოძრაობა და გაურკვეველი მოქმედებები, რაც ქმნის როგორც ჰაერის დაბინძურების პრეცედენტს, ისე საფრთხეს უქმნის ბავშვებს _ ქუჩაზე ბევრი პატარა ბავშვი მოძრაობს ფეხით თუ ველოსიპედით და საშიშია მძიმე ტვირთმზიდების გვერდით მათი მოძრაობა.

_ სულ იმის შიში გვაქვს, ამ მძიმე ტვირთმზიდებმა ბავშვები არ დააზიანოს. უბედური შემთხვევა რომ მოხდეს, ვინაა პასუხისმგებელი? ასე ვიწრო ქუჩაზე, ამდენი ტვირთმზიდის სწრაფი მოძრაობა დასაშვებია? აქვე ეკლესიაა. ყველაფრის უფლებას აძლევს ბევრი თავის თავს, _ ამბობენ აქაურები.

სოფელ ოზურგეთის მცხოვრები მერი გოგრიჭიანი ამბობს, რომ ნაგავსაყრელად აქციეს აქაურობა, განმკითხავი კი არავინაა და ეს უზარმაზარი მანქანები თავის ნებაზე დაქრიან:

_ აქ არის ალტერნატიული გზა. წავიდნენ და იარონ იქედან. ასევე, დროულად გაირკვეს, რატომ ყრიან მაინცდამაინც აქ ამდენ ნაგავს. ყოფილი წისქვილკომბინატის ტერიტორიაა, სადაც ეს ნაგავი და ნარჩენი შეაქვთ და ყრიან. ამბობენ, რომ ასფალტის ნარჩენებია. ჩვენ გვინდა უსაფრთხო გარემო. სასაფლაოსთან მისასვლელი გზა არ დარჩა, რომ შვილმკვდარი დედები მივიდეთ. ასე არ შეიძლება, _ თქვა გოგრიჭიანმა.

რაც ადგილზე ვნახეთ, ეს იყო ნარჩენების საკმაო გროვა, რომელსაც ჩვენი წყაროს ინფორმაციით, გზებზე იღებენ. ეს არის დაზიანებული გზის მონაკვეთებზე აღებული ასფალტის ნარჩენები. ამ მასას ურევენ კარიერებიდან მოტანილ ინერტულ მასალას, რომელიც იქვე, ქვის გადამამუშავებელ ქარხანაში ქუცმაცდება.

_ ახლა, გურიაში, “დრაბილკას” სად არ ნახავ აშენებულს. სოფელ ოზურგეთის გზებს ვაკეთებთო, _ ამბობენ და კი, ბატონო, გააკეთონ, მაგრამ დაიცვან ყველანაირი უსაფრთხოების ზომები. აქ რომ რაიმე მოხდეს, ვინაა პასუხისმგებელი?! _ გვეუბნებიან “რაჭველების უბნის” მცხოვრებლები.

ჩვენ ადგილზე მივედით გარემოს დაცვითი ორგანიზაცია “ეკოს” დამფუძნებელ ირმა გორდელაძესთან ერთად. ვნახეთ, რომ ექსკავატორი გზიდან აფრეზილ ასფალტის ნარჩენებს და ქვა-ღორღს ასაწყობებდა.

აქ მომუშავეებს ვკითხეთ, ვინ ხელმძღვანელობდა სამუშაო პროცესს.

პირები, რომლებმაც თავი “ჩინეთის ხიდებისა და გზების მშენებლობის კორპორაციის” წარმომადგენლებად გაგვაცნეს, თქვეს, რომ აქ მიმდინარე სამუშაოებზე პასუხისმგებელი პირი, თენგო მჭედლიშვილია.

ირმა გორდელაძემ მჭედლიშვილს დაურეკა და დოკუმენტაცია მოთხოვა. კერძოდ, ჰქონდა თუ არა ნებართვა გარემოს დაცვის სამსახურიდან, აღნიშნულ ადგილზე გადაემუშავებინა ინერტული მასალა:

_ მე ახლა ხულოში ვარ. პასუხს ვერ გაგცემთ. მესამე პირს ვერც დოკუმენტს გადმოგცემთ. ჩამოვალ ოზურგეთში. მობრძანდით და მნახეთ, _ უპასუხა მჭედლიშვილმა გორდელაძეს.

როცა ადგილზე სხვა მოპასუხე არავინ იყო, გორდელაძემ გარემოს დაცვითი ზედამხედველობის დეპარტამენტის აჭარა-გურიის რეგიონული სამსახურის წარმომადგენლები გამოიძახა. შემთხვევის ადგილზე დასახელებული სამსახურის მეორე განყოფილების უფროსი სპეციალისტი, ჯგუფის უფროსი კობა გოგმაჩაძე და გურიის განყოფილების მე-3 განყოფილების უფროსი სპეციალისტი, შოთა პაიკიძე გამოცხადდნენ.

მათ განაცხადეს, რომ აუცილებლად შეისწავლიან მოსახლეობის პრეტენზიებს. ასევე, განმარტეს, რომ მძიმეწონიანი ავტომანქანები, გზის სივიწროვის გამო, ალტერნატიული გზით ვერ ივლიან და როგორც კი სამუშაოები დასრულდება, შეწყდება ეს მოძრაობაც.

სოფელ ოზურგეთის მკვიდრი ქეთევან დარჩია: “როცა აქ ჟურნალისტები მოხვედით, ვიღაცებმა იმის გარკვევა დაიწყეს, ვინ შეგატყობინათ ეს ამბავი. თქვენ მე გიცნობთ? ან დაგირეკეთ? აგერ ბრძანდებით და თქვით. რასაც ვხედავთ, ამის მოთმენა არ შეიძლება. დაქრიან ეს უზარმაზარი მანქანები. ღმერთის ნებით, ბევრი ბავშვია, ორმოცი ოჯახი ცხოვრობს აქ. რომ მოხდეს რაიმე, სად წავლენ? ამ ვიწრო ქუჩაზე ამხელა მანქანების ასე წინ და უკან გამუდმებული მოძრაობა შეიძლება? ჩვენი აივნებიდან ვუყურებთ, როგორ დაქრიან. მტვერმა ცალკე დაგვახრჩო. მოვიდა მერის პირველი მოადგილე და დაგვპირდა, რომ ყველაფერს მოაწესრიგებდა. გზა კი მოხრეშეს, მტვერი იმდენად აღარ არის. თუმცა, იმაზე მაინც გული მტკივა, ბავშვებისთვის სკვერი რომ გაკეთდა, ტრენაჟორებიც იყო დადგმული. მერე მოხსნეს ვიღაც “ტიპების” და “ძველი ბიჭების” ინიციატივით და წაიღეს სხვა უბანში. ეს შეიძლება ბავშვებს გაუკეთო? ხომ ესმის ბავშვს, ვინ რა მოიმოქმედა? ძველ ბიჭებს ჩვენც “ვიშოვით”, თუ ასეა საქმე!” _ გაბრაზებული საუბრობდა ქეთევან დარჩია.

კითხვაზე, თუ უთხრეს ამის თაობაზე მერიის წარმომადგენელს, გვიპასუხა, რომ საქმის კურსშია მერის პირველი მოადგილე:

_ დიახ, მერის პირველი მოადგილე იყო მოსული და შეგვპირდა, რომ აქ მალე დადგამენ ტრენაჟორებს. თუმცა, გულნატკენი ვარ. იმას  ეძებენ, ვინ რა თქვა. მე მომჩივანი კი არ ვარ, სიმართლეს ვამბობ. მოსაწესრიგებელია მანქანების მოძრაობა, საქმეა გასაკეთებელი და უნდა აკეთონ. ბავშვები ქუჩაში არ გამოუშვათ, მიხედოს მშობელმაო. ასე ლაპარაკი შეიძლება? ბავშვი ეზოშიც გამოვა და ქუჩაშიც. მშობლები დარბიან, რომ სადმე იმუშაონ და პურის ფული მოიტანონ იმ ბავშვებთან. აწყობილია ცხოვრება თუ რა? _ ამბობს ქეთევან დარჩია.

მან თქვა, რომ მუნიციპალიტეტის მერის წარმომადგენელი ბადრი თავდუმაძე მოიწვიეს და პრობლემის შესახებ ესაუბრნენ. მისივე თქმით, თავდუმაძეც დახმარებას და საკითხის მალე მოგვარებას დაჰპირდა.

“გურია ნიუსი” ოზურგეთის მუნიციპალიტეტის მერის წარმომადგენელს სოფელ ოზურგეთში, ბადრი თავდუმაძეს ესაუბრა:

_ ვიცი ამ პრობლემის შესახებ. უფრო სწორად, ეს პრობლემა კი არ არის, გზა კეთდება, გზას კი შესაბამისი მასალა სჭირდება და გააქვთ. მოგეხსენებათ, წელს როგორი წვიმიანი ამინდებია. როცა ამდენი ნალექი მოვიდა, გზები ძალიან ატალახდა. მოსახლეობაც სამართლიანად შეწუხდა. ეს ავტომანქანები, თავიდან სოფლის ცენტრში ახლად დაგებული გზით სარგებლობდნენ. ჩვენი მოთხოვნით, შეცვალეს სამოძრაო მარშრუტი. ვიცით, რომ ბევრი ბავშვი თამაშობს და გადაადგილდება მოედანზე. ასევე, ჩვენი მოთხოვნით, მყარი ნარჩენები აღარ იყრება ყოფილი წისქვილკომბინატის ტერიტორიაზე. შეგიძლიათ, ნახოთ _ რაც დაყრილი იყო, ტრაქტორით ასწორებენ. ვიცი ისიც, რომ საბუთები აქვთ და ისე მუშაობენ. ვცდილობთ და აუცილებლად მოვაგვარებთ პრობლემას ისე, რომ ხალხი კმაყოფილი იყოს, _ გვითხრა თავდუმაძემ.

მართალია, თავდუმაძემ კი თქვა, რომ აქ მომუშავე ჯგუფს, რომელიც ჩინური კომპანიის დაქვემდებარებაშია, ყველანაირი საბუთები აქვთ, თუმცა, დაპირებისამებრ, მათ ჯერ არ წარმოუდგენიათ საჭირო დოკუმენტაცია.

_ ორი დღეა, ველოდებით. გვითხრეს, რომ ამ დროში მოგვიტანდნენ საბუთებს, რომლის მიხედვითაც მათ გარემოს დაცვის ზედამხედველობისგან ექნებოდათ ნებართვა. ჯერჯერობით, არაფერი მოუტანიათ. წარმოგვიდგენენ თუ არა, ამის შესახებ ჩვენ მედიასაც დაუყოვნებლივ ვაცნობებთ, _ ამბობენ არასამთავრობო ორგანიზაცია “ეკოს” წარმომადგენლები.