პოლიტიკის ექსპერტი სოსო ცისკარიშვილი საგანმანათლებლო სისტემაში დაანონსებული რეფორმების შესახებ საუბრობს. მისი თქმით, „როცა დარგს საკუთარი მინისტრი არ ჰყავს, რასაკვირველია, ისეთ სავალალო შედეგს მივიღებთ, რომლის გამოსწორება გვიანი იქნება“.
ცისკარიშვილი სასკოლო გამოცდების გაუქმების გამო მინისტრს მწვავედ აკრიტიკებს და საზოგდაოებას თანაუგრძნობს.
_ბატონო სოსო, განათლების სისტემაში დაანონსებული არაერთი რეფორმის მიუხედავად, საქართველოში განათლების ხარისხი დაბალია. მინისტრმა მიხეილ ბატიაშვილმა განათლების სისტემაში არსებულ ერთ-ერთ უმთავრეს პრობლემად საატესტატო გამოცდები აღიქვა და გააუქმა. ამასთან, მინისტრი ამბობს, რომ ახალგაზრდებში ლოგიკური აზროვნება უნდა განვითარდეს, პარალელურად კი, ერთიან ეროვნულ გამოცდებში უნარებს სავალდებულო საგნის კომპონენტს უხსნის. გაქვთ თქვენეული ხედვა, რა კავშირშია გამოცდების გაუქმება და უნარების გამოცდის ასეთი ტრანსფორმაცია განათლების ხარისხის გაუმჯობესებასთან?
_საგანმანათლებლო სისტემაში საფრთხე მაშინ გამოაშკარავდა, როდესაც ერთ სამინისტროში ოთხთავიანი მინისტრი მივიღეთ. როცა დარგს საკუთარი მინისტრი არ ჰყავს, რასაკვირველია, ისეთ სავალალო შედეგს მივიღებთ, რომლის გამოსწორება გვიანი იქნება. როგორ შეიძლება ერთი ადამიანი ოთხი სამინისტროს ფუნქციით იყოს დატვირთული?! ეს უპასუხისმგებლობაა.
ბავშვებმა რა დააშავეს ?! ახალ თაობას წინასწარ თანავუგრძნობ. საატესტატო გამოცდების გაუქმების შემდეგ, ჩვენ მივიღებთ თაობას, რომელსაც არც ერთ საგანში არ ექნება საფუძვლიანი ცოდნა. განათლების ხელმძღვანელობას ისღა დარჩენია, ფეხი ფეხზე გადადონ და განათლების სისტემის განადგურებას ამ თეორის მიხედვით დაელოდონ _“რაც მოგივა დავითაო, ყველა შენი თავითაო“.
_განათლების სისტემაში არსებული პრობლემების პარალელურად, არასახარბიელო მდგომარეობა გვაქვს სასამართლო სისტემაშიც. მოსამართლეები, რომელთა მიღებულმა გადაწყვეტილებებმა სტრასბურგის სასამართლოც გააოცა, „ქართულმა ოცნებამ“ წინა რეჟიმის მსხვერპლებად გამოაცხადა და მათი ნაწილი თანამდებობებზე უვადო მოსამართლეებად განამწესა, არადა გვახსოვს, „ქართული ოცნების“ პრინციპულ დაპირებათა შორის ერთ-ერთი უმთავრესი _ მართლმსაჯულების სისტემაში სამართლიანობის აღდგენა იყო.
_რაც სასამართლო სისტემაში დღეს ხდება, ჩვენზე ახია, რადგან საზოგადოებამ მმართველი პარტიის ლიდერს საკადრისი პასუხი არ გასცა მაშინ, როცა ბატონი ლევან მურუსიძე ქართული მართლმსაჯულების ქურუმად გამოაცხადა. ბიძინა ივანიშვილი არის ადამიანი, რომელსაც სურს, რომ ტალახში ამოვლებული პირები მისთვის მთავარი დასაყრდენი ძალა გახდეს, რაც, პირველ ყოვლისა, ქართული სახელმწიფოსთვის იქნება მომაკვდინებელი.
_მართლმსაჯულების სისტემაში არსებულ პრობლემებზე საუბარი „ქართული ოცნების“ დეპუტატ ეკა ბესელიას ძვირი დაუჯდა. სტატისტიკურად, როცა ფარული ჩანაწერების გავრცელების შემთხვევებზე სამართალდამცავი უწყებების მხრიდან დამნაშავეები დღემდე არ გამოვლენილან, ბესელიას ფარული ჩანაწერის გავრცელების ფაქტზე ადეკვატური გამოძიების იმედი გაქვთ?
_ ფარული ჩანაწერების გამოძიება იმ უწყებას უნდა აინტერესებდეს, რომლისთვისაც ასეთი საკითხები მიუღებელია. როცა მშვენივრად იციან, ვინ და როდის გააკეთა ჩანაწერი, რთულია ისაუბრო საქმის ობიექტურად გამოძიებაზე.
_მმართველი პარტიის ნაწილი „ქართული ოცნების“ ლიდერს ბიძინა ივანიშვილს ულტიმატუმებს უყენებს და გუნდიდან გასვლას აანონსებს. გასაგებია, რომ „ქართული ოცნება“ დიდი გუნდია და პარტიის დაშლა ნაკლებად სავარაუდოა, მაგრამ გაყოფის შემთხვევაში, მნიშვნელოვანია საზოგადოება რომელ მხარეში დაინახავს ნამდვილ „ქართულ ოცნებას“ _ ეკა ბესელიას თანამოაზრეებში თუ პარლამენტის თავმჯდომარის ხელმძღვანელობით, ე.წ. ახლების ფრთაში, რომელთაც 2012 წლის მონაპოვართან ნაკლები კავშირი აქვთ?
_ საზოგადოება მიმდინარე პროცესებს აკვირდება და მოვლენებს ადეკვატურად აანალიზებს. ჩანს, რომ „ქართული ოცნება“ რუსულ ოცნებად გადაიქცა. უმრავლესობა, რომელიც ჯერ ისევ დამუნჯებულია, ხელს უწყობს რუსული ოცნების დანერგვის პროცესს. დეპუტატები კი, რომლებიც სასამართლო სისტემასთან დაკავშირებით სამართლიანობის აღდგენისთვის იბრძვიან, „ქართული ოცნების“ ნამდვილ სახეებს წარმოადგენენ. ვფიქრობ, რომ „ქართული ოცნება“ ამ ეტაპზე არ დაიშლება, მაგრამ პარალელურად, ქალბატონი ეკა ბესელიას თანამოაზრეთა გუნდი გამყარდება და დიდი ალბათობით, გაიზრდება კიდეც.
