BM.GE-ს ინფორმაციით, 2025 წლის იანვარ–ნოემბერში, საქართველოში გაყინული თევზის იმპორტი მნიშვნელოვნად გაიზარდა. ოფიციალური მონაცემების მიხედვით, აღნიშნულ პერიოდში ქვეყანაში $40.5 მლნ-ის ღირებულების, 14 332 ტონა გაყინული თევზი შემოვიდა, მაშინ როცა 2024 წლის ანალოგიურ საანგარიშო პერიოდში, იმპორტმა $26.9 მლნ და 11 516 ტონა შეადგინა.
შედეგად, გაყინული თევზის იმპორტი ღირებულებით 50.6%-ით გაიზარდა, ხოლო მოცულობაში ზრდამ 24.4% შეადგინა.
2025 წლის 11 თვის მონაცემებით, საქართველოსთვის გაყინული თევზის უმსხვილესი იმპორტიორი ქვეყანა ნორვეგიაა – $6.3 მლნ-ის ღირებულების და 2 091 ტონა პროდუქციით. მეორე ადგილზე, ესპანეთი იმყოფება ($5.3 მლნ; 2 463 ტონა), ხოლო მესამე პოზიციას ჩილე იკავებს ($4.7 მლნ; 802 ტონა).
ტოპ 10 იმპორტიორ ქვეყანას შორის ასევე შედიან აშშ ($3.5 მლნ; 1 275 ტონა), ახალი ზელანდია ($2.95 მლნ; 1 163 ტონა), ისლანდია ($2.94 მლნ; 1 071 ტონა), დანია ($1.7 მლნ; 445 ტონა), ფარერის კუნძულები ($1.6 მლნ; 521 ტონა), ჩინეთი ($1.2 მლნ; 183 ტონა) და გაერთიანებული სამეფო ($1 მლნ; 467 ტონა).
საქართველოდან გაყინული თევზის ექსპორტიც ზრდის ტენდენციას ინარჩუნებს. 2025 წლის იანვარ–ნოემბერში ქვეყანამ $5.6 მლნ-ის ღირებულების, 1 254 ტონა გაყინული თევზი გაყიდა, მაშინ როცა 2024 წლის ანალოგიურ პერიოდში ექსპორტმა $2.7 მლნ და 1 466 ტონა შეადგინა.
არსებული მონაცემების მიხედვით, გაყინული თევზის ექსპორტი ღირებულებით 102.6%-ით გაიზარდა, თუმცა ფიზიკურ მოცულობაში 14.4%-იანი კლება დაფიქსირდა. ეს მიუთითებს, რომ საქართველოდან გაყინული თევზის საექსპორტო ფასი გაზრდილია.
2025 წლის 11 თვის მონაცემებით, საქართველოსთვის გაყინული თევზის მთავარი საექსპორტო ბაზარი ყაზახეთია – $2.4 მლნ-ის ღირებულების და 297 ტონა პროდუქციით. მეორე ადგილზე რუსეთი იმყოფება ($1.4 მლნ; 192 ტონა), ხოლო მესამე პოზიციას სომხეთი იკავებს ($903 ათასი; 552 ტონა). ხუთეულში ასევე შედიან აზერბაიჯანი ($725 ათასი; 145 ტონა) და უკრაინა ($92 ათასი; 66 ტონა).
