გენდერული თანასწორობის საბჭო უქმდება, რა იქმნება ჩოხატაურში და რა ფუნქცია ექნება – რას ამბობს მარინე ბერაძე

ჩოხატაურის მუნიციპალიტეტში გენდერული თანასწორობის საბჭო უქმდება, ხოლო ქალთა და ბავშვთა საკითხებზე მომუშავე საბჭო იქმნება. აღნიშნული ცვლილების შესახებ “გურია ნიუსი” სამანდატო, საპროცედურო საკითხთა და ეთიკის კომისიის თავმჯდომარე, მარინე ბერაძეს ესაუბრა.

_ რა საქმიანობას ეწეოდა გენდერული თანასწორობის საბჭო ჩოხატაურში, რომელიც უქმდება?

_ჩოხატაურის მუნიციპალიტეტში გენდერული თანასწორობის საბჭო მოქმედებდა 2018 წლიდან, მისი საქმიანობის ძირითად მიმართულებებს წარმოადგენდა ქალთა გაძლიერება სხვადასხვა მიმართულებით, მათ შორის ეკონომიკური გაძლიერება, ქალთა მიმართ და ოჯახში ძალადობის წინააღმდეგ პრევენციული ღონისძიებების ჩატარება (როგორც ცნობიერების ამაღლების კუთხით, ასევე ძალადობის მსხვერპლთა სარეაბილიტაციო ღონისძიებების ხელშეწყობა), თანამშრომლობა ახალგაზრდებთან, ასევე შშმ პირებთან და მათ მშობლებთან, მარტოხელა დედებთან.  ამ მიმართულებით საბჭოს ინიციატივით არაერთი პროგრამა შეიქმნა მუნიციპალიტეტში, რომელიც დღემდე წარმატებით ხორციელდება.

_ რას უკავშირდება ცვლილება ?

_ რაც შეეხება ცვლილებებს, იგი დაკავშირებულია“ქალისა და მამაკაცი თანასწორობის შესახებ” საქართველოს კანონის  მიღებასთან. შინაარსობრივად ძირითადი მიმართულებები რჩება,  განხორციელდება ტექნიკური ცვლილებები, რათა ახლადშექმნილი ქალთა და ბავშვთა საკითხებზე მომუშავე მუნიციპალური საბჭოს საქმიანობის წესი შესაბამისობაში მოვიდეს კანონმდებლობასთან. ყველა მიმართულება, რომელზეც წინათ მოქმედი საბჭო მუშაობდა, ახლა განახორციელებს ახლადშექმნილი ქალთა და ბავშვთა საკითხებზე მომუშავე მუნიციპალური საბჭო, უფრო მეტიც დაემატება ბავშვთა უფლებების დაცვაზე მიმართული საქმიანობები.

_ რაც შეეხება ქალთა და ბავშვთა საკითხებზე მომუშავე მუნიციპალური საბჭოს შექმნას, თუ არის უკვე ცნობილი რა ფუნქცია -მოვალეობა ექნება ? (ვის შეეძლება მომართოს და რა საკითხებზე?)

_ მისი ძირითადი ფუნქციები და უფლებამოსილებებია :  ა) თემატური მოკვლევის საფუძველზე გამოვლენილი გამოწვევების შესწავლა, კონკრეტული რეკომენდაციებისა და  წინადადებების შემუშავება მუნიციპალიტეტის  შესაბამის პროგრამებსა და ბიუჯეტში ასახვის მიზნით. ბ) არსებული მუნიციპალური, სახელმწიფო პროგრმებისა და სერვისების შესახებ ინფორმაციის პერიოდულად გავრცელება და  საზოგადოების ცნობიერების ამაღლების მიზნით, შესაბამისი კამპანიების წარმოება.  გ)  საბჭოს საქმიანობის მიზნებისთვის სტატისტიკური მონაცემების დამუშავება  სქესის, ასაკის, შეზღუდული შესაძლებლობის მქონე პირთა მონაცემების გათვალისწინებით; დ) ადგილობრივი თვითმმართველობის ორგანოების მიერ განხორციელებული აქტივობების (საუკეთესო პრაქტიკის) შესახებ საზოგადოების ინფორმირებულობის გაზრდა, მათ შორის სოციალურ მედიაში; ე) ქალებისა და ბავშვების უფლებების შესახებ ინტეგრირებული საგანმანათლებლო სესიების ჩატარება სკოლებში, საზოგადოებრივ ცენტრებში და ახალგაზრდულ სივრცეებში; ვ) განიხილოს ქალთა და ბავშვთა უფლებების დარღვევის თაობაზე წარდგენილი განცხადებები, და სხვა ინფორმაცია, თავისი კომპეტენციის ფარგლებში მოახდინოს მათზე რეაგირება და შეიმუშაოს რეკომენდაციები; ზ) უფლება აქვს გამოითხოვოს ქალთა და ბავშთა საკითხების შესწავლასთან დაკავშირებული ნებისმიერი ინფორმაცია და დოკუმენტაცია, გარდა ისეთი შემთხვევებისა, რომელთა კონფიდენციალურობაც დაცულია საქართველოს კანონმდებლობის შესაბამისად; თ)ქალთა და ბავშვთა საკითხების შესწავლისა და განხილვის დროს მოიწვიოს შესაბამის დარგში მომუშავე სპეციალისტები ან/და ექსპერტები; ი)საბჭოს საქმიანობის მიზნებიდან გამომდინარე, საკითხის სრულყოფილად შესწავლის და გამოკვლევის მიზნით, მოაწყოს სამუშაო შეხვედრები შესაბამის დაინტერესებულ პირებთან და უწყებებთან;    კ) ითანამშრომლოს  ქალთა ჯგუფებთან და არასამთავრობო ორგანიზაციებთან;

საბჭოსთვის მიმართვის საშუალება აქვს ნებისმიერ დაინტერესებულ პირს, ყველა მოქმედი პროგრამა რჩება ძალაში, ასე რომ ქალთა და ბავშვთა საკითხებზე მომუშავე მუნიციპალური საბჭო კიდევ უფრო მრავალფეროვან და წარმატებულ პროგრამებს დანერგავს მუნიციპალიტეტში.

ინფორმაციისთვის, პარლამენტის პრესსამსახურის გავრცელებული ინფორმაციით,  პარლამენტის პლენარულ სხდომაზე „გენდერული თანასწორობის შესახებ“ კანონში და მისგან გამომდინარე კანონპროექტთა პაკეტში ცვლილებები 4 მარტს  პირველი მოსმენით განიხილეს და 83 ხმით მხარი დაუჭირეს.

კანონპროექტის თანახმად, კანონის სათაურში და ტექსტში ტერმინი „გენდერული თანასწორობა“ იცვლება „ქალისა და მამაკაცის თანასწორობით“. გარდა ამისა, კანონიდან ხდება იმ ნორმის ამოღება, რომელშიც მოცემულია ტერმინ „გენდერის“ განმარტება.

„საბჭო, რომელიც სახელწოდებაშივე ქმნიდა არასწორ წარმოდგენას საბჭოს საქმიანობის შესახებ, ბუნებრივია, მისი არსებობის საჭიროება დღეს აღარ არის. აღნიშნული არ ნიშნავს იმას, რომ საქართველოს პარლამენტმა და ადგილობრივი თვითმმართველობების ორგანოებმა არ უნდა მოახდინონ ფოკუსირება ქალისა და მამაკაცის თანასწორობის პრინციპის ურყევ დაცვაზე“, – განაცხადა გავრცელებული ინფორმაციით, დავით მათიკაშვილმა.