ლანჩხუთის მუნიციპალიტეტის სოფლებში უკვე წლებია, გადაუჭრელ პრობლემად რჩება ცენტრალური თუ შემოვლითი გზების გაუმართაობა, რაც ადგილობრივებს დისკომფორტს უქმნით.
მოუწესრიგებელი გზა, გაუმართავი ინფრასტრუქტურა, პრობლემები გადაადგილების დროს _ ეს ის საკითხებია, რომელიც დიდი ხანია, აწუხებს სოფელ ღრმაღელის მოსახლეობას. სოფელში ერთ-ერთი საგზაო მონაკვეთი, რომელიც უკვე წლებია ძალიან მძიმე მდგომარეობაშია და გაუმართავი ინფრასტრუქტურის გამო ბევრ შეფერხებას უქმნის ადგილობრივ მცხოვრებლებს, სოფელ ღრმაღელემდე მისასვლელი მთავარი გზაა.
არადა, თუ გადავხედავთ ლანჩხუთის მუნიციპალიტეტის ბოლო რამდენიმე წლის ბიუჯეტს და მის შესაბამის დოკუმენტაციას, ასევე, ხარჯთაღრიცხვასა და პრიორიტეტული სფეროების ჩამონათვალს, დავინახავთ, რომ ყველა მათგანში საგზაო ინფრასტრუქტურაა დასახელებული, როგორც ერთ-ერთი პრობლემური სფერო, შესაბამისად, ადგილობრივი ხელისუფლების მიერ გზების სარეაბილიტაციოდ გამოყოფილია საკმაოდ დიდი მოცულობის თანხები, რომელიც ყოველწლიურად იცვლება, უცვლელი მხოლოდ პრობლემა რჩება.
ლანჩხუთის მერიის ფეისბუქგვერდზე გამოქვეყნებული ერთ-ერთი ინფორმაციით, გარკვეული ინფრასტრუქტურული სამუშაოები სოფელ ღრმაღელეში ამ ეტაპზეც ხორციელდება.
“სოფელ ღრმაღელეში ხიდების რეაბილიტაცია მიმდინარეობს.
სამუშაოები აქტიურ ფაზაშია და მომდევნო თვეში დასრულდება.
პროექტის ფარგლებში, ხიდების რეაბილიტაცია გვიმბალაურის, ლესის, ქალაქის, ჩოჩხათის, ჯურუყვეთის, ღრმაღელის ადმინისტრაციულ ერთეულებში მიმდინარეობს. პროექტი ადგილობრივი ბიუჯეტიდან 398 200 ლარით ფინანსდება”, _ ვკითხულობთ მერიის გვერდზე.
“ეს ყველაფერი ძალიან კარგია, მაგრამ სოფელ ღრმაღელემდე მისასვლელ გზასაც მოუხერხოთ იქნებ რამე. კერძოდ, წყალწმინდის “პერიეზდიდან” ხიდამდე. კატასტროფაა, რაც იმ გზაზე ხდება. უბრალოდ, შეუძლებელია იქ გავლა, იმხელა გუბეებია”, _ წერს მერიის გამოქვეყნებული ინფორმაციის პასუხად თამო მგელაძე.
ლანჩხუთის მერიის პრესასთან ურთიერთობის განყოფილების ხელმძღვანელის მაკა სულაბერიძის განმარტებით კი, სუფსა-ღრმაღელის დამაკავშირებელი გზის რეაბილიტაციისთვის საპროექტო-სახარჯთაღრიცხვო დოკუმენტაციის მომზადება მიმდინარეობს, რის შემდეგაც დაიწყება გზის რეაბილიტაცია.
