წინასაარჩევნო დაძაბულობა გურიაშიც პიკს აღწევს. წინა ორი არჩევნებისგან განსხვავებული რეალობა ის არის, რომ პოლიტიკურ ველზე გამოჩნდა მამუკა ხაზარაძის “ლელო საქართველოსთვის”, რომელსაც მესამე პოლიტიკურ ცენტრობაზე აქვს პრეტენზია.
“ლელოს” მაჟორიტარობის კანდიდატი გურიაში გიორგი სიორიძე რეგიონში არსებული წინასაარჩევნო გარემოს აფასებს.
გიორგი სიორიძის განცხადებით, ერთი შეხედვით, გურიაში ამ მხრივ სიმშვიდეა, რამდენადაც ხელჩართული ბრძოლები და ქვების სროლა არ ყოფილა:
“იმედი მაქვს, გურიის ამომრჩეველი, როგორც ყოველთვის, ახლაც მაღალ მოქალაქეობრივ თვითშეგნებას გამოიჩენს და ამა თუ იმ პოლიტიკური პარტიის იაფფასიან პროვოკაციას არ აჰყვება.
ისიც უნდა გვესმოდეს, რომ ეს სიმშვიდე მოჩვენებითია და ცხადია, არ ნიშნავს, რომ პროცესები კარგად მიდის. “ოცნება”, კანონის იგნორირებით, ბოლომდე იყენებს სახელისუფლებო რესურსს. ამას ემატება დაშინება, შეშინება და შანტაჟი თუნდაც იგივე საარჩევნო შეხვედრებზე დასწრების აკრძალვით და სოცდახმარებების მოხსნა-დანიშვნის მანიპულირებით და სხვა”, _ აღნიშნა სიორიძემ.
მისი თქმით, მოსახლეობა გულგატეხილი და იმედგაცრუებულია “ოცნების” 8-წლიანი არაადეკვატური მმართველობით:
“ბუნებრივია, ბრძენ ქართველ ამომრჩეველს, მათ შორის, არც გურიაში, არც 9-წლიანი უმძიმესი სახელისუფლებო წარსულის მქონე “ნაციონალების” ხელახლა აღზევება სურს. ამდენად, ელექტორატისთვის სავსებით მისაღებია ახალი ძალა _ “ლელო საქართველოსთვის”, თავისი ახალი თაობის სუფთა წარსულის პოლიტიკოსებით და საქართველოს აღორძინების კონკრეტული გეგმით, რომელსაც საქართველოს “მარშალის გეგმა” დავარქვით.
მე გურიაში ყოველდღიურად ვხვდები უამრავ ადამიანს და ვაცნობ ჩვენს ხედვებს. ისინი გულწრფელად გვიცხადებენ მხარდაჭერას. გაყინული, განვითარებაშეჩერებული ვითარების შეცვლის და ცვლილებების დაწყების სურვილი იგრძნობა ყველა ნაბიჯზე”, _ განაცხადა მაჟორიტარობის კანდიდატმა.
გიორგი სიორიძე პრობლემად მიიჩნევს იმას, რომ “ოცნების” და “ნაციონალების” ფაქტობრივად შეთანხმებული პოლიტიკის შედეგად ისინი არ იღებენ მონაწილეობას პოლიტიკურ დებატებში და ამით ხელს უწყობენ იმას, რომ მოსახლეობას მოუხდეს არაინფორმირებული არჩევნის გაკეთება:
“პოლიტიკური კულტურისა და ქვეყნის განვითარებისთვის კრიტიკულად მნიშვნელოვანია, რომ ამომრჩეველს ჰქონდეს სრული ინფორმაცია, თუ ვის ირჩევს და რა პროგრამას, რა ხედვას აძლევს ხმას. ამ საშუალებას “ოცნება” და “ნაციონალები” მას, უბრალოდ, უსპობენ.
მე კიდევ ერთხელ საჯაროდ მოვუწოდებ “ოცნების” კანდიდატს ბიზნესმენ ვასილ ჩიგოგიძეს და “ნაციონალების” კანდიდატს სპორტსმენ მანუჩარ კვირკველიას, გაბედონ და მიიღონ მონაწილეობა პოლიტიკურ დებატებში და ჩემთან და სხვა კანდიდატებთან ერთად ისაუბრონ, თუ როგორ ხედავენ საქართველოს ეკონომიკის მომავალს, როგორ გადაჭრიან სოფლის მეურნეობის სწრაფი განვითარების ამოცანას, რა კუთხით წარმართავენ ჯანდაცვის სფეროს რეფორმას, რა გზებით მოახდენენ სოციალური ვითარების სასიკეთო ტრანსფორმირებას, რას ფიქრობენ განათლების სისტემაზე, პენსიონერთა და ვეტერანთა ხელშეწყობის რა სამართლიან მექანიზმებს ხედავენ, რეგიონში ახალგაზრდობის დასარჩენად რა პროექტებზე ფიქრობენ, დევნილებისა და ეკომიგრანტების პრობლემების შესამსუბუქებლად რა აქვთ გუნებაში და გონებაში, ძალოვანი უწყებების და სასამართლოს რეფორმირების რა ხედვები აქვთ, რას ფიქრობენ გლობალურ თუ რეგიონულ პოლიტიკაზე და საგარეო პოლიტიკის თვალსაზრისით რა ხედვები გააჩნიათ და ასე შემდეგ.
მე მხოლოდ გამიხარდება, თუ ვასილ ჩიგოგიძე და მანუჩარ კვირკველია, ადამიანები, რომლებიც პოლიტიკაში შემოსვლით პასუხისმგებლობას იღებენ თავიანთი წარმდგენი პოლიტიკური ძალების წარსულის შედეგებზე, საჯაროდ და დებატების ფორმატში წარმოადგენენ თავიანთ შეხედულებებს, თუ რას იზამენ ისინი მაჟორიტარ დეპუტატად არჩევის შემთხვევაში. ეს იქნება მაღალი პოლიტიკური კულტურის გამოხატულება და კიდევ იმის გამოხატულება, რომ ისინი ამომრჩეველს და მის უფლებას, იყოს ინფორმირებული, პატივს სცემენ.
თუ არ შედგა სრულფასოვანი დებატები წამყვან პოლიტიკურ ძალებსა და მათ წარმომადგენლებს შორის, ნებისმიერი საუბარი კეთილმყოფელი წინასაარჩევნო გარემოს შესახებ, როგორც ჩვენი, ისე საერთაშორისო საზოგადოებისთვის, რომელიც ჩვენს ქვეყანაში დემოკრატიული ინსტიტუტების გაძლიერებაზე ზრუნავს, თვალში ნაცრის შეყრა იქნება”, _ აღნიშნა გიორგი სიორიძემ წინასაარჩევნო ვითარების შეფასებისას.
(R)
