“უმცროსი ვაშაძე ცდილობს პატარა სააკაშვილად გადაიქცეს, რაც კარგად არ გამოსდის. გიორგი ვაშაძის სურვილია, საქართველოს მესამე პრეზიდენტს, მიხეილ სააკაშვილს მიბაძოს და მისი პოლიტიკური კლონი გახდეს. ამიტომ ისევე, როგორც სააკაშვილს, ვაშაძესაც ქვეყანაში დაძაბული პოლიტიკური მუხტის აწევა სურს“, _ აღნიშნა „გურია ნიუსთან“ საუბრისას დამოუკიდებელმა ანალიტიკოსმა ზაალ ანჯაფარიძემ.
მისივე თქმით, პოლიტიკური გაერთიანება „ძალა ერთობაშია“ არარაციონალური ქმედებების გამო, იმ ამომრჩევლებსაც კარგავს, რომლებმაც საპრეზიდენტო არჩევნებში მხარი გრიგოლ ვაშაძეს დაუჭირეს.
ამასთან, ანჯაფარიძე მიიჩნევს, რომ მმართველ პარტიაში საკადრო პოლიტიკის გახორციელება აუცილებელია. მისივე თქმით, დაპირებების შეუსრულებლობის შემთხვევაში, „ქართული ოცნება“ სომხეთში მოქმედი “რესპუბლიკური პარტიის“ ბედს გაიზიარებს.
_ ბატონო ზაალ, მედიაში აქტიურად ვრცელდება ინფორმაცია, რომ „ქართულ ოცნებაში“, შესაძლოა, საკადრო ცვლილებები გახორციელდეს, რასაც დღეს მმართველი პარტია არ ადასტურებს. საპრეზიდენტო არჩევნებამდე გვახსოვს ბიძინა ივანიშვილის განცხადება, რომ საკადრო პოლიტიკა სასწრაფოდ იყო შესაცვლელი. არჩევნების შემდეგ კი ივანიშვილის სიტყვები პარლამენტის თავმჯდომარემ ირაკლი კობახიძემ კითხვის ნიშნის ქვეშ დააყენა და განაცხადა, რომ პარტიის, მთავრობისა და პარლამენტის მიმართულებით საკადრო ცვლილებებზე საუბარი საფუძველს მოკლებულია. ივანიშვილის დაპირების მიუხედავად, როგორ ფიქრობთ, ამ ეტაპზე „ქართულ ოცნებაში“ საკადრო პოლიტიკის გახორციელების მზაობა არსებობს?
_ საკადრო პოლიტიკის გახორციელება კრიტიკულად აუცილებელია, სხვა შემთხვევაში, „ქართული ოცნების“ პოლიტიკური მომავალი დიდი კითხვის ნიშნის ქვეშ დადგება. ვფიქრობ, აღნიშნულთან დაკავშირებით „ქართულ ოცნებაში“ ამჟამად შიდაპარტიული ჭიდილია, რადგან საკადრო ცვლილებების გახორციელება მარტივი არ არის. სავარაუდოდ, „ქართული ოცნება“ ფიქრობს, როგორ განახორციელოს საკადრო პოლიტიკა ისე, რომ პარტიის პოლიტიკური და რეპუტაციული იმიჯი არ დაზიანოს. „ოცნების“ ლიდერებს სურთ, თანამდებობიდან გაშვებული ადამიანები არ განაწყენენდნენ, რომლებმაც, შესაძლოა, ოპონენტთა ბანაკში გადაინაცვლონ, რაც პარტიას დამატებით პრობლემებს შეუქმნის. საკადრო პოლიტიკის გაჭიანურებას საზოგადოება დადებითად არ შეხვდება, რადგან ივანიშვილის განცხადებიდან გამომდინარე, ხალხი სწრაფ რეაგირებას ელოდება.
_ საუბარია იმაზეც, რომ მთავრობის მეთაური მამუკა ბახტაძე, შესაძლოა, შს მინისტრმა გიორგი გახარიამ შეცვალოს, მიესალმებით ასეთ საკადრო ცვლილებას? და როგორ აფასებთ, პრემიერ–მინისტრის თანამდებობაზე მამუკა ბახტაძის მიერ გაწეული შრომის ეფექტურობას ?
_ ვერ გეტყვით, ვინ ვისზე უკეთესი პრემიერი იქნება. კადრის უკეთესობა და უარესობა კონკრეტული პირის მუშაობის შედეგებზეა დამოკიდებული. კერძოდ, პრემიერი პასუხისმგებელია გადაწყვეტილების მიღების აღსრულებზე, მის ეფექტურობაზე, გუნდის სწორად ჩამოყალიბებაზე. მთელი რიგი პრობლემებია, რომელთა გადაჭრა მთავრობის ხელმძღვანელმა უნდა შეძლოს. მამუკა ბახტაძეს, ჯერჯერობით, ფატალური შეცდომები არ დაუშვია, მაგრამ ამჟამინდელი ხელისუფლების მთავარი პრობლემა მენეჯმენტშია _ გადაწყვეტილებების აღსრულება და საზოგადოებამდე მიტანა ვერ ხერხდება. აუცილებელია, მმართველ პარტიაში ისეთი ხალხი მოვიდეს, რომელიც სწორ მენეჯმენტს განახორციელებს.
_ წინ 2020 წლის საპარლამენტო არჩევნებია, სადაც, შესაძლოა, მმართველ პარტიაზე განაწყენებულმა ამომრჩეველმა ხმა „ქართულ ოცნებას“ აღარ მისცეს. პარტიის ლიდერმა ბიძინა ივანიშვილმა ქვეყანაში რიგი პრობლემების აღმოსაფხვრელად, ერთი წელიწადი მოითხოვა. დაპირების შეუსრულებლობის შემთხვევაში, როგორ ფიქრობთ, რა ბედი ელის „ქართულ ოცნებას“?
_ ამ შემთხვევაში, „ქართულ ოცნებას“ ძალიან მძიმე მომავალი ელოდება. შეიძლება, მმართველ პარტიას ის დაემართოს, რაც სომხეთში „რესპუბლიკურ პარტიას“ მოუვიდა, რომელიც ოცი წელი მართავდა ქვეყანას, ახლანდელ არჩევნებში ბარიერიც კი ვერ გადალახა. დავაკვირდეთ, ხელისუფლება რა ნაბიჯებს გადადგამს. საკანონმდებლო კუთხით, რა კონკრეტული ინიციატივებს განახორციელებენ და საზოგადოების კეთილდღეობის მიზნით, რა ნაბიჯები გადაიდგმება.
_ ბატონო ზაალ, გაერთიანებული ოპოზიცია, ჯერჯერობით, არ ამხელს, რას პირებს 16 დეკემბერს _ სალომე ზურაბიშვილის ინაუგურაციის დღეს. „ძალა ერთობაშიას“ შტაბის ხელმძღვანელი გრიგოლ ვაშაძე ამბობს, რომ 16 დეკემბერს ნახავთ, რასაც ვაპირებთ, გამარჯვებას ბოლომდე მივიყვანთო. თქვენი აზრით, რას გეგმავს ოპოზიცია ?
_ ჯერჯერობით, არ ვიცი, რას გეგმავენ, მაგრამ უმცროსი ვაშაძე ცდილობს პატარა სააკაშვილად გადაიქცეს, რაც კარგად არ გამოსდის. გიორგი ვაშაძის სურვილია, საქართველოს მესამე პრეზიდენტს, მიხეილ სააკაშვილს მიბაძოს და მისი პოლიტიკური კლონი გახდეს, ამიტომ ისევე, როგორც სააკაშვილს, ვაშაძესაც ქვეყანაში დაძაბული პოლიტიკური ტემპერატურის აწევა სურს. ოპოზიცია აქციების გამართვით ხელს უწყობს იმას, რომ საზოგადოების თვალში მარგინალურ ძალად გადაიქცნენ. პოლიტიკური პარტიები, რომლებიც ოპოზიციაში არიან გაერთიანებულნი, ვერ აცნობიერებენ, რომ არარაციონალური ქმედებების გამო, ოპოზიცია ამომრჩეველს კარგავს. დღეს საზოგადოებაში არ არის რევოლუციური მუხტი. ის ადამიანებიც კი, რომელებმაც არჩევნებში ხმა ოპოზიციას მისცა, რადიკალური ქმედებების გახორციელებაში არ მიიღებს მონაწილეობას.
