გაერთიანებული სამეფო, საფრანგეთი, იტალია, დანია, ფინეთი, პორტუგალია, ესპანეთი, პოლონეთი… 20 ქვეყნის მედიასაშუალებები მიიღებენ ფინანსურ მხარდაჭერას მსოფლიო პანდემიისგან გამოწვეულ კრიზისს რომ გაუმკლავდნენ. 56 მედიაორგანიზაცია 1800-ზე მეტ აპლიკანტთა შორის 22-კაციანმა დამოუკიდებელმა საბჭომ შეარჩია სამ ეტაპიან კონკურსში.European Journalism COVID-19 Support Fund-ი, ევროპის ჟურნალისტიკის ცენტრის (EJC), Facebook ჟურნალისტიკის პროექტის (FJP) პარტნიორობით, დღეს ოფიციალურად აცხადებს ამ მედიასაშუალებების ჩამონათვალს; საქართველოდან ამ მხარდაჭერას შპს “გურია ნიუსი“ მიიღებს.
_ ამ მეტად რთულ დროს, როცა პოზიტიური ინფორმაციის დეფიციტია, ჩვენთვის მართლაც სასიხარულო იყო ამ ღირსეულ კონკურსში გამარჯვება, _ ამბობს მედიასახლ “გურია ნიუსის“ დამფუძნებელი ია მამალაძე, _ თანაც რამდენიმე გარემოების გათვალისწინებით: ეს დახმარება ფინანსური თვალსაზრისით სასიცოცხლოდ მნიშვნელოვანი იყო; არასდროს მოგვითხოვია სახელმწიფოსგან დახმარება – ღარიბ ქვეყანაში პრობლემები თითქმის ყველას აქვს; ჩვენ, ამ მძიმე დღეებში ბევრი ვიშრომეთ და ვშრომობთ, რომ ქვეყანას რამეში გამოვადგეთ – გავავრცელოთ სწორი და საჭირო ინფორმაცია, უკიდურეს მდგომარეობაში მყოფი ადამიანების გასაჭირი მივიტანოთ გადაწყვეტილების მიმღებთა ყურამდე, მოვიპოვოთ საარსებოდ საჭირო მწირი ფინანსები…
აქვე უნდა ვთქვა, რომ სწორედ ევროპული ფონდის მხარდაჭერაა ჩვენთვის უმნიშვნელოვანესი, რადგან პანდემიასთან გამკლავება საქართველოს უმძიმესი დეზინფორმაციული ომის და ოკუპაციის პირობებში უხდება; ამ თანადგომით კი, არა მხოლოდ ჩვენ – ჟურნალისტები, ჩვენი მკითხველებიც მინდა დარწმუნდნენ, რომ ევროპულ ოჯახში, რისკენ სწრაფვის გამოც ისჯება ჩვენი ქვეყანა, გასაჭირში ადამიანს, ბიზნესს არავინ მიატოვებს…
ფინანსური მხარდაჭერით ჩვენ შევძლებთ ნაწილობრივ მაინც ჩავანაცვლოთ პანდემიის გამო დაკარგული შემოსავლები, აუდიტორიას მისთვის ხელსაყრელ პლატფორმაზე მივაწოდოთ უკეთესი ხარისხის ინფორმაცია, გვქონდეს მეტი ხარისხიანი წვდომა მსოფლიო ტექნოლოგიურ სიახლეებთან.
ამ სიხარულს, პირველ რიგში, იმ მკითხველს ვუზიარებ ონლაინ და ბეჭდურ პლატფორმაზე, ვინაც დიდი გასაჭირის მიუხედავად, არ მიგვატოვა; იმ აუდიტორიას, რომელიც 29-ე წელია “გვაიძულებს“ ვიყოთ ქართული მედიასივრცის ნაწილი…, _ ამბობს ია მამალაძე.
