დროში საკმაოდ გაწელილი აღმოჩნდა ლანჩხუთში, სოფელ ეწერში მდებარე საჯარო სკოლის რეაბილიტაციის საკითხი _ სკოლა უკვე წლებია გამოკეტილია.
“სანამდე იქნება ასე?” _ ეს კითხვა ლანჩხუთის საკრებულოს ყოფილმა წევრმა ამირან გიგინეიშვილმა ჯერ კიდევ 2022 წლის სექტემბერში დასვა შესაბამისი უწყებების მისამართით. გიგინეიშვილი აქვე იმასაც განმარტავდა, თუ რა პრობლემებს უქმნიდა აღნიშნული ფაქტი ამ სკოლის მოსწავლეებსა და მათ მშობლებს: “ეწერის სკოლის შენობის დაზიანების შესახებ გაზაფხულზე გავიგეთ. საშიშიაო და ბავშვები მეორე ცვლაში სოფელ ნინოშვილში გადაიყვანეს. ახლა სექტემბრის ბოლოა და შენობას არავინ შეხებია სარემონტოდ. შესაბამისად, მეორე ცვლის გამო შეუძლებელი გახდა ბავშვის ტარება სპორტზე, ხატვაზე, ნებისმიერ სხვა წრეზე, რაც არის ლანჩხუთში. შეუძლებელი გახდა რეპეტიტორთან ბავშვის ტარება, რომ უმაღლეს სასწავლებელში ჩაბარება შეძლოს (არავინ თქვას, ურეპეტიტოროდ ვინმე ჩააბარებსო!)”.
იმავე კითხვას ამირან გიგინეიშვილი ახლაც აჟღერებს: “ახლა 2025 წელია და სკოლის ადგილზე ისევ მხოლოდ გაცამტვერებული ეზოა, მეტი არაფერი. იგივე კითხვა, რაც 3 წლის წინ: სანამდე იქნება ასე?”
საკრებულოს მოქმედი წევრი “ერთიანი ნაციონალური მოძრაობიდან” ირმა მგელაძეც ეხმაურება ფაქტს:
“მარტო ეგ სკოლა არაა მაგ დღეში, ანალოგიურადაა ნინოშვილიც, ნიგოითის სკოლაც და ჯურუყვეთის ბაღიც, რომელიც 2015 წელს ააშენეს და ახლა უკვე დასანგრევია…
გზებს აგებენ და ამით მოსწონთ თავი…
2012 წლიდან დღემდე 500-ამდე ბავშვით შემცირდა საბავშვო ბაღების აღსაზრდელთა რიცხვი და შესაბამისად, იქნება სკოლებიც…
მალე კონტიგენტიც აღარ გვეყოლება…”
თამუ დიასამიძე: “ნამდვილად ძალიან ცუდი სიტუაციაა, არავინ აქცევს ყურადღებას. არავის აინტერესებს ბავშვების მომავალი. სკოლის გარდა გვჭირდება წრეებზე სიარული, მაგრამ ვერ ვახერხებთ მეორე ცვლის გამო.
ქალაქებს რომ ადარებთ ზოგიერთები, თურმე ქალაქებშიც არიან მეორე ცვლაში ბავშვები. კი, ბატონო, ასეა, მაგრამ ქალაქში დილიდან შეუძლიათ წაიყვანონ წრეებზე. ჩვენთან არ არის ასე. რატომ იჩაგრებიან ჩვენი შვილები?! რატომ უნდა იარონ სხვა სოფლებში სასწავლებლად?! იძულებულები ვართ მშობლები, ჩამოვაშორეთ მათ თანაკლასელებს და გადავიყვანოთ სხვა სკოლებში. ამით ხომ ირღვევა ბავშვის უფლებები და თუ უმეტესობა გადავა, ვის აუშენებენ სკოლას. იქნებ გაგვცეს ვინმემ პასუხი!
ეწრის ბაღიც დაშალეს. არც სკოლა და აღარც ბაღი, ნუთუ არავინაა ჩვენი პატრონი. ხალხს ხელი უნდა შეუწყოთ, რომ სოფელში ცხოვრება მოუნდეთ , თქვენ ისე აკეთებთ, რომ ხალხი მიდის სოფლებიდან, რადგან არაა სკოლა, არაა ბაღი. რა ქნან, როგორ მისცენ განათლება შვილებს”.
მამუკა ანანიძე: “რაც სხვა სკოლაში გადაგვიყვანეს მეორე ცვლაში, 20 -მდე ბავშვი გადავიდა ნინოშვილის სკოლიდან. 20 შეიძლება ვიღაცისთვის ცოტაა, მარა სულ რომ 55 და 60 მოსწავლე გყავს, მაშინ დიდი რიცხვია”.
როგორც ფაქტები ცხადჰყოფს, ამ დროის განმავლობაში მხოლოდ ის მოხერხდა, რომ ლევან სამხარაულის სახელობის ექსპერტიზის ეროვნულმა ბიურომ დადო დასკვნა, რომლითაც ლანჩხუთის მუნიციპალიტეტის ჯურუყვეთის #1 საჯარო სკოლის (ეს სკოლა, ტერიტორიულად, ჯურუყვეთის ადმინისტრაციულ ერთეულში, სოფელ ეწერში მდებარეობს) ტექნიკური მდგომარეობა არადამაკმაყოფილებლად შეფასდა.
თითქმის წელიწადნახევრიანი ლოდინის შემდეგ ძველი შენობის დემონტაჟი კი გახორციელდა, მაგრამ საქმე ამის იქეთ წინ აღარ წაწეულა და ამ დრომდე არავინ იცის, როდის ექნება სოფელს ახალი სკოლა.
საკითხთან დაკავშირებით “გურია ნიუსს” ლანჩხუთის რესურსცენტრის ხელმძღვანელთან, ნინო ჩიტაძესთან კომუნიკაცია გასული წლის სექტემბერში ჰქონდა და მაშინ საუბრის შედეგად მხოლოდ ის გავარკვიეთ, რომ სამუშაოების დასაწყებად მალე ტენდერის გამოცხადება იგეგმებოდა.
ჩვენ ნინო ჩიტაძეს ამჯერადაც დავუკავშირდით და პასუხად ისევ მივიღეთ, რომ სამუშაოების დასაწყებად ტენდერის გამოცხადების მოლოდინში არიან:
“საქმეში აქტიურადაა ჩართული მუნიციპალიტეტის მერი, ალექსანდრე სარიშვილი”, _ გვითხრა რესურსცენტრის ხელმძღვანელმა.
როგორც ზემოთ ვახსენეთ, შეხიზნულია სოფელ ნინოშვილის საჯარო სკოლაც, რომელიც 2023 წლის რვა სექტემბერს, გურიაში მომხდარი დამანგრეველი სტიქიის შემდეგ, გეოლოგების პირველადი დასკვნით, მოსწავლეების მისაღებად საფრთხის შემცველად ჩაითვალა და ნინოშვილში მცხოვრებ ბავშვთა გადამისამართება, ჯურუყვეთის მეორე საჯარო სკოლაში მოხდა.
კერძოდ კი, მაშინდელი სტიქიისას მეწყერი წარმოიშვა ნინოშვილის საჯარო სკოლის უკანა ეზოში, რის გამოც სამხარაულის ექსპერტიზის ბიურომ დადო დასკვნა, რომ აქ ბავშვების სწავლება არ შეიძლებოდა, მიუხედავად იმისა, რომ თავად სკოლის შენობა მდგრადია და ახლა საბოლოო სიტყვა დამატებითმა კვლევებმა უნდა თქვას.
რაც შეეხება ნიგოითის საბაზო სკოლას, რომლის ადგილასაც აგერ უკვე ერთი წელია, ახალი შენობის საძირკვლისთვის გათხრილი უზარმაზარი ორმოა მხოლოდ, ოფიციალური ინფორმაციებით, ხელახალი ტენდერის მოლოდინშია. ირკვევა, რომ კომპანიამ რომელმაც თავის დროზე ტენდერში გაიმარჯვა და შენობის საძირკველი გათხარა, დაწყებული საქმე მალევე მიატოვა.
ავტორი
