ლანჩხუთის მერიის ფეისბუქის გვერდზე გამოქვეყნებული ინფორმაციით, მუნიციპალიტეტში ინფრასტრუქტურული სამუშაოები აქტიურ ფაზაში მიმდინარეობს და საამისოდ სოლიდური თანხებიც იხარჯება.
უწყების ცნობით, რეგიონებში გასახორციელებელი პროექტების ფონდისა და ლანჩხუთის მერიის თანამონაწილეობით, ჯურუყვეთის, სუფსისა და ჩოჩხათის ადმინისტრაციულ ერთეულებში მიმდინარეობს საგზაო ინფრასტრუქტურის რეაბილიტაცია. პროექტის საერთო ღირებულება კი, 4 816 953 ლარს შეადგენს.
ასევე, 637 523 ლარის ღირებულების გზის სარეაბილიტაციო სამუშაოები გახორციელდა სოფელ ლესაშიც.
გარდა გზისა, სოფელ ლესაში სტიქიის სალიკვიდაციო ღონისძიებების ფარგლებში ნაპირსამაგრი სამუშაოებიც მიმდინარეობს. კერძოდ, 450 მეტრი ნაპირსამაგრი კეთდება, რომლის ღირებულება 521 000 ლარია.
“სტიქიის სალიკვიდაციო ღონისძიებების ფარგლებში, სოფელ ლესაში აქტიურად მიმდინარეობს სამუშაოები. ნაპირსამაგრების მოწყობა თითქმის ყველა სოფელში გრძელდება. სტიქიის სალიკვიდაციო ღონისძიებების ფარგლებში მუნიციპალიტეტში ჯამში 24 მლნ ლარი დაიხარჯება“, _ განაცხადა ალექსანდრე სარიშვილმა სამუშაოების მონახულებისას.
მიუხედავად იმისა, რომ ლანჩხუთის მუნიციპალიტეტში ინფრასტრუქტურული სამუშაოებისთვის ხელისუფლების მხრიდან სოლიდური თანხები იხარჯება, ირკვევა, რომ მუნიციპალიტეტის სოფლებში მაინც მწვავედ დგას შიდა გზების პრობლემები, რაზეც მერიის ოფიციალურ გვერდზე მოქალაქეთა მიერ გაკეთებული კომენტარებიც მეტყველებს, რომლებიც ადგილობრივ ხელისუფლებას რეაგირებისკენ მოუწოდებენ. განსაკუთრებით სოფელ წყალწმინდის მოსახლეობა უჩივის მუნიციპალიტეტს უყურადღებობაში.
ირინა გოგიჩაიშვილი: “თუ შეიძლება ეწერის გზასაც რომ მიხედოთ!”
მინდია მახარობლიძე: “მამათში არ დააგოთ რამე, ღმერთი გიწყენთ“.
ბაჩო ჩხარტიშვილი: “ლანჩხუთის მუნიციპალიტეტის მერია მაგ ჩამონათვალში წყალწმინდა და ომფარეთი რით ვერ მოხვდა?!”
მზია კაპანაძე: “წყალწმინდას როდის მიხედავთ?”
ნინო გიგაური: “რა მაინტერესებს იცით, გურიას არ ეკუთვნის წყალწმინდა?! წყალწმინდას და ომფარეთს როდის მიხედავთ, გზები რომ წაიღო სტიქიამ, თუ იქ ხალხი არ ცხოვრობს,?! რატომ გვიკეთებთ იგნორს? მოგვაქციეთ ყურადღება, მადლობელი დაგრჩებით!
წყალწმინდას და ომფარეთს,როდის მიხედავთ თუ იქ ხალხი,არ ცხოვრობს,მოგვაქციეთ ყურადღება,მადლობლები დაგრჩებით!”
ირკვევა, რომ ანალოგიური პრობლემებია სუფსის ადმინისტრაციული ერთეულის სოფლებშიც: “იქნებ მოგვაქციონ ყურადღება დროულად! ახალსოფლის სკოლასთან დაწყებული გზის სამუშაოები დაასრულონ, დაგვახრჩო მოსახლეობა და სკოლის ბავშვები გზიდან შემოსულმა აუარებელმა მტვერმა“.
“იცით, რა მაინტერესებს? სუფსაში, ტაბანათში გამოძახებით რომ იყავით მოსულები, გადაიღეთ სურათები და წახვედით, ყოველ ჯერზე ასე მოხვალთ და არაფერს არ გააკეთებთ? როდემდე უნდა გაგრძელდეს ეს თქვენი ტყუილები?” _ მიმართავს მუნიციპალიტეტის ხელმძღვანელობას მანანა გურგენაძე.
გარდა საგზაო ინფრასტრუქტურის მოწესრიგებისა, ხელისუფლებისგან დახმარების მოლოდინშია დიდთოვლობის შედეგად დაზარალებული მოსახლეობაც. მიიჩნევენ, რომ პროცესი დროში იწელება, რაც დაზარალებულ ოჯახებს დამატებით პრობლემებს უქმნის. დროებით გადახურულმა სახურავებმა საქმეს ვერ უშველა, თანდათან ზიანდება ავეჯი, სხვა ინფრასტრუქტურა.
“დაზარალებულ ოჯახებს როდის მიექცევა, ნეტავ, ყურადღება? ოჯახები დანგრეულ ან სახურავის გარეშე დარჩენილ სახლებში ცხოვრობენ. გაწვიმების გვეშინია. “ბრეზენტები” გვაქვს გადაფარებული, რამდენჯერმე გადააძრო ქარმა, ისედაც დაზიანებულ და ჩამტვრეულ სახურავს სანამ არ დაანგრევს ქარი და არ მოყვება ხალხი ნანგრევებში, მანამ არ ეღირსება გაკეთება? მოხუცებს გული უსკდებათ ქარის ამოვარდნაზე“, _ ამბობენ ისინი.
მზია კაპანაძე; “გვითხრეს, არ შეეხოთ, გადაგიხურავთო… ყველაფერი ჩალპა, შიგ რაც იყო. ყველაფერი გააფუჭა ჯერ თოვლმა და მერე ამ გაუთავებელმა წვიმებმა, ლანჩხუთი კი დუმს… გზებს აკეთებენ ღრმა სოფლებში და ჩვენი სოფელი არავის ახსოვს. რა საწყენია“.
დიდთოვლობის შედეგად დაზარალებულთა პასუხად, ლანჩხუთის მერიაში განმარტავენ, რომ ზარალის დათვლა დასრულებულია და ახლა დამდგარი ზარალის ასანაზღაურებლად საჭირო ბიუჯეტის დაანგარიშების პროცესი მიმდინარეობს.
ავტორი
