ირანის ისლამურ რესპუბლიკაში, თეირანში აზერბაიჯანის რესპუბლიკის საელჩოზე შეიარაღებული თავდასხმა განხორციელდა – ინფორმაციას ამის შესახებ trend.az ავრცელებს.
როგორც გამოცემა წერს, თავდასხმის შედეგად დაიღუპა აზერბაიჯანის სამართალდამცველი, რომელიც საელჩოს იცავდა. დაჭრილია დაცვის კიდევ ორი წევრი.
აღნიშნულ შემთხვევას განცხადებით აზერბაიჯანის საგარეო საქმეთა სამინისტრო გამოეხმაურა. უწყების განცხადებაში ნათქვამია, რომ თავდამსხმელმა ცეცხლი კალაშნიკოვის ავტომატიდან, დაცვის პოსტის მიმართულებით გახსნა.
ასევე განცხადებაში აღნიშნულია, რომ მოღალატურ თავდასხმაზე გამოძიება მიმდინარეობს.
,,2023 წლის 27 იანვარს, ბაქოს დროით დილის 8:30 საათზე, ირანის ისლამურ რესპუბლიკაში აზერბაიჯანის რესპუბლიკის საელჩოზე შეიარაღებული თავდასხმა მოხდა. თავდამსხმელი კალაშნიკოვის ავტომატური იარაღით შეიჭრა დაცვის პოსტზე და მოკლა დაცვის სამსახურის უფროსი. თავდასხმის აღკვეთისას საელჩოს დაცვის ორი თანამშრომელიც დაშავდა. მათი მდგომარეობა დამაკმაყოფილებელია. ამ მოღალატურ თავდასხმაზე გამოძიება ამჟამად მიმდინარეობს. საქმის დეტალებთან დაკავშირებით საზოგადოებას დამატებითი ინფორმაცია მიეწოდება”,– ნათქვამია განცხადებაში.
ავტორი
