“ის არ არის კომპეტენტური”_ აჭარის ტელევიზიის მრჩეველი სახალხო დამცველზე

საზოგადოებრივი მაუწყებლის აჭარის ტელევიზიისა და რადიოს მრჩეველთა საბჭოს წევრმა, გიგა ჩხარტიშვილმა  6 მარტს გამართულ საბჭოს სხდომაზე განაცხადა, რომ სახალხო დამცველის მიმართ არანაირი ნდობა არ გააჩნია და საქართველოს ჰყავს ყველაზე არაკომპეტენტური სახალხო დამცველი.

ცნობისთვის, საბჭოს სხდომის ჩანაწერი დღეს გასაჯაროვდა.

„ეს ბევრჯერ დავადასტურე მე. პირველი, რაც მინდა ვთქვა, დისკრიმინაციასთან დაკავშირებით. ირაკლი ბარამიძეს სამი წელია შეტანილი აქვს განცხადება, რომ იყო თუ არა მისი გათავისუფლება დისკრიმინაციული სამსახურიდან, ამაზე მიეღო დასკვნა და სახალხო დამცველს სამი წელია დასკვნა არ მიუცია.

ამ დროს, იმ ადამიანს, ვის მიმართაც შეიძლებოდა ჰქონოდა პრეტენზია და ზუსტად იმ ადამიანზე დაწერილიყო ეს დასკვნა, ასე ვთქვათ, უარყოფითი, იმას ქომაგის წოდება მისცეს.

მეორე, 103-მა თანამშრომელმა რომ განცხადება გააკეთა, არ მოუკითხავს სახალხო დამცველს. 13 ოპერატორი რომ გაფიცული იყო, არ მოუკითხავს. როდესაც ნათია კაპანაძესთან მე მქონდა დავა, უნდობლობასთან დაკავშირებით, ცალსახა მხარდაჭერა გამოუცხადა ნათია კაპანაძეს და ერთი არ მოუკითხავს პრეტენზიები, ამიტომ არანაირი ნდობა, ჩემი პირადი ნდობა სახალხო დამცველისადმი, არის  ნულოვანი. ის არ არის მიუკერძოებელი, ის არ არის ყველას სახალხო დამცველი და ის არ არის კომპეტენტური.

მაუწყებლობის შესახებ კანონში ვერც კი ერკვევა. ამიტომ, ამაში ვერ გამოგყვებით, არანაირი ილუზია არ მაქვს, რომ სახალხო დამცველი რამე როლს ითამაშებს აქ. ეს არის გაკოტრებული ადამიანი.

ის შერჩევით არჩევს მოქალაქეებს, რომელთა უფლებებსაც დაიცავს,“ – განაცხადა გიგა ჩხარტიშვილმა  მრჩეველთა საბჭოს სხდომაზე.