დღეს, ევროპის ჩემპიონატის მორიგ შესარჩევ შეხვედრაში საქართველოს ეროვნული გუნდი შოტლანდიის ნაკრებს სტუმრად დაუპირისპირდება.
მატჩის წინ შოტლანდიის ნაკრების კაპიტანმა ენდი რობერტსონმა საქართველოსთან დაპირისპირებაზე ისაუბრა:
„ოთხ თამაშში 12 ქულა განსაკუთრებული იქნებოდა და ეს მოგვცემდა საშუალებას ახლოს მივიდეთ იმასთან, რისი მიღწევაც გვინდა. თუმცა, საქართველო თუ ჩვენს წინააღმდეგ ქულებს აიღებს, ჩამორჩენა არ იქნება ისეთი დიდი, როგორიც შეიძლება იყოს. ვიცით, რომ რთული თამაში იქნება. გუნდში ყველანი ორიენტირებული ვართ სამშაბათის მატჩზე.
ეს დიდი მატჩია და „ჰემპდენ პარკის“ სრული მხარდაჭერა დაგვჭირდება. არ არსებობს მიზეზი, რომ მათ არ იმღერონ, ისინი გვჭირდება, რომ გავიმარჯვოთ. უფრო ადვილია, როდესაც 50 000 გულშემატკივარი გამხნევებს, ისინი გვჭირდება, რადგან 12 ქულის მოპოვება ჩვენთვის დიდი შედეგი იქნება.
კვარაცხელია განსაკუთრებული მოთამაშეა. ცხადია, მათ სხვა კარგი ფეხბურთელებიც ჰყავთ და მათი დამარცხება რთულია. ჩვენი ანალიტიკოსები შეისწავლიან მეტოქეს და ყველაფერს გვეტყვიან. საქართველო გლაზგოში მოსაგებად ჩამოვა და კონტრშეტევაზე ჩვენს დაჭერას ეცდება. ამისთვის მზად უნდა ვიყოთ, როგორც ფიზიკურად, ისე გონებრივად. მზად ვიქნებით კიდევ ერთი გამარჯვების მოსაპოვებლად და იმედი მაქვს, რომ ეს იქნება კიდევ ერთი კარგი საღამო „ჰემპდენ პარკზე“, – განაცხადა ენდი რობერტსონმა.
შოტლანდიური მედია ქვეყნის ეროვნული ნაკრების ფეხბურთელებს მოუწოდებს ეიფორიაში არ ჩავარდნენ ევრო 2024-ის საკვალიფიკაციო ციკლში ჩინებული სტარტის გამო.
გამოცემა „Glasgow Live“ მომავალ შეხვედრას ასე ეხმაურება:
„ნორვეგიაში მოგების შემდეგ, შოტლანდიის ეროვნული გუნდი ევროპის ჩემპიონატის ფინალურ ეტაპს ძალიან მიუახლოვდა, თუმცა, სამშაბათს საქართველოსთან თამაშში სიფრთხილეა საჭირო და ემოციებმა არ უნდა გადაგვძალოს. მიუხედავად იმისა, რომ სამ მატჩში აღებული 9 ქულა ძალიან მაგარი შედეგია, დასრულებული არაფერია და კიდევ დიდი სამუშაოა გასაწევი. კიდევ ერთი ნაბიჯი საქართველოს ნაკრებთან მატჩში უნდა გადავდგათ, რომელიც თავის მხრივ, მიმდინარე საკვალიფიკაციო ციკლში ასევე კარგად გამოიყურება. აღმოსავლეთევროპელებს ხვიჩა კვარაცხელია, გიორგი მიქაუტაძე და კიდევ რამდენიმე ტალანტი ჰყავთ და ჩვენი ჯგუფის ამოუცნობ გუნდად შეგვიძლია მივიჩნიოთ. მათ ნამდვილად შეუძლიათ შოტლანდიის შოკში ჩაგდება და მთავარმა მწვრთნელმა ეს აუცილებლად უნდა გაითვალისწინოს“.
საკუთარი მოსაზრება გააჩნია შოტლანდიის ნასკრების მთავარ მწვრთნელ სტივ კლარკსაც.
„ერთადერთი, რაც ამ დროისთვის შემიძლია გავაკეთო, ბიჭებისადმი მიმართვაა, რომ მიწაზე დაეშვნენ. იმიტომ, რომ თუკი სამშაბათის მატჩში შეცდომა დავუშვით, ეს ძვირი დაგვიჯდება. ამ შემთხვევაში, საკვალიფიკაციო ციკლის ძალიან რთული მეორე ნახევარი გარანტირებული გვაქვს. სწორედ ამაზე ვესაუბრები ფეხბურთელებსა და სრულიად პერსონსალსაც. მათი და გულშემატკივრების აღტკინების მიზეზი ნამდვილად მესმის. ეს ბუნებრივიცაა, თუმცა, კონცენტრაცია უდა შევინარჩუნოთ. იმედი მაქვს, რომ ფინალურ ეტაპზე გავალთ და ზეიმის დრო მერეც გვექნება, ახლა კი, მხოლოდ შემდეგ თამაშზე უნდა ვიფიქროთ. ვფიქრობ, მოვახერხებ, რომ მათ თავი არ დაკარგონ“, – განაცხადა სტივ კლარკმა.
შოტლანდიისა და საქართველოს ნაკრებთა მატჩი 20 ივნისს, თბილისის დროით 22:45 საათზე გაიმართება.
გამოცემა „L’Equipe“-ს მტკიცებით, „პარი სენ ჟერმენის“ ახალი მთავარი მწვრთნელი სავარაუდოდ ლუის ენრიკე გახდება.
იულიან ნაგელსმანთან მოლაპარაკებების ჩაშლის შემდეგ „პსჟ“-ს ხელმძღვანელობა ლუის ენრიკეს დაუკავშირდა, რომელიც მზადაა პარიზში იმუშაოს. ჯერჯერობით, 100%-იანი შეთანხმება მიღწეული არაა, მაგრამ მხარეები ბოლო დეტალებს ათანხმებენ. კონტრაქტის ფინანსური დეტალები უცნობია.
ლუის ენრიკეს აქტიურად უკავშირებდნენ „ნაპოლის“, მაგრამ ესპანელმა სპეციალისტმა იტალიის ჩემპიონის გაწვრთნაზე უარი თქვა.
მადრიდის „რეალის“ მთავარი მწვრთნელი კარლო ანჩელოტი კი სავარაუდოდ, ბრაზილიის ნაკრებს ჩაიბარებს. „Globo TV“-ის ცნობით, ბრაზილიის ფეხბურთის კონფედერაციამ მწვრთნელთან და „რეალთან“ შეთანხმებას პრაქტიკულად მიაღწია.
ბრაზილიის ფეხბურთის ფედერაციის პრეზიდენტი ედნალდო როდრიგესი ინფორმაციას სავარაუდოდ მიმდინარე თვის ბოლოს დაადასტურებს. თუმცა, ანჩელოტი ბრაზილიის ნაკრებში მუშაობას მხოლოდ მომავალი წლის იანვრიდან ან „რეალთან“ კონტრაქტი ამოწურვის, 2024 წლის ზაფხულიდან დაიწყებს.
ავტორი
