საქართველოში ამ დროისთვის კორონავირუსის 40 შემთხვევაა დადასტურებული, რომელთაგან 1 გამოჯანმრთელდა. დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, ეპიდემიის კიდევ უფრო გაფართოვებაა მოსალოდნელი, რაც უფრო მეტი ადამიანის დაინფიცირებას გამოიწვევს ვირუსით, რომელსაც მსოფლიოს მასშტაბით 8 000-ზე მეტი ადამიანი ემსხვერპლა.
საქართველოში ვირუსის პირველი შემთხვევის დაფიქსირებისთანავე დაიწყო მისი გავრცელების რისკის შესამცირებელი ღონისძიებები.
კორონავირუსისგან თავდაცვის ძირითადი რეკომენდაციებია: ხელების ხშირი დაბანა; სახეზე/ თვალში / პირზე ხელის შეხებისგან თავი არიდება; ჰიგიენის დაცვა; ხველისა და ცემინების ეტიკეტის დაცვა; ქუჩაში ცხოველებთან ახლო, დაუცველი კონტაქტისგან თავის შეკავება.
დისტანციური სასწავლო და სამუშაო რეჟიმი, ჩაკეტილი საზღვრები, სახლში დარჩენის რეკომენდაცია მოსახლეობას_ ეს ის სურათია, რაც დღეისთვის არაერთი ქვეყნის მსგავსად საქართველოშიც დგას.
თუმცა, მოქალაქეების ნაწილს ქუჩაში გადაადგილება სახლში დარჩენის რეკომენდაციის მიუხედავად მაინც უწევს. უსაფრთხოების მიზნით საზოგადოებრივ ტრანსპორტს – მეტროპოლიტენსა და ავტობუსებს დეზინფექცია უტარდება, სამარშრუტო ტაქსები კი პრემიერმა ვირუსის გავრცელების სახიფათო წყაროდ დაასახელა და მოძრაობა აუკრძალა.
„გურია ნიუსი“ დაინტერესდა იცავენ თუ არა თავს და კლიენტს ტაქსის მძღოლები კორონავირუსისგან, უტარებენ თუ არა მანქანებს დეზინფექციას_ რის გასარკვევადაც ქუჩებში მოძრავ ტაქსების მძღოლებსა და რამდენიმე ტაქსოკომპანიას გავესაუბრეთ.
მძღოლი გურამ მარტიაშვილი ამობს, რომ ხალხს არ აქვს ტაქსით მგზავრობის საშუალება და შესაბამისად, რადგან კლიენტი არ არის ვერც დეზინფექციის ჩატარების აუცილებლობას ხედავს, თუმცა, თუ იტყვიან დეზინფექციას ჩაატარებს.
„მუშაობა არ არის. კაციშვილი არ ჯდება მანქანაში და დეზინფექცია რისთვის გავაკეთო? ჩემთავს გავუკეთო? თუ იტყვიან და შემოგვთავაზებენ მანქანებს დეზინფექცია გავუკეთოთ, ჩავუტარებ“,_ ამბობს გურამი.
ერთ-ერთი მძღოლის, ალექსანდრეს თქმით, ავტომობილისთვის დეზინფექციის ჩატარების საშუალება არ აქვს.
„საშუალება არ მაქვს, რომ ავტომობილის დეზინფექცია ჩავატარო. ვრეცხავ“,_ ამბობს ალექსანდრე.
ტაქსის მძღოლი დათო გვეუბნება, რომ ავტომობილში სისუფთავის დაცვას ცდილობს, რეცხავს, მაგრამ დეზინფექცია მასაც არ ჩაუტარებია ავტომობილისთვის.
„მანქანა ავტოსამრეცხაოში მიმყავს და ვწმენდ, რამე განსაკუთრებული საშუალებები არ გამომიყენებია“,_ ამბობს დათო.
მძღოლი ვანო სილაგაძე კი ამბობს, რომ ავტომობილს უსაფრთხოების მიზნით შიგნიდანაც რეცხავს, მაგრამ ქუჩაში მოძრავ ტაქსებთან შედარებით ბევრი კლიენტი ტაქსოკომპანიებს ჰყავს, რადგან შედარებით იაფად ემსახურებიან კლიენტებს.
„მანქანას ყოველდღე ვრეცხავ შიგნიდან ჩემი უსაფრთხოების გამოც, მაგრამ ფული არ არის და ვინ დაჯდება. ხალხი ძირითადად მარშუტკებით მგზავრობდა, შედარებით მეტი კლიენტი ტაქსოკომპანიებს ჰყავთ, რადგან ჩვენთან შედარებით იაფად დადიან“,_ ამბობს ვანო სილაგაძე.
კომპანია გლობალ ტაქსში გვითხრეს, რომ ავტომობილებს დეზინფექცია გუშინ ჩაუტარდათ.
„60-მდე ავტომობილია და დეზინფექცია გუშინ ჩაუტარდათ“,_ ამბობენ გლობალ ტაქსში.
ქართული ტაქსში აღნიშნეს, რომ მიკროავტობუსებისთვის მოძრაობის შეწყვეტა ტაქსებზე კლიენტების მოთხოვნას არ გაზრდის, რადგან ხალხს ფული არ აქვს. კომპანიაში ასევე აღნიშნავენ, რომ ინდივიდუალური მძღოლები თბილისში არ არსებობენ და ერთი კომპანიის მძღოლი სხვა კომპანიასაც ემსახურება, რის გამოც, მათ თვითონ უნდა ჩაუტარონ დეზინფექცია ავტომობილებს.
„კომპანიას თავის ტაქსები არ ჰყავს. ნებისმიერ მძღოლს უწერია ნებისმიერი კომპანიის აპლიკაცია. მძღოლს, რომელსაც უწერია ჩემი აპლიკაცია, უწერია მაქსიმის აპლიკაცია, იანდექსის აპლიკაციაც. მძღოლს უწერია ყველა აპლიკაცია თუ რამე ტაქსი არსებობს საქართველოში. ინდივიდუალური მძღოლები არცერთ კომპანიას არ ჰყავს.
მძღოლებმა მანქანებში დეზინფექცია თვითონ უნდა ჩაატარონ თავიანთი ხარჯებით, მე რომ რომელიმე მანქანას გავუკეთო დეზინფექცია, გამოდის, რომ ვუკეთებ არა მარტო ჩემს მანქანას, არამედ ყველა კომპანიის მანქანას.
კარგი იქნებოდა მერიასთან შეთანხმებით, მაგალითად, შუშაზე მოხდეს გაკვრა, რომ ტაქსს აქვს ჩატარებული დეზინფექცია, რითიც კლიენტი მიხვდება დეზინფექცია ჩატარებულ ტაქსში ჯდება თუ არა“,_ გვითხრეს კომპანია ქართულ ტაქსში.
როგორც კომპანია მაქსიმში ამბობენ, მძღოლების დიდი ნაწილი პირბადით დადის და კორონავირუსისგან თავდასაცავ რეკომენდაციებს ითვალისწინებს.
„ძალიან ბევრი მძღოლი დადის პირბადით, იცავს ყველანაირ რჩევა-დარიგებას. ჩვენ ვაძლევთ რეკომენდაციებს მძღოლებს რომ გააკეთონ დეზინფექცია ავტომობილებში და ვაძლევთ ლოკაციებს, სადაც მარტივად შეუძლიათ დეზინფექციის ჩატარება ავტომობილისთვის“,_ გვითხრეს მაქსიმში.
