ლანჩხუთის მერიის წინადადების საფუძველზე ადგილობრივი საკრებულოს წევრებს რიგგარეშე სხდომის გამართვა მოუწიათ. დღის წესრიგის შესაბამისად, სხდომაზე ერთი საკითხი იყო წარმოდგენილი, რომელიც დეპუტატებს საფინანსო სამსახურის უფროსმა როლანდ ლაშხიამ გააცნო. კერძოდ, საკითხი მუნიციპალიტეტის მიმდინარე წლის მთავარ საფინანსო დოკუმენტში ცვლილების განხორციელების თაობაზე ადმინისტრაციული წარმოების დაწყებას ეხებოდა.
როგორც გაირკვა, მიმდინარე წლის ოქტომბრის თვეში მოსული უხვი ნალექის შედეგად დაზიანებული და დამეწყრილი გზების, მდინარეების გასწორხაზოვნების სამუშაოების დაფინანსებისთვის ინფრასტრუქტურის სამსახური 60 ათასს ლარს ითხოვს, რომელიც ადგილობრივმა ბიუჯეტმა უნდა გაიღოს. მერიის წინადადებით, 150 ათასი ლარით იზრდება კეთილმოწყობის ცენტრის დაფინანსებაც.
„მიზანშეწონილად ჩაითვალა გაეზარდოს დაფინანსება 150 000 ლარით, მათ შორის საწვავის ფასთა სხვაობის დეფიციტის შევსების გამო 34 000 ლარი, საბურავების შეძენისთვის 10 ათასი ლარი და საქონელი და მომსახურების ხარჯი 106 ათასი ლარი“,- წერია მერიის მიერ წარმოდგენილ განმარტებით ბარათში.
როგორც ირკვევა, ბიუჯეტი აღნიშნული დამატებითი ხარჯების უზრუნველყოფას ჯარიმების, სანქციებისა და საურავების გეგმის 210 ათასი ლარით ზრდის ხარჯზე უზრუნველყოფს.
