პური ერთ-ერთი უძველესი საკვებია და როგორც სხვადასხვა მეცნიერული კვლევებიდან ირკვევა, მისი ისტორია 30 000 წელზე მეტს ითვლის. დღეისთვის სხვადასხვა დასახელების და შეფერილობის პური არსებობს. საქართველო ხორბლის კულტურის მოშენებისა და პურის ცხობის ერთ-ერთი უძველესი კერაა. წლების განმავლობაში, იცვლება პურის დამზადების ტექნოლოგია, ყველაზე მთავარი, პროდუქტის მაღალი ხარისხი და სარგებლიანობაა. სამწუხაროდ, მოსახლეობის ცნობიერება, თუ რას მიირთმევს სინამდვილეში, დაბალია.
გურიაში, სხვადასხვა სოფლებში მაღაზიის დახლებზე პური “კალისტო 1920” გამოჩნდა.
“კალისტო 1920”-ს “გემოვანი” აწარმოებს _ ეს ის კომპანიაა, რომელმაც ქართულ ბაზარზე პური “მზეთამზე” გამოუშვა.
თავად “მზეთამზეს” ისტორია 2015 წელს დაიწყო, როცა სწორედ ამ სახელწოდების სოფელში, ბორჯომის რაიონში, პროექტის ხელმძღვანელებმა პირველად ხორბალი შეიძინეს და პურის წარმოება დაიწყეს.
რატომ “კალისტო 1920”, რით განსხვავდება ეს პროდუქტი სხვა სახეობის პურისგან, რისი ყიდვაც მომხმარებელს ჩვეულებრივ მაღაზიაში შეუძლია და რას გეგმავს პურის მწარმოებელი კომპანია _ ამის გასარკვევად საწარმოს დამფუძნებელს ირაკლი ჩავლეიშვილს ვესაუბრეთ.
ჩავლეიშვილის თქმით, პური უვიტამინო, ნატურალური ხორბლისგან და “პურის დედით” მზადდება:
“პურის დედა” ბუნებრივი საფუარია, რომელიც ფქვილზე და წყალზე დამზადებული ცომის დამჟავებით მიიღება.
“პურის დედის” გამოყენებით ცხობას დიდი ხნის ტრადიცია გააჩნია. ასეთი საფუარი პურს გამორჩეულ გემოსა და საუცხოო არომატს ანიჭებს. გარდა ამისა, ბუნებრივ საფუარზე დამზადებული პური ადვილად მოსანელებელი და მეტად ჯანსაღი პროდუქტია”, _ ამბობს ირაკლი ჩავლეიშვილი.
“მთისპირში იყო ადამიანი, კალისტო ჩავლეიშვილი, მომღერალი. ამ ადამიანმა 1920 წელს თავისი ფურნე გახსნა. როგორც ამბობენ, პური გემრიელი იყო; ამიტომ, პურს, რომელიც გურიაში იწარმოება, დავარქვით “კალისტო 1920”, _ გვიამბობს ჩავლეიშვილი და კალისტოს კოსმიური დატვირთვის შესახებაც გვესაუბრება.
მარცხნივ _ კალისტო ჩავლეიშვილი
მისი თქმით, კალისტო არის იუპიტერის ერთ-ერთი თანამგზავრი:
“როდესაც “მზეთამზე” შევქმენით, შევიტყვეთ, რომ მზეთამზე არის ყველას მზე, ცენტრალური გალაქტიკა. ასევე, არის სოფელი, სადაც ყანა პირველად ვიყიდეთ. ასევეა კალისტოც. არის პირი, რომელიც მთისპირში პურს აცხობდა და გარდა ამისა, კალისტო ჰქვია იუპიტერის ერთ-ერთ თანამგზავრს. მიწიერი და კოსმიური დატვირთვა აქვს ორივეს”, _ ამბობს ჩავლეიშვილი.
“კალისტო 1920”, ჯერჯერობით, სატესტო რეჟიმში იყიდება ბახვსა და მთისპირში. მალე კი მისი შეძენა ოზურგეთშიც იქნება შესაძლებელი:
“მოლაპარაკებებს ვაწარმოებთ “ჭადრების ბაღში” მდებარე თეთრი ჯიხურის მეპატრონესთან, რომ იქ იყოს “კალისტოს” მაღაზია, თუ მოლაპარაკება წარუმატებელი აღმოჩნდება, მერიას მოველაპარაკებით, რომ მსგავსი ჯიხური ჩავდგათ”, _ გვეუბნება ჩავლეიშვილი და ამბობს, რომ გურიის შემდეგ იმერეთს აითვისებს, ოღონდ იქ გალაკტიონის საპატივცემულოდ, პურს “გალაქტიკას” უწოდებს _ ამ სტრატეგიით აპირებს მთელი ქვეყნის მოცვას.
ნატურალური პურის წარმოების იდეა კი ირაკლი ჩავლეიშვილს სურსათის უვნებლობის საკითხებით დაინტერესების შემდეგ გაუჩნდა, როდესაც საბანკო სფეროდან სამუშაოდ, სურსათის უვნებლობის სააგენტოში გადაინაცვლა:
“საბანკო სფეროში ვმუშაობდი და სრულიად შემთხვევით დავიწყე მუშაობა სურსათის ეროვნულ სააგენტოში. დავინტერესდი სურსათის უვნებლობის საკითხით და მივხვდი, რომ ძალიან დაბალ დონეზეა ცნობიერება. ადამიანები არ ფიქრობენ, რით იკვებებიან. ამიტომ წამოვიწყეთ დიდი ექსპერიმენტი და ამ ექსპერიმენტს დავარქვით “გემოვანი” _ ეს არის ნიშანი, რომელიც აერთიანებს ქართული ჯიშის აგროპროდუქტებს. პირველი ექსპერიმენტი იყო პური “მზეთამზე”. შედეგად, უკვე 2021 წელს რუსთავის და თბილისის სუპერმარკეტებში დღეში რამდენიმე ათასი ცალი იყიდება”, _ გვითხრა ირაკლი ჩავლეიშვილმა.
ინფორმაციისთვის, პური “მზეთამზის” წარმოების დაწყების გარდა, “გემოვანს” უკავშირდება გურიაში, მთისპირში ჩხავერის ზვარის გაშენება, მეგრული თხებისა და კახური ღორის ფერმები, ასევე, ქართული ჯიშის სხვა, როგორც მცენარეული, ისე ცხოველური აგროსასურსათო პროდუქციის წარმოება.
აღსანიშნავია ისიც, რომ “გემოვანმა” 2018 წლის 26 მაისს გურიაში, გომისმთაზე, რომელიც ზღვის დონიდან 2000 მეტრზე მდებარეობს, “ჩუნიას” მინდვრებში, გაავლო პირველი ხნულები და დათესა ქართული სიმინდი, მუხუდო, დიკის პური, უიშვიათესი კარტოფილის ჯიში _ “მელანა” და სხვა კულტურები, რომლის არომატმაც უცხოელი სტუმრების აღაფრთოვანა.
