„ხალხი შეკვეთას მისცემს პოლიტიკურ ჯგუფებს და ’’ოცნებას“ პოლიტიკურ სანაგვეზე გავისტუმრებთ“ _ ახვლედიანი

 „დარწმუნებული ვარ,  ხალხი შეკვეთას მისცემს პოლიტიკურ ჯგუფებს და „ოცნებას“ პოლიტიკურ სანაგვეზე გავისტუმრებთ. უნდა მოხერხდეს არა მხოლოდ  „ოცნების“ მოძალადე ხელისუფლების ჩამოშორება, არამედ უზრუნველყოფა და გარანტია იმისა, რომ ამგვარი  ანომალიური  მმართველობა ხელისუფლების სათავეში აღარასოდეს მოვიდეს“, _ აღნიშნა „გურია ნიუსთან“ დემოკრატიული აუდიტის ცენტრის ხელმძღვანელმა, პოლიტოლოგიის დოქტორმა არმაზ ახვლედიანმა.

მისივე შეფასებით, „საზოგადოების ნაწილს გასული საპრეზიდენტო  არჩევნების დროს ჯერ კიდევ ჰქონდა ილუზია, რომ „ქართული ოცნების“ მმართველობის შენარჩუნება შეიძლებოდა, ახლა  ხალხმა დაინახა  თუ რამდენად საშიშია ქვეყნის სათავეში ამ ხელისუფლების დატოვება“.

_ ბატონო არმაზ, “ქართული ოცნების“ თავმჯდომარე ბიძინა ივანიშვილი, რომელმაც საზოგადოებას  ქვეყანაში არსებული  სოციალურ-ეკონომიკური ვითარების შესახებ საკუთარი ხედვა გააცნო, მიიჩნევს, რომ ხალხს ისე არ უჭირს, როგორც მათ ჰგონიათ.  როგორ ფიქრობთ, ბიძინა ივანიშვილს რატომ სურს ქვეყანაში არსებული რთული ვითარება საზოგადოების ფანტაზიის წარმოსახვის ნაწილად წარმოაჩინოს?

_ ბიძინა ივანიშვილის აღნიშნული შეფასება არა უბრალოდ აცდენილია რეალობას, არამედ იმ უმძიმეს მდგომარეობაზე მიუთითებს, რომელშიც პარტიის ხელმძღვანელი და მისი პოლიტიკური ჯგუფი იმყოფება. ივანიშვილი არაადეკვატური და  ქვეყნისთვის  სახიფათო ადამიანია. პარტიის ხელმძღვანელის აღნიშნული შეფასებების არაადეკვატურობიდანაც ჩანს, რომ „ქართული ოცნების“ საშველი აღარ არსებობს. საზოგადოების ნაწილს გასული საპრეზიდენტო არჩევნების დროს ჯერ კიდევ ჰქონდა ილუზია, რომ „ქართული ოცნების“ მმართველობის შენარჩუნება შეიძლებოდა, ახლა კი, დარწმუნებული ვარ, რომ ხალხმა  საბოლოოდ დაინახა თუ რამდენად  საშიშია  ქვეყნის სათავეში ამ ხელისუფლების დატოვება.

_ პარლამენტი “საერთო სასამართლოების შესახებ“ კანონპროექტს, რომელიც უზენაეს სასამართლოში მოსამართლეთა უვადოდ განმწესების პროცედურებს ითვალისწინებს, მეორე მოსმენით  ისე განიხილავს, რომ ვენეციის კომისიის დასკვნას არ ელოდება. ამ ფონზე, როგორ ფიქრობთ, მმართველი პარტია კანონპროექტში საერთაშორისო და ადგილობრივი ექსპერტების რეკომენდაციების გათვალისწინებას არ აპირებს და  სასამართლო სისტემაში არსებულ კლანს ძალაუფლებას საკანონმდებლო დონეზე კიდევ უფრო გაუმყარებს?

_ “ქართული ოცნება“ სასამართლოსთან მიმართებით  წინა ხელისუფლების ყველაზე მავნე ტრადიციას განაგრძობს. მართალია, დღეს „ქართულმა ოცნებამ“  მართლმსაჯულების სისტემაზე ისეთი წნეხის დამყარება ვერ შეძლო, რაც  სააკაშვილის დროს იყო, მაგრამ ეს სულ არ ნიშნავს იმას, რომ „ქართულ ოცნებას“ მართლმსაჯულებაზე სრული კონტროლის დამყარების სურვილი არ გააჩნია.  „ოცნება“ სასამართლო ხელისუფლებას არ დათმობს. ასეთ სიტუაციაში გამოსავალი ერთადერთია, საზოგადოებამ ხელისუფლებას  არჩევნებზე უარი უნდა უთხრას. რაც შეეხება საერთაშორისო ინსტიტუტებს, მათ შორის, ვენეციის კომისიის დასკვნას, რა თქმა უნდა, „ოცნება“ მისი რეკომენდაციების გათვალისწინებას არ აპირებს. „ქართულ ოცნებას“, ე.წ. რეფორმირების პროცესში  ამ ორგანიზაციების ჩართულობა იმიტომ სჭირდება, რომ თვალში ნაცარი შეგვაყაროს. ამ ფარსს წერტილი მაშინ დაესმება, როცა „არას“ ვეტყვით სასამართლოზე მოძალადე ხელისუფლებას. უკვე მერამდენე წელია ხელისუფლებას  მართლმსაჯულების  რეალური დამოუკიდებლობისკენ  ნაბიჯი არ გადაუდგამს _ „ოცნება“ კარგად ხვდება, რომ  იქ, სადაც სამართლის უზენაესობაა, მისი ადგილი აღარ დარჩება.

_ “ოცნების“ მმართველობის პირობებში  მივიღეთ ვითარება, როცა მმართველმა პარტიამ წინა ხელისუფლების მანკიერი საქმეების შემსრულებელი მოსამართლეები  ლიდერებად გადააქცია. ასეთ ვითარებაში „ქართული ოცნების“ მხრიდან იკვეთება იმ ღირებულებებიდან გადახვევა, რომლითაც ბიძინა ივანიშვილის ხელმძღვანელობით პარტია ხელისუფლების სათავეში მოვიდა. თქვენი მოსაზრებით, 2020 წლის  საპარლამენტო არჩევნებში „ოცნების“ მარცხის ფორმულა სხვა შეუსრულებელ დაპირებებთან ერთად, შესაძლოა, სასამართლო სისტემაში არსებული მანკიერებაც გახადეს?

_ მმართველ ძალას დამონებული სასამართლო სწორედ იმიტომ სჭირდება, რომ მმართველობა გაიხანგრძლივოს, ეს არის აქსიომა. ძალადობას მიხეილ სააკაშვილის ხელისუფლების დროს არ შევეგუეთ, რომლის რეჟიმის ფიასკოს ერთ-ერთი მთავარი მიზეზი სწორედ სასამართლო ხელისუფლების სრულად ხელში ჩაგდება იყო. ასეთივე ბოლო უჩანს „ოცნების“ მმართველობასაც. მინდა იმედი ვიქონიო, რომ ყველაფერი მშვიდობით დასრულდება და მმართველი პარტია საზოგადოებას არ მიიყვანს იმ კრიტიკულ ზღვართან, სადაც შეიძლება სიტუაცია კონტროლს აღარ დაექვემდებაროს.

_ პოლიტიკურ კონიუქტურაში, ჯერჯერობით, არ ჩანს, ე.წ. მესამე ძალა, რომელიც 2020 წლის საპარლამენტო არჩევნებში „ქართულ ოცნებას“ დაამარცხებს.  ამ ფონზე, თავად ვინ გესახებათ მმართველი პარტიის დამარცხების მთავარ გარანტად?

_ ერთადერთი ძალა, რომელიც  ე.წ. მმართველ პარტიას _ კორუმპირებულს, მოძალადეს, არადემოკრატიულსა და ანტიქართულს კონკურენციას გაუწევს, ეს არის ერთად შეკრული, ქართული იდეითა და დემოკრატიის იდეით გაერთიანებული, ქართველი ხალხი. დარწმუნებული ვარ, ხალხი შეკვეთას მიცემს პოლიტიკურ ჯგუფებს და „ოცნებას“ პოლიტიკურ სანაგვეზე გავისტუმრებთ. ყველა, თუნდაც მცირე პოლიტიკური პარტია და  საზოგადოებრივი ჯგუფი, რომლისთვისაც მთავარია სახელმწიფოს წარმატებული მომავალი, ხალხის კეთილდღეობა და დემოკრატია, უნდა გაერთიანდეს. უნდა მოხერხდეს არა მხოლოდ  „ოცნების“ მოძალადე ხელისუფლების ჩამოშორება, არამედ უზრუნველყოფა და გარანტია იმისა, რომ ამგვარი ანომალიური მმართველობა ხელისუფლებაში აღარასოდეს დაბრუნდეს.