სამი დღის წინ “გურია ნიუსის” ვებგვერდზე გახორციელებული ჰაკერული შეტევის საქმე, რომლის შედეგადაც ბაზები და არქივი მთლიანად განადგურებულია, ჯერ კიდევ გამოძიების პროცესშია.
“გურია ნიუსმა” იმავე დილით გაავრცელა ოფიციალური ინფორმაცია მის წინააღმდეგ გახორციელებული მძლავრი კიბერშეტევის შესახებ და ხელისუფლებას მოუწოდა, აქტიურად გამოეხატა საკუთარი დამოკიდებულება ამ ვანდალური აქტის მიმართ.
ჩვენს განცხადებას უამრავი მოქალაქე და ორგანიზაცია გამოეხმაურა _ ისინი მხარდაჭერას უცხადებენ “გურია ნიუსს” და აღშფოთებულები არიან, რადგან თვლიან, რომ ქვეყნის დემოკრატიული განვითარება დამოუკიდებელი და კრიტიკული მედიის არსებობაზეა დამოკიდებული.
სამწუხაროდ, შეწუხებულთა და აღშფოთებულთა შორის არ აღმოჩნდნენ ხელისუფლების წარმომადგენლები, გარდა პარლამენტის წევრის, ლანჩხუთი-ჩოხატაურის მაჟორიტარი დეპუტატის ნინო წილოსანისა, რომელმაც მხარდაჭერა გამოგვიცხადა და შეგვპირდა, რომ თვალყურს მიადევნებს გამოძიებას.
რაკი მთელი სამი დღის განმავლობაში ჩვენი ხელისუფალნი დუმდნენ, გადავწყვიტეთ, თავად დავკავშირებოდით მათ და გვეკითხა, რას ფიქრობდნენ ამ დანაშაულის შესახებ:
“ჰაკერული შეტევა “გურია ნიუსზე” კიდევ ერთხელ ადასტურებს, რომ კიბერდანაშაული, რომელიც მსოფლიოში მზარდი საფრთხეა, საქართველოშიც გვაყენებს ზიანს. მნიშვნელოვანია, რომ “გურია ნიუსმა” დროულად განაახლოს სრულფასოვანი მაუწყებლობა. თუ ამისთვის დამატებითი რესურსია საჭირო და თქვენი მკითხველების და მომხმარებლების სოლიდარობა დაგჭირდებათ, მე მზად ვარ შევუერთდე საერთო ძალისხმევას.
გამოძიება ამ საქმეზე დაწყებულია და იმედი მაქვს, რომ შსს-ს კიბერდანაყოფი საქმეს გახსნის; ასევე, რამდენადაც შესაძლებელია ხელს შეგიწყობთ ინფორმაციის აღდგენაში.
კიბერდანაშაული კომპლექსური და რთული დანაშაულია, ამიტომ მის გამოძიება ადვილი არ არის და ხშირად მეტი დრო სჭირდება,” _ ეს კომენტარი “გურია ნიუსთან” პარლამენტის წევრმა, უმრავლესობის ლიდერმა, არჩილ თალაკვაძემ გააკეთა.
მისივე თქმით, ინტერნეტმედიას და ელექტრონულ სერვისებს ჩვენი თანამოქალაქეები სულ უფრო მეტად იყენებენ ინფორმაციის მისაღებად, პირადი კომუნიკაციის, ბიზნესის კეთების, გადასახადების გადახდისა თუ განათლების მიზნით: “ამიტომ, კიბერუსაფრთხოება და ბრძოლა კიბერდანაშაულთან ჩვენთვის ძალიან პრიორიტეტულია,” _ თქვა თალაკვაძემ.
ლანჩხუთის და ჩოხატაურის მაჟორიტარი დეპუტატი ნინო წილოსანი: “აღშფოთებული ვარ იმ ფაქტით, რაც მოხდა. “გურია ნიუსი” არის ერთ-ერთი გამორჩეული მედიასაშუალება, გამოცდილი და ძლიერი პროფესიონალებით დაკომპლექტებული, რომელიც ოპერატიულად, ობიექტურად და დაბალანსებულად ავრცელებს ინფორმაციას. შესაბამისად, არა მხოლოდ რეგიონში, არამედ მთელი ქვეყნის მასშტაბით საზოგადოების ნდობის მაღალი ხარისხით სარგებლობს.
ძალიან სამწუხაროა, რომ “გურია ნიუსი” ჰაკერული თავდასხმის სამიზნე გახდა. ვადევნებ ამ მოვლენებს თვალს და ვიცი, რომ მოკვლევა უკვე დაიწყო. იმედს გამოვთქვამ, პროცესები ეფექტურად წარიმართება და დამნაშავე პასუხს აგებს. ასევე, უმნიშვნელოვანესია ის, რომ მაქსიმალურად მოხერხდეს ბაზების და დაკარგული ინფორმაციის აღდგენა,” _ გვითხრა ნინო წილოსანმა.
საქართველოს პარლამენტის წევრი ზვიად კვაჭანტირაძე: “წავიკითხე ეს ინფორმაცია გუშინ და ძალიან შევწუხდი. ვფიქრობ, გამოძიება შეძლებს დაადგინოს, ვინ იყვნენ შესაძლო დამკვეთები. ეს უფრო მნიშვნელოვანია, ვიდრე იმ ჰაკერის მოძიება, ვინც ფულის სანაცვლოდ, ალბათ, ყველა შეკვეთის შემსრულებელია.
“გურია ნიუსი” დამოუკიდებელი, ღია და აქტიური მედიაა და ასეთი იყო დღიდან დაარსებისა. ვფიქრობ, ეს ჰაკერული შეტევა მას საბოლოო ჯამში ვერაფერს დააკლებს და იგი კვლავაც ერთ-ერთ ყველაზე საინტერესო გამოცემად დარჩება ჩვენს ქვეყანაში.
გამოძიების შედეგებს ველოდებით. დამნაშავის დადგენა და მის პასუხისგებაში მიცემა აუცილებლად უნდა მოვითხოვოთ.”
ჩვენ ვეთანხმებით ბატონ ზვიადს იმაში, რომ “გურია ნიუსს” ჰაკერული შეტევა ვერაფერს დააკლებს _ ჩვენ უფრო მძიმე თავდასხმები გადაგვიტანია და გადავიტანთ კიდეც; ჩვენ არც ხელისუფლების მხარდაჭერა გვჭირდება _ უბრალოდ, შევახსენებთ, რომ თავისუფალი სიტყვის დაცვა და დანაშაულის აღკვეთა სახელმწიფოს და არსებული ხელისუფლების მოვალეობაა და ამ მოვალეობის შესრულებაში საქართველოს ღარიბი მოსახლეობა მას სოლიდურ ჯამაგირს უხდის.
