ხმაური იყო ლანჩხუთის საკრებულოს მორიგი სხდომაზე, სადაც მთავარ ინტრიგას საჯარო მოხელეებისთვის, როგორც მერიაში, ისე საკრებულოში, ხელფასების მატებასთან დაკავშირებით საკითხის განხილვა წარმოადგენდა. ოპოზიციის მხრიდან განსაკუთრებული აქტიურობით ენმ-ის ადგილობრივი ლიდერი კახა ასკურავა გამოირჩეოდა, რასაც მმართველი გუნდის მხრიდან მძაფრი რეაქციები ახლდა თან, რასაც არაერთხელ მოჰყვა ხმაური და სიტყვიერი დაპირისპირება კოლეგებს შორის.
ჯერ მერიაში თანამდებობის პირებისთვის ხელფასების მატების საკითხი განიხილეს, რომელიც ადმინისტრაციული სამსახურის თანამშრომელმა ელიკო იმნაძემ წარმოადგინა. მან იქვე დასძინა, რომ მერიის აუდიტის სამსახურში ვაკანსიაა და ამ დრომდე ვერ მოხერხდა კონკურსის წესით თანამშრომლის შერჩევა- თან ეს იმ პირობებში, როცა დასაქმების საკითხი ასე პრობლემატურიაო. მისი თქმით, ამის მთავარი მიზეზი იქ არსებული დაბალი ანაზღაურებაა და აქედან გამომდინარე სწორედაც უპრიანია მერიის თანამშრომლებისთვის ანაზღაურების მატებაო.
ელიკო იმნაძის ამ გამოსვლას ენმ-ის წევრი კახა ასკურავა გამოეხმაურა: „დიდ პატივს ვცემ ელიკოს, მაგრამ მისი ნათქვამიდან ვერაფერიც ვერ გავიგე. სასაცილო და აშკარა ტყუილია, თითქოს 500 ლარიან სამსახურში დასაქმების მსურველი არ გამოიძებნა. რაებს ამბობთ, ნახეთ ა(ა)იპ-ებში რა მდგომარეობაა, რეორგანიზაციას ვატარებთო და 50 კაცი გაუშვით სამსახურებიდან. აქედან 15 კაცის დაბრუნება უკან მოგიწიათ უკვე, ზოგი ადიკოს ზარით და ზოგიც ნინო წილოსანის. საზოგადოებას აყენებთ შეურაცხყოფას. თქვენ თუ ვერ ნახეთ, მე მოგიყვანთ, ვინც სიამოვნებით დასაქმდება მაგ თქვენს ვაკანსიაზე“.
ასკურავას გამოსვლას მმართველი გუნდის წევრთა მხრიდან ერთობლივი უკმაყოფილება მოჰყვა და სხდომათა დარბაზი რამდენიმე წუთის განმავლობაში სიტყვიერი დაპირისპირებისა და ხმაურის ეპიცენტრად იქცა.
მერიის მიერ წარმოდგენილი განმარტებითი ბარათის მიხედვით, ლანჩხუთის მერის ხელფასი 2650 ლარის ნაცვლად 5060 ლარი გახდა. პირველი მოადგილის ანაზღაურება 3850 ლარით განისაზღვრა, ხოლო მოადგილის-3520 ლარით. მერიის სამსახურის უფროსებს სახელფასო ანაზღაურება 2200 ლარი გაუხდათ. განყოფილების უფროსს-1760 ლარი. ლანჩხუთის მერიაში პირველი კატეგორიის უფროსი სპეციალისტის ხელფასი 1210 ლარი გახდა, მეორე კატეგორიის უფროსს სპეციალისტს 1100 ლარი ექნება.
საკრებულომ ასევე გადაწყვეტილება მიიღო საკრებულოს აპარატისა და პოლიტიკური თანამდებობის პირებისთვის ხელფასების მატების თაობაზეც. საკითხი საკრებულოს იურიდიული კომისიის თავმჯდომარემ გიორგი ხელაძემ გააცნო სხდომის დამსწრეებს.
ცვლილებებთან დაკავშირებით წარმოდგენილი განმარტებების მიხედვით, საკრებულოს აპარატის უფროსის ყოველთვიური ანაზღაურება 2200 ლარია. საორგანიზაციო განყოფილების ხელმძღვანელის- 1760 ლარი, ხოლო სამდივნოს უფროსის _ 1540 ლარი. საკრებულოს უფროსი სპეციალისტის ანაზღაურება 1210 ლარს შეადგენს, უმცროსი სპეციალისტის კი _1100 ლარს. როგორც ირკვევა, ლანჩხუთის საკრებულოს აპარატში 16 საშტატო ერთეულია, ხელშეკრულებით კი ხუთი პირია დასაქმებული.
რაც შეეხება საკრებულოს პოლიტიკური თანამდებობის პირების სახელფასო ანაზღაურებას, თავმჯდომარის ხელფასი 2650 ლარიდან 4510 ლარამდე გაიზარდა. 3410 ლარი გაუხდა ყოველთვიური ანაზღაურება თავმჯდომარის პირველ მოადგილეს, ხოლო კიდევ ორი მოადგილეს _ 2970 ლარი.
დარგობრივი კომისიებისა და ფრაქციათა ხელმძღვანელთა ანაზღაურება, რომელიც აქამდე 1700-1700 ლარით განისაზღვრა, ცვლილების მიხედვით კომისიის თავმჯდომარის ხელფასი 2420 ლარამდე გაიზრდა, ფრაქციის თავმჯდომარის კი 2200 ლარი გახდა. 1250 ლარის ნაცვლად 1760 ლარი გახდა ფრაქციის თავმჯდომარის მოადგილის ხელფასი.
გოჩა ჯანაშიამ, რომელიც საკრებულოში პარტია „ლელოს“ წარმოადგენს, ა(ა)პი-ბში დასაქმებულთათვის ხელფასების მატების საკითხი დააყენა.
„იმ ფონზე, როცა მაღალი თანამდებობის პირთათვის თითქმის ხელფასების გაორმაგება ხდება, უხერხულობას ქმნის , რომ ა(ა)პი-ებში დასაქმებულებს 200-180 ლარი აქვთ ანაზღაურება. მინიმუმ 30%-იანი მატება მაინც უნდა მოხდეს ამ კატეგორიის ადამიანებისთვის. ბაღებში კი გაიზარდა 10%-ით ხელფასები, მაგრამ ეს ნამდვილად არაა საკმარისი“-თქვა ჯანაშიამ.
კახა ასკურავამ კი წინადადება დააყენა, რომ ექვსი თვის განმავლობაში საკრებულოს წევრებს მომატებული ანაზღაურებაზე უარი ეთქვათ და ამ თანხით სოციალურად დაუცველთათვის ხვნა-თესვის პროგრამა დაეფინანსებინათ. ასკურავას ამ ინიციატივას მორიგი ხმაური და დაპირისპირება მოჰყვა.
„პოპულიზმი. სხვის ფულების დათვლაში მაგარი არიან“, _ ადგილიდან რეპლიკა ისროლა თავმჯდომარის მოადგილემ ემზარ თედორაძემ, რასაც ოპონენტის პასუხიც მოჰყვა: „პრეზიდიუმში ჯდომა არ ნიშნავს რომ ვინმეზე მეტი ხარ. ვინ არის სხვისი ფულების დათვლაში მაგარი წამო და ვიკითხოთ ხალხში.“
ასკურავასთან აქტიურ პოლემიკაში ჩაერთო კიდევ ერთი მოადგილე გიორგი ჩახვაძეც. მისი თქმით, კარგი იყო მსგავსი ინიციატივები მაშინ გამოეჩინა, როცა თავად წარმოადგენდა ხელისუფლებას და ყველა სამ თვეში პრემიებს იღებდა. ბრალდებების ვალში არც ასკურავა დარჩა და შეახსენა, რომ თავად ჩახვაძეც იმ ხელისუფლების ნაწილი იყო განვლილ წლებში.
საბოლოოდ კი საკრებულოს წევრთა უმრავლესობის გადაწყვეტილებით ლანჩხუთის მერიასა და საკრებულოში დასაქმებულებს ხელფასები გაეზარდათ.
