“ხის თუ ქვის სახლი” _ რომელი საშენი მასალა გახდება უპირატესი გომისმთაზე

ოზურგეთის მუნიციპალიტეტის დაბა  გომისმთა, ვიდრე მას დასახლებული პუნქტის სახელი მიენიჭებოდა, კომუნისტურ ეპოქაშიც მოიაზრებოდა საკურორტო ადგილად და აქ მრავალი სახლიც იდგა. თუმცა, უმეტესად, ალპური ზონა საძოვრებად იყო გამოყენებული და როგორც ასაკოვანი ადამიანები იხსენებენ, ბევრს, მწყემსობის პერიოდში, აქ ბავშვები “ჰაერის გამოცვლის” მიზნით მიჰყავდა.

უკანასკნელი ორი-სამი წლის განმავლობაში, როცა გომისმთის განაშენიანების გეგმის შესახებ სამთავრობო დონეზე დაიწყეს საუბარი, მთას ერთბაშად მოეძალა უნებართვო მშენებლობის მოსურნეეები.

პანდემიის პირობებში, რაოდენ გასაკვირიც უნდა იყოს, კურორტს ძალიან ბევრი ტურისტი ესტუმრა.

_ ასეთი ამბავი არც შარშან ყოფილა და არც შარშანწინ. გომისმთაზე უამრავი ტურისტია _ ფაქტობრივად, ბუმია, უმეტესად საქართველოში მცხოვრებლები არიან. ამინდებიც კარგია. ბევრგან ნახავთ გაშლილ კარვებს. ზოგიც ადგილზე, კოტეჯებში და ძველ სახლებში ქირით ცხოვრობს, _ გვატყობინებენ გომისმთიდან.

კითხვაზე _ ტურისტების სახელით ხომ არ ხდება “მიწის მაძიებელთა” შემოსვლა, წყარო გვპასუხობს, რომ ისინი, ვინც მიწის უკანონოდ მისაკუთრებას ცდილობენ, არავის და არაფერს ერიდებიან:

 _ ვინც ბოძების უკითხავად დარჭობას კადრულობს, არც რცხვენია და არც ერიდება. ამიტომ, არც თავს ინიღბავენ. წელს ნამდვილად უამრავი ტურისტია. ერთი შეხედვით იცნობ და მიხვდები. ამ ადამიანებს ძალიან დიდი პოზიტივი მოაქვთ მთაში და იმის იმედსაც აღვიძებენ, რომ ეს ქაოსი ოდესმე დასრულდება და გომისმთა  მართლაც გახდება ვიზიტორთა უსაყვარლესი ადგილი.

გომისმთაზე ოდითგან, როცა იქ პირველი სახლი დაიდგა, საშენ მასალად ხეს იყენებდნენ.

დღეისთვის აქ, როცა მშენებლობების ბუმია, ხშირად ისმის კითხვა _ გამოდგება თუ არა ქვის სახლები გომისმთაზე?

კითხვა წარმოშვა, ქვის მასალისა და ცემენტის გამოყენებით სახლების მშენებლობის დაწყებამ. ბევრი აღნიშნავს, რომ ზამთარში, ყინვის გამო, ქვით ნაშენი სახლი შეიძლება დაიბზაროს.

კურორტზე სახლების შენების საკმაოდ დიდი პრაქტიკა აქვს ერთ-ერთ ძველ მცხოვრებს, მერაბ სანიკიძეს _ მას აქ არა ერთი სახლი აქვს აშენებული, როგორც ხის, ასევე, ქვის მასალისგან.

_ დიდ ინტერესს ქვისა და ხის სახლებს შორის განსხვავებაზე მთის პირობებში საცხოვრებლად იწვევს ის, რომ გომისმთა მზარდი კურორტია, _ გვითხრა მერაბ სანიკიძემ.

მისივე თქმით, ქვის სახლის აშენება, მისი კაპიტალურად გაკეთება, პირიქით, საუკეთესო იქნება, მთაში სეზონურად თუ მუდმივად მცხოვრები ადამიანისთვის:

_ საქმე იმაში გახლავთ, რომ გურიასა და აჭარაში ტრადიცია არ იყო, აეშენებინათ ქვის და ცემენტის სახლი. ადგილზე იშოვებოდა ხის მასალა, მოჭრიდნენ სასურველი ჯიშის მერქნიან მცენარეს, რომელიც ყველგან იყო, რაც, ამავდროულად, იაფიც ჯდებოდა და ასე აშენებდნენ. რა თქმა უნდა, ხის სახლს ეკოლოგიურად უპირატესობა აქვს, თუმცა, დღეს კურორტზე სხვა მოთხოვნებია _ ვინც ზამთარშიც დააპირებს აქ დარჩენას და ეს ასეც მოხდება, რადგან გომისმთას სამთო-სათხილამურო კურორტის პერსპექტივა აქვს, აუცილებლად ააგებს ქვის სახლს. უკვე დაიწყო ასეთი ტენდენცია, რაც, ჩემი აზრით, უფრო გაფართოვდება. სკანდინავიის ქვეყნებში, ნებისმიერ ცივი კლიმატის მქონე ქვეყანაში, მთებში ყველგან აშენებენ კაპიტალურ სახლებს. მხოლოდ რუსეთია ამ მხრივ გამონაკლისი _ იქ ბევრგან შეხვდებით მორებისგან შეკრულ კოტეჯებს კურორტებზე. ასევე, მუდმივ საცხოვრებლადაც, უმეტესად პერიფერიებში. ეს არცაა გასაკვირი, რადგან რუსეთს უზარმაზარი ტყის მასივები აქვს, _ გვითხრა მერაბ სანიკიძემ.

უკვე მრავალი სახლის მშენებელი ამბობს, რომ მნიშვნელოვანია, საშენი მასალის ხარისხი და აგების დრო:

_ ზოგი ამჯობინებს კომბინირებული სახლის აშენებას და იყენებს, როგორც ქვის, ასევე, ხის მასალას. გემოვნებას საზღვრები არ აქვს _ თავისებურად ლამაზია ასეთი სახლები და თითოეული ოთახის დანიშნულებას განასხვავებენ. მთავარია, კარგად ააშენო. საშენი მასალა ხარისხიანი უნდა იყოს და დრო შესაფერისი, როდის ააგებ, _ ამბობს მერაბ სანიკიძე.

_ ბატონო მერაბ, დიდია ინტერესი და იქნებ, გვითხრათ, გომისმთაზე ქვის სახლის აშენება სჯობს თუ ქვის? ამბობენ, რომ ყინვა ცემენტით ნაშენ კედლებს დაბზარავს.

_ ვიცი, რომ ასე ამბობენ, თუმცა, პრაქტიკა გვაჩვენებს, რომ თუ საშენ მასალას არ მიაკლებ ყინვის საწინააღმდეგო ნივთიერებებს, რომელიც ახლა ყველგან იყიდება (ნუ დაგვავიწყდება, რომ 21-ე საუკუნეა), არავითარი საშიშროება არ არსებობს. რვა წელია, ჩემი სახლი ავაშენე აქ _ ერთ ნაკაწრიც არ აქვს, არსად გასჩენია ბზარი, არც სხვა რამ ზიანის მაგვარი შემინიშნავს, რაც ყინვით ან სინესტით იყოს გამოწვეული.

_ დღეისთვის რამდენი სახლი გაქვთ აშენებული?

_ ადრინდელი არ მახსოვს ზუსტად. ბოლო პერიოდში, ალბათ, რვა სახლი. სხვადასხვა დიზაინით.

_ უფრო ხის სახლებს აშენებენ თუ ქვისას?

_ ახლა უმეტესად ქვის სახლების აშენება სურთ. თუმცა, მომავალში რას იზამენ, ვერ გეტყვით. ჩემი აზრით, რაც დღემდე პრაქტიკამ მაჩვენა, ქვის სახლს არანაირი საფრთხე არ ემუქრება ყინვისგან თუ, ზოგადად, თოვლისგან. ვიმეორებ, საძირკვლიდან დაწყებული სახურავამდე, საშენ მასალას უნდა საგულდაგულო შერჩევა. ვფიქრობ, ძალიან ლამაზიც იქნება, კურორტს ამშვენებდეს, როგორც ქვის, ისე ხის სახლები. ამას მიემატოს კომბინირებული სახის მშენებლობაც, რაც თავისებურ ხიბლს შემატებს კურორტის ხედებს. მიუხედავად ქაოსისა და პესიმისტური განცხადებებისა, მე მჯერა, რომ გომისმთა საუცხოო კურორტად ჩამოყალიბდება და არ დააკლდება ტურისტები, როგორც უცხოეთიდან, ასევე, მთელი საქართველოდან, _ იმედიანად გვემშვიდობება მერაბ სანიკიძე.